An ka gafew bɛ sɛbɛn ani k’u bayɛlɛma cogo di?

Walasa ka se ka “Kibaru Duman” fɔ “dugukolo kan mɔgɔw ye, siyaw bɛɛ ni bɔnsɔnw bɛɛ ni kanw bɛɛ ani mɔgɔ sifaw bɛɛ” ye, an bɛ gafew bɔ kan 750 ni kɔ de la. (Jirali 14:6) An bɛ o dakabanako kɛ cogo di? O bɛ kɛ sɛbɛnnikɛ ekipu fɛ diɲɛ bɛɛ mɔgɔ dɔ bɛ min kɔnɔ ani bayɛlɛmalikɛla kuluw fɛ minnu bɛ u yɛrɛ di kosɛbɛ, ni u bɛɛ ye Jehova Seerew ye.

An ka sɛbɛn bɛ dilan angilɛ kan de la. Jehova Seerew ka Jɛkulu sigiyɔrɔba kɔnɔ, baarada min ka baara ye ka sɛbɛnni kɛ, Ɲɛmɔgɔ kulu bɛ o baarada ɲɛminɛ. Sɛbɛnnikɛlaw minnu bɛ Jɛkulu sigiyɔrɔba kɔnɔ ani filiali dɔw kɔnɔ, o baarada de bɛ olu ka baara ɲɛminɛ. Sɛbɛnnikɛ ekipu kɔnɔ diɲɛ bɛɛ mɔgɔ dɔ bɛ yen, o b’a to baara bɛ kɛ barokunw kan minnu ka di mɔgɔ sugu bɛɛ ye.

O angilɛ sɛbɛn in bɛ sɔrɔ ka ci bayɛlɛmalikɛlaw ma. Baara kɛlen kɔ sɛbɛn in kan ani sɔn mana kɛ a ma, sɛbɛn in bɛ bila ka taa diɲɛ fan bɛɛ ordinatɛri fɛ k’a di an ka bayɛlɛmalikɛlaw ma, ni olu ye ekipuw ye, olu bɛ sɔrɔ ka sɛbɛn in bayɛlɛma, ni u tila la o la, u bɛ segin k’a lajɛ ni fili ma kɛ a kɔnɔ ani u bɛ labɛnniw kɛ u ka bayɛlɛmaliw kan. U bɛ u jija ka “tiɲɛ kumaw fɔ ka jɛya” ka kɛɲɛ ni angilɛ kɔrɔ yɛrɛ yɛrɛ ye u ka kan na.—Waajulikɛla 12:12.

Ordinatɛriw b’a to baara bɛ teliya. Ordinatɛri tɛ se ka bila sɛbɛnnikɛlaw walima bayɛlɛmalikɛlaw nɔ na. Nka, dikitiɔnɛri ani ɲininikɛ minɛnw minnu b’a kɔnɔ walasa bayɛlɛmali ka nɔgɔya, o bɛ baara teliya. Ka fara o kan, ordinatɛri kɔnɔ, Jehova Seerew ye baarakɛ minɛn dɔ dilan ni o ye (MEPS) ye, o b’a to baara bɛ se ka kɛ sɛbɛn kan, kan kɛmɛ ni kɔ la, ka jaw fara sɛbɛn ninnu kan ani ka u dilan walasa u ka se ka bɔ iko gafew.

Mun na an bɛ nin cɛsiriba kɛ, hali k’a sɔrɔ kan dɔw bɛ yen, mɔgɔ ba damadɔ de bɛ olu kanw fɔ? An b’o kɛ ka d’a kan Jehova sago ye “mɔgɔw bɛɛ ka kisi ka se ka tiɲɛ dɔn.”—1 Timote 2:3, 4.

• An ka gafew bɛ sɛbɛn cogo di?

• Mun na an bɛ an ka gafew bayɛlɛma nin kan camanba ninnu na?