KALANSEN 1

Ɲɛbilakuma min bɛ baara kɛ ka ɲɛ

Kɛwalew 17:22

BAKURUBAFƆLI: I ka ɲɛbilakuma ka kan ka baro nege don mɔgɔw la, k’a to a ka dɔn i ka barokun ye min ye, ani k’a jira i lamɛnbagaw la kun min na u ka kan ka u mago don barokun in na.

I BƐ SE KA O KƐ COGO MIN NA:

Baro nege don mɔgɔw la. Ɲininkali dɔ, kuma dɔ, ko kɛlen dɔ, walima kibaruya dɔ sugandi minnu bɛna a to i lamɛnbagaw ka u tulomajɔ i la.

Sani i ka a daminɛ, i hakili jagabɔ kosɛbɛ kow kan i lamɛnbagaw bɛ u mago don minnu na ani minnu bɛ u kun kan, o kɔ i ka ɲɛbilakuma kɛ ka bɛn o ma.
A ɲini k’a dɔn i ka barokun ye min ye. A ɲini ka a dɔn n’a y’a sɔrɔ ko i ka ɲɛbilakuma b’a to i lamɛnbagaw ka i ka barokun ni i ka kuntilenna faamuya ka jɛya.
A jira kun min na barokun in nafa ka bon. I bɛ min fɔ i jija o ka bɛn i lamɛnbagaw mago kɛrɛnkɛrɛnnenw ma. U ka kan k’a faamuya ka jɛya cogo min na barokun in bɛ se ka u yɛrɛ dɛmɛ.

Jɛmukan labɛntɔ, i yɛrɛ ɲininka: ‘Ko jumɛnw bɛ ne balimakɛw ni ne balimamusow kan?’ O kɔ, i ka ɲɛbilakuma kɛ ka bɛn u magow ma.