Gundo min dɔnni bɛna an nisɔndiya

Yala mɔgɔ dɔ delila ka gundo dɔ fɔ i ye wa?​—a Bibulu bɛ kuma ‘gundo kɛrɛnkɛrɛnnen’ dɔ ko la. O ye gundo kɛrɛnkɛrɛnnen ye ka d’a kan a bɔra Ala yɔrɔ. Gundo don ka d’a kan mɔgɔw tɛ a dɔn. Hali mɛlɛkɛw b’a fɛ ka fɛn caman dɔn o gundo ko la. Yala a ka di e ye k’a dɔn o gundo ye min ye wa?​—

A mɛna, Ala ye cɛ fɔlɔ ani muso fɔlɔ da. Olu tɔgɔ tun ye Hadama ani Hawa ye. Ala ye so ɲumanba di u ma min tɔgɔ tun ye Edɛn nakɔtu. Ni Hadama ni Hawa tun ye Ala kan minɛ, olu ni u denw tun bɛna dugukolo bɛɛ kɛ alijinɛ ye i n’a fɔ nakɔtu in tun bɛ cogoya min na. Wa u tun bɛna ɲɛnamaya kɛ badaa o alijinɛ kɔnɔ. Nka yala i hakili b’a la Hadama ni Hawa ye min kɛ wa?​—

Hadama ni Hawa ma Ala kan minɛ, wa o de kama an tɛ alijinɛ kɔnɔ bi. Nka Ala y’a fɔ ko a bɛna dugukolo yɔrɔ bɛɛ kɛ yɔrɔ cɛɲumanba ye, ani ko mɔgɔw bɛɛ bɛna ɲɛnamaya kɛ badaa o yɔrɔ la nisɔndiya kɔnɔ. A bɛna o kɛ cogo di? Fɔlɔ fɔlɔ la, mɔgɔw tun tɛ o jaabi dɔn. O tun ye gundo ko ye.

Tuma min na Yesu nana dugukolo kan, a ye mɔgɔw kalan fɛn caman na o gundo ko la. A y’a fɔ ko o gundo tun bɛ Ala ka Masaya de kan. Yesu y’a fɔ ko mɔgɔw ka delili kɛ walisa Ala ka Masaya ka na. O masaya bɛna dugukolo kɛ alijinɛ cɛɲumanba ye.

Yala e kɔrɔtɔlen don ka o gundo dɔn wa?⁠— I hakili to a la ko mɔgɔ minnu bɛ Jehova kan minɛ olu dɔrɔn de bɛna ɲɛnamaya kɛ o alijinɛ kɔnɔ. Bibulu bɛ kuma maana caman kan, minnu bɛ kuma cɛw ani musow kan minnu ye Jehova kan minɛ. Yala i b’a fɛ ka olu dɔn wa?​— An k’a lajɛ o mɔgɔ dɔw tun bɛ cogoya min na ani an bɛ se ka u ladege cogoya min na.