Jehova ye Jeremi ci ka taa waajuli kɛ

Jehova ye Zeremi sugandi k’a kɛ kira ye Zuda mɔgɔw fɛ. A y’a fɔ Zeremi ye ko a ka kuma jama fɛ ani k’u lasɔmi ko u k’u ka koo juguw dabila. Zeremi ko: ‘Jehova, ne ye denmisɛn ye do. Ne t’a lɔn ne bena kuma jama fɛ cogo min na.’ Jehova y’a fɔ a ye ko: ‘Kana siran. Ne bena a yira i la i ka ɲi ka min fɔ. Ne bena i dɛmɛ.’

Jehova y’a fɔ Zeremi ye ko a ka dugu cɛkɔrɔbaw lajɛn, ka daga ci u ɲɛɛ na ani k’a fɔ ko: ‘Zeruzalɛmu bena halaki i ko daga nin.’ Zeremi ye Jehova ka cii dafa ka ban dɔrɔn, cɛkɔrɔbaw dimina kosɔbɛ. Sarakalasebaga dɔ, min be weele ko Pasuri (Pasewuri), a ye Zeremi bugɔ ani a y’a minɛ k’a bolo n’a seenw don yirikuru la. Zeremi tora a nɔɔ na suu kuru bɛɛ la. O dugusagwɛ, Pasuri y’a bɔ yirikuru la. Zeremi ko: ‘A ka ɲi ten. Ne tɛna waajuli kɛ tugun.’ Nka a ye waajuli dabila tiɲɛn na wa? Ayi. Baara min kalifara a ma, a segira ka miiri o la tuma min na, a ko: ‘Jehova ka kuma be n’ kɔnɔ i n’a fɔ tasuma. N’ tɛ se ka waajuli dabila.’ Zeremi tora ka mɔgɔw lasɔmi.

Saan caaman tɛmɛnin kɔ, Sedesiyasi kɛra Zuda masacɛ ye. Zeremi ka kumaw tun man di sarakalasebagaw ni ngalon kiraw ye. U y’a fɔ kuntigiw ye ko: ‘Nin cɛɛ ka kan ka faga.’ Zeremi ko: ‘ N’aw ye ne faga, aw ye mɔgɔ jalakibali lo faga. Ne be Jehova ka kumaw lo fɔra, ne ka kumaw tɛ.’ Kuntigiw y’o mɛn minkɛ, u ko: ‘Nin cɛɛ man kan ka faga.’

Zeremi tora ka waajuli kɛ ani o tun be kuntigiw tɔɔrɔla kosɔbɛ. U y’a ɲini masacɛ fɛ a ka Zeremi faga. Sedesiyasi ko u be min fɛ, u k’a kɛ. U ye Zeremi minɛ k’a fili dingɛ dunba dɔ kɔnɔ pɔtɔpɔtɔ be min na. U tun b’a miirila ko a bena sa o yɔrɔ la. Zeremi y’a daminɛ ka jigi pɔtɔpɔtɔ kɔnɔ.

O tuma na, masacɛ ka soo kɔnɔ baara kuntigi dɔ min tɔgɔ ko Ebɛd melɛk, ale tagara a fɔ masacɛ ye ko: ‘Kuntigiw ye Zeremi fili dingɛ kɔnɔ! N’a tora yen, a bena sa.’ Sedesiyasi ko Ebɛd melɛk ka taga ni cɛɛ 30 ye walisa ka Zeremi sama ka bɔ o dingɛ kɔnɔ. Zeremi m’a to foyi k’a bali ka waajuli kɛ. An ka ɲi ka kɛ komi ale. Tiɲɛn tɛ?