KALANSEN 13
Diinɛ nkalonmaw bɛ ka Ala tɔgɔ tiɲɛ cogo min na
Ni Ala ye kanuya ye, mun na diinɛ minnu b’a fɔ ko olu bɛ kuma ani ka kow kɛ Ala tɔgɔ la, olu ye ko jugu caman kɛ? O kun ye dɔrɔn ko, o diinɛw ye diinɛ nkalonmaw ye, u bɛ Ala tɔgɔ tiɲɛ. U ye Ala tɔgɔ tiɲɛ cogo di? Ala bɛ mun miiri o ko la? Ani a bɛna mun kɛ ka ɲɛsin o ko ma?
1. Diinɛ nkalonmaw bɛ ka Ala tɔgɔ tiɲɛ cogo di u ka kalanw fɛ?
Diinɛ nkalonmaw ye “Ala ka tiɲɛ falen nkalon na”. (Romɛkaw 1:25) Misali la, diinɛ caman tɛ a kɔnɔmɔgɔw kalan Ala tɔgɔ ko la. K’a sɔrɔ Bibulu b’a fɔ ko Ala tɔgɔ ka kan ka to ka fɔ. (Romɛkaw 10:13, 14) Diinɛ ɲɛmɔgɔ dɔw b’a fɔ ko, ni ko juguba dɔ kɛra, o ye Ala sago ye. Nka o ye nkalon ye. Ko jugu tɛ Ala nɔ ye tuma si. (Yakuba 1:13 kalan.) Dusukasiko don k’a ye ko, diinɛw ka nkalonw ye mɔgɔw mabɔ Ala la.
2. Diinɛ nkalonmaw bɛ ka Ala tɔgɔ tiɲɛ cogo di u ka kɛwalew fɛ?
Diinɛ nkalonmaw tɛ mɔgɔw minɛ iko Jehova b’u minɛ cogo min na. Bibulu b’a fɔ ko diinɛ nkalonmaw ka “jurumuw cayara fo ka se sankolo ma.” (Jirali 18:5) Kabini san kɛmɛ caman, diinɛw ye u sen don politikikow la, ka kɛlɛw kɔkɔrɔdon, ani u kɛra mɔgɔ minnu ka saya sababu ye walima u ye mɔgɔ minnu ka saya kɔkɔrɔdon, olu hakɛ ka ca fo k’a dama tɛmɛn. Diinɛ ɲɛmɔgɔ dɔw bɛ ka ɲɛnamaya kɛ diyaba kɔnɔ ani u bɛ wari ɲini u ka diinɛ mɔgɔw fɛ walasa ka o ɲɛnamaya kɛcogo in musakaw sɔrɔ. O kɛwale suguw b’a jira ko u tɛ Ala dɔn fewu ani ko yamaruya t’u bolo cogo si la ka u yɛrɛw jira iko Ala ka mɔgɔ jɔnjɔnw.—1 Yuhana 4:8 kalan.
3. Ala bɛ mun miiri diinɛ nkalonmaw ko la?
Diinɛ nkalonmaw bɛ ka ko minnu kɛ, ni olu bɛ i dusu bɔ, i hakili la Jehova bɛ kɛ cogo di? Jehova bɛ mɔgɔw kanu, nka a dusu bɔlen bɛ diinɛ ɲɛmɔgɔw kɔrɔ minnu bɛ k’a tɔgɔ tiɲɛ ani ka u nɔfɛmɔgɔw minɛkojuguya. A ye layidu ta ko diinɛ nkalonmaw bɛna halaki ani ko u “tɛna ye tun.” (Jirali 18:21) Sɔɔni, Ala bɛna dan bila diinɛ nkalonmaw bɛɛ la.—Jirali 18:8.
DƆ FARA I KA DƆNNIYA KAN
Ala bɛ min miiri diinɛ nkalonmaw ko la, an ka fɛn caman sɛgɛsɛgɛ o ko la. An b’a lajɛ fana diinɛ nkalonmaw ye min kɛ ani kun min na o man kan ka i bali k’a ɲini ka Jehova dɔn.
4. Ala tɛ sɔn diinɛw bɛɛ la
Mɔgɔ caman b’a miiri ko diinɛw bɛ iko sira suguya caman minnu bɛɛ bɛ taa ni mɔgɔw ye Ala yɔrɔ. Nka yala o ye tiɲɛ ye wa? Matiyu 7:13, 14 kalan, o kɔ aw ka baro kɛ nin ɲininkali kan:
Sira min bɛ taa ɲɛnamaya la, Bibulu bɛ mun de fɔ o ko la?
