Mun na an bɛ lajɛbaw kɛ?

Mun na nin mɔgɔ ninnu nisɔndiyalen don? U b’an ka lajɛba dɔ de kɛnɛ kan. I n’a fɔ lawale la, a tun ɲininnen bɛ Ala ka baarakɛlaw fɛ, u ka ɲɔgɔn dalajɛ siɲɛ saba san kɔnɔ cogo min na, an b’an ka lajɛbaw makɔnɔ ni kɔrɔtɔ ye. (Dutɛrɔnɔmɛ 16:16) San o san, an bɛ o lajɛ sugu saba de kɛ: tile kelen lajɛba fila ani tile saba lajɛba. Nin lajɛ ninnu bɛ nafa jumɛn lase an ma?

U bɛ dɔ fara an ka balimaya jɛɲɔgɔnya kan. I n’a fɔ Israɛlkaw tun bɛ nisɔndiya ka Jehova tanu “jama cɛma” cogoya min na, an fana bɛ a bato ni o nisɔndiya kelen de ye an ka lajɛw tuma la. (Zaburuw 26:12; 111:1) Lajɛ ninnu bɛ kɛ sababu ye an ni Jehova Seere wɛrɛw bɛ ɲɔgɔn kunbɛn ka bɔ jɛkulu wɛrɛw la, walima yɛrɛ ka bɔ jamana wɛrɛw la. Lafiyɛn waati la, an bɛ dumuni kɛ ɲɔgɔn fɛ, o min bɛ o waati kɛ teriya waati duman ye. (Kɛwalew 2:42) Nin alako kɛnɛ kan, kanuya min bɛ “balimaw” cɛ diɲɛ bɛɛ kɔnɔ, an b’o ye.—1 Piɛrɛ 2:17.

U b’a to an bɛ taa ɲɛ alako ta fan fɛ. Israɛlkaw tun bɛ nisɔndiya fana ka d’a kan ɲɛfɔli tun bɛ kɛ Sɛbɛn minnu kan, u ye olu “faamu”. (Nehemi 8:8, 12) I n’a fɔ olu cogo, an bɛ Bibulu kalan min sɔrɔ an ka lajɛbaw la, olu ka di an ye. A porogaramu kelen o kelen barokun sinsinnen bɛ Bibulu kan. Jɛmukanw ni ɲɛjiralanw sababu fɛ, an bɛ dege Ala sago kɛli la an ka ɲɛnamaya kɔnɔ. Ka fara o kan, mɔgɔ minnu selen bɛ ka krecɛnya sira taama nin waati gɛlɛn ninnu na, olu ka seereya bɛ dusu don an kɔnɔ. An ka tile saba lajɛba la, theatiriw bɛ kɛ Bibulu maanaw kan ani o bɛ kɛ sababu ye ka kalansiraw di an ma. Lajɛba kelen o kelen na, batɛmuw bɛ labɛn mɔgɔw ye minnu ba fɛ k’a jira ko u ye u yɛrɛbakun di Ala ma.

• Mun na an ka lajɛbaw ye nisɔndiya waatiw ye?

• Lajɛba bɛ nafa jumɛn lase i ma?