KALANSEN 4

Tɛmɛsiraw doncogo ɲuman

Matiyu 22:41-45

BAKURUBAFƆLI: I lamɛnbagaw hakili labɛn sani i ka tɛmɛsira kalan.

Kun min na i bɛ ka tɛmɛsira kalan, miiri o la. Tɛmɛsira kelen o kelen dontɔ, o kɛ cogo la min bɛna i lamɛnbaga dɛmɛ a k’a dɔn i b’a fɛ ka yɔrɔ koloma min labɔ o tɛmɛsira kɔnɔ.

Tɛmɛsira hukumu jateminɛ. Mɔgɔ min bɛ ka kuma tɛmɛsira kɔnɔ walima mɔgɔ min ye o Bibulu gafe sɛbɛn, i jija ka o tigi yɛrɛ de kofɔ wa i bɛ min fɔ o ka kɛ tiɲɛ yɛrɛyɛrɛ ye.
A jira ko an sinsinnen bɛ Bibulu de kan. Ni i bɛ ka kuma mɔgɔw fɛ minnu dalen bɛ Ala la, a jira u la ko Bibulu ye Ala ka Kuma ye, o cogo de la i bɛna a jira ko Bibulu de ye hakilitigiya bɛɛ la ɲuman sun ye.
Tɛmɛsira nege don i lamɛnbagaw la. Nininkali kɛ tɛmɛsira bɛna min jaabi di, kuma gɛlɛya dɔ kan tɛmɛsira bɛna min ɲɛnabɔ cogo fɔ, walima kuma sariyakolo dɔ kan ani ka o sanga ni Bibulu maana dɔ ye min ni o bɛ taa walasa ka i lamɛnbagaw dɛmɛ u ka i ka barokun faamu.

I lamɛnbagaw bɛ min dɔn ka ban barokun ani tɛmɛsira kan, i hakili to o la. Hali ni i lamɛnbagaw bɛ o tɛmɛsira dɔn, kuma o kan cogo la min bɛna u dɛmɛ u ka fɛn kuraw faamu ka bɔ o la.