KALANSEN 33
Ala ka Masaya bɛna min kɛ
Ala ka Masaya sigira sen kan ka ban! A bɛna yɛlɛmabaw kɛ dugukolo kan sɔɔni. Fɛn ɲuman minnu bɛna kɛ Ala ka Masaya kɔrɔ, an ka olu dɔw lajɛ.
1. Ala ka Masaya bɛna hɛrɛ ani tilennenya sigi kokura dugukolo kan cogo di?
Yesu, Ala ka Masaya masakɛ bɛna mɔgɔ juguw ani gofɛrɛnɛmanw halaki Harmagedɔn kɛlɛ la. (Jirali 16:14, 16) O waati la, Bibulu ka layidu in bɛna tiimɛ cogo dafalen na: “Sɔɔni mɔgɔ jugu tɛna ye tun.” (Zaburu 37:10) Masaya sababu la, Yesu bɛna a janto a la hɛrɛ ni tilennenya ka kɛ dugukolo fan bɛɛ la.—Esayi 11:4 kalan.
2. Ɲɛnamaya bɛna kɛ cogo di ni Ala sago bɛ ka kɛ dugukolo kan?
Ala ka Masaya ka mara kɔrɔ, “Dugukolo na kɛ mɔgɔ tilennenw ciyɛn ye. U na sigi a kan badaa.” (Zaburu 37:29) Miiri i yɛrɛ la i kɛtɔ ka ɲɛnamaya kɛ diɲɛ kɔnɔ, min na mɔgɔw bɛɛ ye mɔgɔ tilennenw ye, u bɛ Jehova kanu, ani u bɛ ɲɔgɔn kanu fana! Mɔgɔ si tɛna bana ani mɔgɔw bɛɛ bɛna ɲɛnamaya kɛ fo badaa.
3. Ala ka Masaya bɛna mun de kɛ mɔgɔ juguw halakilen kɔ?
Mɔgɔ juguw halakilen kɔ, Yesu masakɛlama bɛna mara kɛ san 1 000 kɔnɔna na. O waati kɔnɔna na, ale ni a ka marakɛɲɔgɔn 144 000 bɛna mɔgɔw dɛmɛ dugukolo kan walasa u ka dafalenya sɔrɔ. O san 1 000 laban waati la, dugukolo bɛna kɛ alijinɛ cɛɲumanba ye. A falen bɛ kɛ mɔgɔw la minnu bɛ ɲɛnamaya kɛ lafiya la ka d’a kan u bɛ ka Jehova ka sariyaw kan minɛ. O la, Yesu bɛna Masaya segin a Fa Jehova ma. Jehova “tɔgɔ [bɛna] saniya” iko o ma deli ka kɛ cogo min na. (Matiyu 6:9, 10) A bɛna ye ka jɛya ko Jehova ye Marabaga ɲuman ye min b’a janto a ka maradenw na. O la sa, Sitanɛ, jinɛw ani mɔgɔ o mɔgɔ, min b’a sugandi ka muruti Jehova ka mara ma, Jehova bɛna olu bɛɛ halaki. (Jirali 20:7-10) Dafalenya ko minnu bɛna kɛ yen Ala ka Masaya sababu la, olu bɛna kɛ yen fo badaa.
DƆ FARA I KA DƆNNIYA KAN
Ala bɛna baara kɛ ni a ka Masaya ye walasa ka Bibulu ka layiduw bɛɛ tiimɛ minnu bɛ kuma an ka sini ko kan. An k’a lajɛ kun min na an bɛ se ka da o la.
4. Ala ka Masaya bɛna dan bila Hadamaden gofɛrɛnɛmanw la
“Mɔgɔ dɔ bɛ sigi kuntigiya la dɔ kun na ka bɔnɛ lase o ma.” (Waajulikɛla 8:9) O tilenbaliya nana ni gɛlɛya minnu ye, Jehova bɛna olu bɛɛ bɔ yen a ka Masaya sababu la.
Daniɛl 2:44, ani 2 Tesalonikekaw 1:6-8 kalan, o kɔ aw ka baro kɛ nin ɲininkaliw kan:
Jehova ni a Denkɛ Yesu bɛna mun de kɛ Hadamaden gofɛrɛnɛmanw ni u kɔkɔrɔdonbagaw la?
