Yesu sara Golgota

Sarakalasebagaw kuntigiw tagara ni Yezu ye gofɛrɛnɛrɛ ka soo. Pilati y’u ɲininga ko: “Aw be cɛɛ nin jalaki mun le kama?” U ko: ‘A ko ale ye masa ye!’ Pilati ye Yezu ɲininga ko: “I ye zuwifuw ka masacɛ ye wa?” Yezu y’a jaabi ko: “Ne ka masaya te diɲɛ nin ta ye.”

O kɔ, Pilati tagara ni Yezu ye Galile mara kuntigi Erɔdi fɛ walisa k’a filɛ n’ale bena jalakiyɔrɔ sɔrɔ Yezu la. Erɔdi ma jalakiyɔrɔ sɔrɔ a la ani a y’a bila ka taga Pilati fɛ. O la, Pilati y’a fɔ jama ye ko: ‘Ne y’a ye ko jalakiyɔrɔ tɛ a la. Erɔdi fana m’a jalakikun ye. Ne bena a bila ka taga.’ Jama pɛrɛnna ko: ‘A faga! A faga!’ Sɔrɔdasiw ye Yezu bugɔ ni golokami ye, ka daji tu a kan ani k’a kuun bugɔ ni kala ye. U ye ŋɔni dan k’a la a kuun na i ko masafugulan. O kɔ, u tora k’a lɔgɔbɔ ko: “I dansɛ, zuwifuw ka masacɛ.” Pilati segira k’a fɔ jama ye ko: ‘Ne ma jalakiyɔrɔ si ye cɛɛ nin na.’ Nka, u pɛrɛnna ko: “A ka kan ka gwengwen lɔgɔ kan!” O kama, Pilati ye sira di ko sɔrɔdasiw ka taga Yezu gwengwe lɔgɔ kan.

U tagara ni Yezu ye yɔrɔ dɔ la min be weele ko Golgota. U y’a gwengwe lɔgɔ kan ani k’o lɔgɔ wuli k’a lɔ ni Yezu ye. Yezu ye delili kɛ ko: “N Faa, yafa u ma bari u be min kɛra, u m’o lɔn.” Mɔgɔw tora ka Yezu lɔgɔbɔ ko: “E k’i yɛrɛ kisi. N’i ye Ala Deen ye, i ka jigi ka bɔ gwengwenlɔgɔ kan.”

Kojugukɛla minw tun gwengwenin be a gɛrɛfɛ, olu kelen y’a fɔ a ye ko: “Matigi, n’i nana sigi i ka masaya la tuma min na, i k’i hakili to ne la.” Yezu y’a jaabi ko: “I bena kɛ ne fɛ arijana na.” Wulafɛ, dibi donna yɔrɔ bɛɛ fɔɔ ka lɛri saba kɛ. Yezu ka kalanden dɔw ni Yezu bamuso Mariyamu tora a gɛrɛfɛ. Yezu y’a fɔ Zan ye ko a k’a janto Mariyamu na i ko a yɛrɛ bamuso.

A laban, Yezu ko: “Koo bɛɛ dafara.” O kɔ, a y’a kuun biri duguma, ani a sara. O wagati la, dugukoloyɛrɛyɛrɛba dɔ kɛra. Faniba jamanjan min be Yɔrɔ Senuman ni Yɔrɔ Senuman senuman cɛ Alabatosoba kɔnɔ, o faranna fila. Sɔrɔdasiw kuntigi dɔ y’a fɔ ko: “Siga t’a la, cɛɛ nin tun ye Ala Deen ye.”