A’ye WIDEYO lajɛ, o kɔ aw ka baro kɛ nin ɲininkali kan:
Yala Bibulu b’a fɔ ko diinɛ caman bɛ yen minnu ko ka di Ala ye wa?
5. Diinɛ nkalonmaw tɛ Ala ka kanuya waleya
Diinɛw ye Ala tɔgɔ tiɲɛ sira caman fɛ. U ye o kɛ sira jugumanba minnu fɛ, olu dɔ la kelen ye ko, u ye u sen don kɛlɛw la. Walasa ka o misali kelen ye, a’ye WIDEYO lajɛ. O kɔ aw ka baro kɛ nin ɲininkaliw kan:
Egilisi caman ye mun de kɛ diɲɛ Kɛlɛba Filanan kɔnɔna na?
E bɛ mun de miiri u ka o walew ko la?
Yuhana 13:34, 35 ani 17:16 kalan. O kɔ aw ka baro kɛ nin ɲininkaliw kan:
E hakili la, Jehova bɛ kɛ cogo di ni diinɛw ye u sen don kɛlɛ la?
Diinɛ nkalonmaw ye ko jugu caman kɛ. I ye fɛn jumɛnw de ye minnu fɛ diinɛw tɛ ka Ala ka kanuya ladege?
Diinɛ nkalonmaw tɛ ka Ala ka kanuya waleya
6. Ala b’a fɛ ka mɔgɔw hɔrɔnya ka bɔ diinɛ nkalonmaw la
Jirali 18:4a kalan, o kɔ aw ka baro kɛ nin ɲininkali kan:
K’a dɔn ko Ala b’a fɛ ka mɔgɔw dɛmɛ diinɛ nkalonmaw ye minnu lafili, o bɛ mun kɛ i la?
7. Ta’a fɛ k’a ɲini ka Ala lakika dɔn
Diinɛ nkalonmaw bɛ ko jugu minnu fɔ ani u bɛ ko jugu minnu kɛ, yala olu ka kan ka nɔ bila i ka Ala yecogo la wa? Miiri denkɛ dɔ la min banna a fa ka laadilikan ɲumanw ma. O denkɛ bɛ so bila ani ka ko jugu caman kɛ. O denkɛ ka kɛwalew ko man di a fa ye. Mun na a tɛ kɛ hakilitigiyako ye ka denfa in jalaki a denkɛ murutilen ka kɛwalew kosɔn?
Yala a bɛ kɛ hakilitigiyako ye ka Jehova jalaki ani k’a dabila k’a ɲini k’a dɔn diinɛ nkalonmaw ka kɛwalew kosɔn wa?
MƆGƆ DƆW B’A FƆ KO: “Ne t’a fɛ ka Ala ko mɛn bawo diinɛw de bɛ ka na ni gɛlɛya caman ye.”
Yala e fana b’o de miiri wa?
Mun na diinɛ nkalonmaw ka kɛwalew man kan ka nɔ bila an ka Jehova yecogo la?
BAKURUBAFƆLI
Diinɛ nkalonmaw ye Ala tɔgɔ tiɲɛ u ka kalan nkalonmaw ni u ka kɛwale juguw fɛ. Ala bɛna diinɛ nkalonmaw halaki.
Seginnkanni
Diinɛ nkalonmaw bɛ ka mɔgɔw kalan fɛn minnu na ani u bɛ ka ko minnu kɛ, e bɛ mun de miiri olu ko la?
Jehova bɛ mun miiri diinɛ nkalonmaw ko la?
Ala bɛna mun de kɛ diinɛ nkalonmaw la?
NINNU LAJƐ
Diinɛ fanba ko man di Ala ye sira fila minnu fɛ, olu lajɛ.
“Yala diinɛw bɛɛ ye kelen ye wa? Yala u bɛɛ bɛ taa ni mɔgɔw ye Ala yɔrɔ wa?” (jw.org barokun dɔ)
Mun na Jehova b’a fɛ an ni mɔgɔ wɛrɛw ka to ka fara ɲɔgɔn kan walasa k’a bato?
“Yala nafa b’a la ka kɛ diinɛ labɛnnen kɔnɔ wa?” (jw.org barokun dɔ)
Kabini san kɛmɛ caman, diinɛw bɛ ka mɔgɔw kalan nkalonw la minnu b’a to mɔgɔw b’a miiri ko Ala t’a mago don an na ani ko a ka jugu. Tiɲɛ filɛ nin ye o nkalon saba ko la.
a Walasa k’a dɔn kun min na Jirali sɛbɛn bɛ kuma diinɛ nkalonmaw kan iko muso min tɔgɔ ye Babilonɛba, kunnafoni 1 lajɛ.