Piɛrɛ ko a tɛ Yesu dɔn

Ka Yezu n’a ka cidenw to sangaso kɔnɔ, a tun y’a fɔ u ye ko: ‘Bi suu nin na, aw bɛɛ bena boli ka ne to yen.’ Piyɛri tun ko: ‘Ne kɔni tɛ! Hali ni bɛɛ bolila, ne kɔni tɛna boli fewu.’ Nka Yezu y’a fɔ Piyɛri ye ko: ‘Sanni dondo ka kasi, i bena a fɔ siɲɛ saba ko i tɛ ne lɔn.’

Tuma min na sɔrɔdasiw ye Yezu minɛ ka taga n’a ye Kayifu ka soo, o y’a sɔrɔ cidenw fanba bolila. Nka ciden fila donna jama cɛma ka tugu Yezu kɔ. U dɔ ye Piyɛri ye. A tagara don Kayifu ka luu kɔnɔ ani k’a fari ja tasuma gɛrɛfɛ. Muso dɔ, min tun ye baarakɛden ye, ale ye Piyɛri ɲɛda ye tasuma yeelen na ani a ko: ‘ N’ be ele lɔn! I ni Yezu tun be ɲɔgɔn fɛ!’

Piyɛri ko: ‘Tiɲɛn tɛ! I be min fɔra, ne t’o kala ma!’ A tagara lɔ luda la. A ma mɛɛn, muso dɔ wɛrɛ y’a ye. Ale fana tun ye baarakɛden ye. A y’a fɔ jama ye ko: ‘Cɛɛ nin ni Yezu tun be ɲɔgɔn fɛ!’ Piyɛri ko: ‘Ne tɛ Yezu lɔn hali dɔɔni!’ Cɛɛ dɔ ko: ‘I ye a ka kalanden dɔ ye! I kumacogo b’a yira ko i be bɔ Galile, i ko Yezu.’ Nka Piyɛri kalila ko: ‘Ne t’a lɔn!’

O yɔrɔnin bɛɛ, dondo kasira. Yezu yɛlɛmana ka Piyɛri filɛ ani u ɲɛɛw bɛnna. Piyɛri hakili jigira Yezu ka kumaw na. A bɔra kɛnɛma ka kasi kosɔbɛ.

O wagati kelen na, Yahutuw ka kititigɛlaw jɛnkulu ye ɲɔgɔn lajɛn Kayifu ka soo walisa ka kiti tigɛ Yezu kan. U y’a latigɛ ka ban ka Yezu faga. Sisan, u tun b’a ɲinina le ka kuun sɔrɔ o la. Nka u tɛ sera k’o kuun sɔrɔ. A laban, Kayifu sinna ka Yezu ɲininga ko: ‘I ye Ala Dencɛ ye wa?’ Yezu ko: ‘Ɔnhɔn!’ Kayifu ko: ‘An mako tɛ kuun wɛrɛ la tugun. A ye Ala nɛni!’ Kititigɛlaw bɛɛ ko: ‘A ka kan ka faga.’ U ye Yezu fata, ka daji tu a kan. U y’a ɲaa siri, k’a bugɔ ani k’a fɔ ko: ‘N’i ye kira ye, a fɔ mɔgɔ min y’i bugɔ!’

O dugusagwɛ, u tagara ni Yezu ye u ka kititigɛsoba la k’a ɲininga tugun ko: ‘I ye Ala Dencɛ ye wa?’ Yezu y’u jaabi ko: ‘Aw yɛrɛ b’a fɔra ko n’ ye Ala Dencɛ ye.’ O tuma na, u ye kiti ben a kan ko a ye Ala nɛni. U y’a minɛ ka taga n’a ye Ɔrɔmu gofɛrɛnɛrɛ Pɔnsi Pilati fɛ. Mun lo kɛra o kɔ? An bena o lo lajɛ.