KALANSEN 25
Ala sagonata ye mun de ye ka ɲɛsin an ma?
Bibulu b’a fɔ ko Hadamadenw “si tilew ka surun, tɔɔrɔ bɛ u la tuma bɛɛ.” (Job 14:1) Yala tiɲɛ na o de tun ye Ala sago ye ka ɲɛsin an ma wa? Ni o tɛ, a sagonata ye mun ye ka ɲɛsin an ma? Yala a sagonata bɛna dafa don dɔ la wa? Bibulu bɛ dususaalo jaabi minnu di o ɲininkaliw la an ka olu lajɛ.
1. Jehova b’a fɛ an ka ɲɛnamaya sugu jumɛn de sɔrɔ?
Jehova b’a fɛ an ka ɲɛnamaya kɛcogo bɛɛ la ɲuman de sɔrɔ. Tuma min na a ye mɔgɔ fɔlɔw Hadama ni Hawa da, a ye u bila alijinɛ cɛɲumanba dɔ kɔnɔ, ni o ye Edɛn nakɔtu ye. O kɔ, “Ala dubara u ye. Ala y’a fɔ u ye ko: ‘Aw ka bange ka caya ka dugukolo fa ka a kolo’”. (Jenɛse 1:28) Jehova tun b’a fɛ u ka denw sɔrɔ, ka dugukolo bɛɛ kɛ alijinɛ ye ani ka u janto baganw na. A sagonata tun ye Hadamadenw bɛɛ tun ka kɛnɛya dafalen diyabɔ ani ka ɲɛnamaya kɛ fo badaa.
Hali ni kow ma kɛ o cogo la,a Ala sagonata ma yɛlɛma. (Esayi 46:10, 11) A b’a fɛ halisa Hadamaden minnu b’a kan minɛ olu ka ɲɛnamaya kɛ fo badaa cogo dafalen na.—Jirali 21:3, 4 kalan.
2. An ka ɲɛnamaya bɛ se ka ɲɛ cogo di kabini sisan?
Jehova ye an da cogo la min b’a to an mago bɛ kɛ a ka ɲɛminɛli la, o de la Ala dɔnni ani a batoli nege bɛ an na. (Matiyu 5:3-6 kalan.) A b’a fɛ an ka teriya ɲuman kɛ ni a ye, “ka a ka siraw bɛɛ taama k’a kanu” ani ka baara kɛ a ye “ni [an] dusukun bɛɛ” ye. (Dutɛrɔnɔmɛ 10:12; Zaburu 25:14) Ni an b’o kɛ, an bɛ se ka nisɔndiya tiɲɛ yɛrɛ la hali ni gɛlɛyaw bɛ an kan. Jehova batoli b’a to an ka ɲɛnamaya bɛ ɲɛ tiɲɛ yɛrɛ la ka d’a kan ni an b’o kɛ, an bɛ ɲɛnamaya kɛ iko Jehova b’a fɛ cogo min na.
DƆ FARA I KA DƆNNIYA KAN
Jehova ye kanuyaba jira tuma min na a tun bɛ ka dugukolo da an ye. Ɲɛnamaya kun ye min ye, a ka Kuma bɛ an kalan o la. An k’a ɲini ka olu dɔn.
3. Jehova b’a fɛ Hadamadenw ka ɲɛnamaya ɲumanba sɔrɔ
A’ye WIDEYO lajɛ, o kɔ aw ka baro kɛ nin ɲininkali kan:
Mun na Ala ye an ka dugukolo cɛɲumanba da?
Waajulikɛla 3:11 kalan, o kɔ aw ka baro kɛ nin ɲininkali kan:
Nin bɛ i kalan mun de la Jehova ko la?
4. Jehova sagonata ma yɛlɛma
Zaburu 37:11, 29 ani Esayi 55:11 kalan, o kɔ aw ka baro kɛ nin ɲininkali kan:
Jehova sagonata ye min ye ka ɲɛsin an ma, an b’a dɔn cogo di ko o ma yɛlɛma?
So min tiɲɛna, o bɛ se ka segin ka dilan kura ye. O cogo kelen na, hali ni Hadamadenw fanba ma u janto dugukolo la, Ala bɛna segin ka a dilan kura ye walasa ka a di mɔgɔw ma minnu bɛ ale Ala kanu
5. Jehova batoli bɛ an ka ɲɛnamaya ɲɛ tiɲɛ yɛrɛ la
K’a dɔn ɲɛnamaya kun ye min ye, o bɛ se ka nisɔndiya di an ma. A’ye WIDEYO lajɛ, o kɔ aw ka baro kɛ nin ɲininkali kan:
Ɲɛnamaya kun dɔnni ye Terumi nafa cogo jumɛn na?
Waajulikɛla 12:15 kalan, o kɔ aw ka baro kɛ nin ɲininkali kan:
Ikomi Jehova ye fɛn caman kɛ an ye, an bɛ an ka waleɲumandɔn jira a la cogo di?
MƆGƆ DƆ BƐ SE KA NIN ƝININKALI KƐ: “Ɲɛnamaya kun ye mun ye?”
I bɛ o tigi jaabi cogo di?
BAKURUBAFƆLI
Jehova b’a fɛ an ka ɲɛnamaya kɛ nisɔndiya la fo badaa cogo dafalen na dugukolo kan yan. Ni an bɛ Jehova bato ni an dusukun bɛɛ ye, an ka ɲɛnamaya bɛ ɲɛ tiɲɛ yɛrɛ la, kabini sisan yɛrɛ.
Seginnkanni
Jehova sagonata tun ye mun ye kabini fɔlɔ-fɔlɔ ka ɲɛsin Hadama ni Hawa ma?
Ala sagonata ye min ye ka ɲɛsin Hadamadenw ma, an b’a dɔn cogo di ko o ma yɛlɛma?
I bɛ se ka mun kɛ walasa i ka ɲɛnamaya ka ɲɛ tiɲɛ yɛrɛ la?
NINNU LAJƐ
A lajɛ kun min na an bɛ se ka da a la ko Edɛn nakɔtu kɛra yen tiɲɛ yɛrɛ la.
A lajɛ kun min na an bɛ se ka da a la ko dugukolo bɛna to fo badaa.
Cɛ dɔ tun b’a miiri ko fɛn bɛɛ b’a bolo. A lajɛ cogo min na a ye fɛn dɔ sɔrɔ min tun b’a jɛ a ka ɲɛnamaya kɔnɔ.
a Kalansen nata la, i bɛna a dɔn kun min na an tɛ o ɲɛnamaya sugu la bi.