An ka masaya waajulibaara labɛnnen bɛ cogo di?

Sani a ka sa, Yesu y’a fɔ ko: “Nin Kibaru Duman waajuli na kɛ diɲɛ yɔrɔw bɛɛ la sankolo masaya ko la ka kɛ siyaw bɛɛ seere ye. O kɔ, a laban na se.” (Matiyu 24:14) Nka cogo jumɛn na nin waajulibaara tun bɛna se ka kɛ diɲɛ yɔrɔ bɛɛ la? An kɛtɔ ka tugu Yesu ka ɲɛjiralan kɔ waati min na a tun bɛ dugukolo kan.—Luka 8:1.

An bɛ taa bɔ mɔgɔw ye u ka duw kɔnɔ. Yesu ye a ka kalandenw dege kibaru duman waajuli kɛli la du ni du kɔnɔ. (Matiyu 10:11-13; Kɛwalew 5:42; 20:20) Yɔrɔ kɛrɛnkɛrɛnnenw tun bɛ Krecɛn fɔlɔw bolo u tun ka kan ka waajuli kɛ yɔrɔ minnu na. (Matiyu 10:5, 6; 2 Kɔrɛntekaw 10:13) O cogo kelen na, bi an fana ka waajulibaara labɛnnen bɛ ka ɲɛ, yɔrɔ dilen bɛ jɛkulu kelen kelen bɛɛ ma u ka baara kɛ a kɔnɔ. O cogo la, Yesu ye cikan min di an ma, ni o ye ka “mɔgɔw waaju” ani ka seereya kɛ, an bɛ se ka o kɛ k’a dafa.—Kɛwalew 10:42.

Waajuli kɛcogoya wɛrɛw bɛ an bolo walisa ka mɔgɔw sɔrɔ. Yesu ye o misali di, a kɛtɔ ka waajuli kɛ jamamayɔrɔw la, yɔrɔ o yɔrɔ a bɛ se ka mɔgɔw sɔrɔ yɔrɔ minnu na, i n’a fɔ kɔgɔjida la walima kɔlɔndaw la. (Marka 4:1; Yuhana 4:5-15) An bɛ tugu a ka misaliya kɔ, an kɛtɔ ka barokɛ ni mɔgɔw ye Bibulu kan, an bɛ se ka o kɛ yɔrɔ o yɔrɔ, i n’a fɔ kare kɔnɔnaw na, mɔgɔ ka baarakɛ yɔrɔw la, mɔgɔw lafiya yɔrɔw la, o ni a ɲɔgɔnnaw. An bɛ baara kɛ fana ni telefɔni ye. Ni a se dira an ma, an bɛ senfɛ seereya di an sigiɲɔgɔnw, an baarakɛ ɲɔgɔnw, an teriw ani an ka denbaya kɔnɔ mɔgɔw ma. Nin cɛsiriba ninnu bɛɛ sababu fɛ, mɔgɔ miliyɔn caman diɲɛ yɔrɔ bɛɛ la ye “kisili kɛwalew welewele da” kan mɛn.—Zaburu 96:2.

A ka di i ye ka Ala ka masaya kibaru duman fɔ jɔni ye ani o kɔrɔ ye min ye u ka siniɲɛsigi kan? Kana i makun nin jigiya kuma kan, ni i bɛ se kuma o ko la.

• “Kibaru duman” jumɛn de ka kan ka welewele da?

• Jehova Seerew bɛ tugu Yesu ka misali jumɛn kɔ?