Paul balimamuso denkɛ ja tun ka gɛlɛn

Kamalennin min kɛra sababu ye ka a bɛnkɛ Ni kisi, a ɲini ka o dɔn. O kamalennin bɛnkɛ tun ye ciden Paul ye. An tɛ kamalennin in tɔgɔ dɔn, nka an b’a dɔn ko a ye fɛn dɔ kɛ min bɛ jagɛlɛyaba jira. A ye min kɛ yala i b’a fɛ ka o dɔn wa?​​—⁠

Paul tun bɛ kaso la Jerusalɛm. A tun minɛna ka d’a kan a tun bɛ ka waajuli kɛ Yesu ko la. Cɛ dɔw tun bɛ Paul kɔniya, o de la u ye jɛ jugu siri a kama. U y’a fɔ ko: ‘An ka a ɲini sɔrɔdasi ɲɛmɔgɔ fɛ a k’a fɔ a ka sɔrɔdasiw ye ko u ka na ni Paul ye dukɛnɛ na. An bɛna an dɔgɔ, ni u bɛna tɛmɛ ni Paul ye an bɛ a faga!’

Paul balimamuso denkɛ ye o bɛnbɛnbɛn mɛn. A tun ka kan ka mun kɛ? A taara kasobon kɔnɔ ka o ko fɔ Paul ye. O yɔrɔnin bɛɛ, Paul ye a fɔ a ye ko a ka taa o jɛ jugu ko fɔ sɔrɔdasi ɲɛmɔgɔ ye. Yala e ka miiri la a tun ka nɔgɔn Paul balimamuso denkɛ bolo ka kuma sɔrɔdasi ɲɛmɔgɔ fɛ wa?​​— Ayi, bawo sɔrɔdasi ɲɛmɔgɔ tun ye mɔgɔba de ye. Nka o bɛɛ n’a ta Paul balimamuso denkɛ ja tun ka gɛlɛn ani a kumana ɲɛmɔgɔ in fɛ.

Ɲɛmɔgɔ in ye a dɔn tigitigi, a bɛna min kɛ. A taara ni sɔrɔdasi 500 ye walasa ka Paul lakana! A ko k’u ka Paul ta ka taa ni a ye Sesare o don su bɛɛ. Yala Paul Ni kisira wa?⁠— Ɔwɔ, o cɛ kojugukɛla ninnu ma se k’a sɔrɔ! U ka jɛ jugu ma se ka waleya.

I bɛ kalansira jumɛn sɔrɔ ka bɔ nin maana in na?⁠​— I fana bɛ se ka kɛ jagɛlɛn ye i n’a fɔ Paul balimamuso denkɛ. An mago bɛ jagɛlɛya la ni an bɛ kuma mɔgɔ wɛrɛw fɛ Jehova ko la. Yala i bɛna i ja gɛlɛya ani ka taa a fɛ ka kuma Jehova ko la wa?​​— Ni i bɛ o kɛ, i bɛna se ka mɔgɔ wɛrɛw Ni kisi.