KALANSEN 8

Ɲɛjirali minnu bɛ mɔgɔ kalan

Matiyu 13:34, 35

BAKURUBAFƆLI: I ka mɔgɔ kalan cogo ɲɛ ka taa a fɛ ni ɲɛjirali nɔgɔmanw ye minnu bɛ baro diya i lamɛnbagaw ye ani ka u kalan yɔrɔ nafamaw la.

Ɲɛjirali nɔgɔmanw sugandi. I n’a fɔ Yesu, baara kɛ ni fɛn fitininw ye walasa ka fɛnbaw ɲɛfɔ, ani baara kɛ ni fɛn nɔgɔmanw ye walasa ka fɛn gɛlɛnw ɲɛfɔ. I kana fɛn nafantanw fara i ka ɲɛjirali kan walasa a faamuyali kana gɛlɛya. I bɛna ɲɛjirali sugu minnu ta, i jija olu ka bɛn tigitigi kalansira ma i bɛ ka min ɲɛfɔ, o la i lamɛnbagaw hakili tɛna ɲagami ni fɛnw ye minnu tɛ bɛn.

Kɛ jateminɛbaga ye. Fɛn minnu bɛ i lamini na olu kɔlɔsi, an ka krecɛn gafɛw kalan, ani karamɔgɔw minnu bɛ se kosɛbɛ olu lamɛn. I kɛtɔ ka olu kɛ, ɲɛjiraliw sɛbɛn i bɛ se ka baara kɛ ni minnu ye walasa ka i ka mɔgɔ kalan cogo ɲɛ ka taa a fɛ. O ɲɛjiraliw sɛbɛnnen mara i bolo.
I hakili to i lamɛnbagaw la. Ɲɛjiraliw sugandi minnu bɛ i lamɛnbagaw kun kan ani minnu bɛ diya u ye. I janto i ka ɲɛjiraliw la walasa u kana mɔgɔw degun walima ka digi u la.
Mɔgɔw kalan i ka barokun yɔrɔ koloma la. I sinsin ɲɛjiraliw kan minnu bɛ yɔrɔ kolomaw kan, kana i sinsin baro yɔrɔ fitiniw kan. Kana a to i lamɛnbagaw hakili ka to ɲɛjiraliw dɔrɔn na nka u hakili ka to kalansira fana na min bɛ bɔ ɲɛjirali la.