Ka kɛɲɛ ni fɛnw ye i ye minnu kalan Jehova ni Yesu ko la, mun na i dalen b’a la ko u ka walew bɛna kɛ kɛwale tilennenw ye?
5. Yesu de ye masakɛw bɛɛ la ɲuman ye
Ikomi Yesu de ye Ala ka Masaya masakɛ ye, a bɛna fɛn ɲuman caman kɛ Ala ka Masaya maradenw ye minnu bɛ dugukolo kan. A’ye WIDEYO lajɛ walasa k’a ye cogo min na Yesu y’a jira ka ban ko a ka di a ye ka mɔgɔw dɛmɛ ani ko Ala ye o kɛli se di a ma.
Yesu ye fɛn minnu kɛ k’a to dugukolo kan, olu y’a jira Ala ka Masaya bɛna min kɛ. E kɔrɔtɔlen don kɛrɛnkɛrɛnnenya la ka nin duba ninnu jumɛnw de waleyatɔ ye? Tɛmɛsiraw kalan minnu bɛ o layiduw kɛrɛ fɛ. Olu bɛ an dɛmɛ ka fɛn caman dɔn o layiduw kan.
KA YESU TO DUGUKOLO KAN . . . |
KA YESU TO SANKOLO LA . . . |
|---|---|
|
|
|
|
|
|
|
|
6. Ala ka Masaya bɛ na ni siniɲɛsigi ɲumanba ye
Jehova sagonata tun ye min ye kabini fɔlɔ-fɔlɔ ka ɲɛsin mɔgɔw ma, a ka Masaya bɛna o kɛ ka dafa. U bɛna ɲɛnamaya kɛ fo badaa alijinɛ kɔnɔ dugukolo kan. A’ye WIDEYO lajɛ walasa k’a ye Jehova bɛ ka baara kɛ ni a Denkɛ Yesu ye cogo min na ka a sagonata dafa.
Zaburu 145:16 kalan, o kɔ aw ka baro kɛ nin ɲininkali kan:
K’a dɔn ko Jehova bɛna “fɛn ɲɛnamaw bɛɛ wasa u sagona fɛnw na”, o bɛ mun kɛ i la?
MƆGƆ DƆW B’A FƆ KO: “Ni an bɛɛ ye an bolow di ɲɔgɔn ma ka jɛ ka baara kɛ ɲɔgɔn fɛ, an bɛna se ka diɲɛ gɛlɛyaw ɲɛnabɔ.”
Ala ka Masaya bɛna gɛlɛya jumɛnw ɲɛnabɔ Hadamaden gofɛrɛnɛmanw tɛ se ka minnu ɲɛnabɔ?
BAKURUBAFƆLI
Ala ka Masaya bɛna Ala kuntilenna dafa. A bɛna dugukolo bɛɛ yɛlɛma ka kɛ alijinɛ ye. O falen bɛ kɛ mɔgɔ ɲumanw la minnu bɛna Jehova bato fo badaa.
Seginnkanni
Ala ka Masaya bɛna Jehova tɔgɔ saniya cogo di?
Mun na an bɛ se ka da a la ko Ala ka Masaya bɛna Bibulu ka layiduw tiimɛ?
Ala ka Masaya bɛna fɛn ɲuman minnu bɛɛ kɛ, e kɔrɔtɔlen don kɛrɛnkɛrɛnnenya la ka olu jumɛnw de waleyatɔ ye?
NINNU LAJƐ
Yesu ye waati min wele ko “tɔɔrɔba“ waati, ko minnu bɛna kɛ o waati la olu sɛgɛsɛgɛ.—Matiyu 24:21.
“N’a fɔra ko tɔɔrɔba, o kɔrɔ ye mun ye?” (jw.org barokun dɔ)
A lajɛ denbayaw bɛ se ka hakilijagabɔ kɛ ɲɔgɔn fɛ cogo min na Masaya duba nataw kan.
Nin barokun in kɔnɔ: “Ɲininkali caman tun bɛ ka ne hakili ɲagamin,” a lajɛ politiki mɔgɔ murutilen dɔ ye jaabiw sɔrɔ a ka ɲininkaliw la cogo min na.