U ye sɛbɛnni kɛ Yesu kan

Yala cɛ minnu bɛ ja in kan i ɲɛ bɛ olu la wa?​​— Matiyu, Marka, Luka, Yuhana, Piɛrɛ, Yakuba, Jude ani Paul de bɛ ja in kan. Nin cɛ ninnu bɛɛ ye ɲɛnamaya kɛ Yesu ka waati la, ani u ye sɛbɛnni kɛ Yesu kan. An ka a ɲini ka cɛ ninnu dɔn ka ɲɛ.

Mɔgɔ saba tun bɛ u la, olu tun ye cidenw ye minnu ye waajuli kɛ ni Yesu ye. Yala i bɛ o mɔgɔ saba dɔn wa?​​— Matiyu, Yuhana ani Piɛrɛ. Ciden Matiyu ani Yuhana, olu tun bɛ Yesu dɔn kosɛbɛ, ani u kelen–kelen bɛɛ ye gafe dɔ sɛbɛn Yesu ka ɲɛnamaya kan. Ciden Yuhana ye gafe dɔ fana sɛbɛn min tɔgɔ ye ko Jirali ani lɛtɛrɛ saba ni olu tɔgɔ ye Yuhana ka sɛbɛn fɔlɔ, Yuhana ka sɛbɛn filanan, ani Yuhana ka sɛbɛn sabanan. Ciden Piɛrɛ ye lɛtɛrɛ fila sɛbɛn minnu bɛ Bibulu kɔnɔ. Olu tɔgɔ ye Piɛrɛ ka sɛbɛn fɔlɔ ani Piɛrɛ ka sɛbɛn filanan. A ka lɛtɛrɛ filanan kɔnɔ, waati min na Jehova kumana ka bɔ sankolo la ani k’a fɔ Yesu ko la ko: ‘Nin ye ne denkɛ ye, ne ye a kanu, a ko ka di ne ye haali’, Piɛrɛ ye sɛbɛnni kɛ o kan.

Cɛ wɛrɛw bɛ ja in kan minnu fana ye an kalan Yesu ko la, u ka sɛbɛnw kɔnɔ. Olu dɔ la kelen ye Marka ye. A bɛ se ka kɛ ale tun bɛ yen waati min na Yesu minɛna ani fɛn o fɛn min kɛra a ye o ye. O cɛw dɔ la kelen tun ye Luka ye. Ale tun ye dɔgɔtɔrɔ ye ani a bɛ se ka kɛ a kɛra krecɛn ye Yesu salen kɔ.

I ɲɛ bɛ Bibulu sɛbɛnbaga fila wɛrɛ minnu na ja kan, olu tun ye Yesu dɔgɔninw ye. Yala i bɛ u tɔgɔw dɔn wa?​​— U tɔgɔw ye Yakuba ani Jude. A daminɛ na u tun ma da Yesu la. U tun y’a miiri yɛrɛ ko fatɔ don. Nka kɔfɛ, u dara Yesu la ani u kɛra krecɛnw ye.

I ɲɛ bɛ Bibulu sɛbɛnbaga laban min na ja kan o ye Paul de ye. Sani a tun ka kɛ krecɛn ye, a tɔgɔ tun ye Saul. A tun bɛ krecɛnw kɔniya ani a tun ka jugu kosɛbɛ u ma. Yala i b’a dɔn min y’a to Paul kɛra krecɛn ye wa?​​— Don dɔ la, ka Paul to dugu taga la, a y’a mɛn mɔgɔ dɔ bɛ ka kuma a fɛ ka bɔ sankolo la. O tun ye Yesu de ye! A ye Paul ɲininka: ‘Mɔgɔ minnu dalen bɛ ne la, mun na i ka jugu olu ma tan cogo la?’ O kɛlen kɔ, Paul yɛlɛmana ani a kɛra krecɛn ye. Paul ye Bibulu gafe 14 sɛbɛn, k’a ta Romɛkaw la fo ka taa bila Heburuw la.

Yala an tɛ Bibulu kalan don o don wa?​​— Ni an bɛ Bibulu kalan an bɛna fɛn caman dɔn Yesu kan. Yala i b’a fɛ ka fɛn caman dɔn Yesu kan wa?​​—