Cogo jumɛn na an bɛ se k’an labɛn ka ɲɛ lajɛw kama?

Ni aw bɛ Bibulu kalankɛ ni Jehova Seere dɔ ye, siga t’a la, aw bɛ aw jija ka aw ka kalan labɛn sani a ka kɛ. A ka fisa an ka o ɲɔgɔn kelen kɛ sani an ka taa lajɛ kɛyɔrɔ la, walisa ka nafa caman sɔrɔ lajɛ la. Min ka ɲi, o ye an k’an ka lajɛw labɛn waati boloda ka ɲɛ.

An kɛtɔ ka waati ɲuman ani kɛyɔrɔ ɲuman sugandi. Waati jumɛn na i bɛ se ka kalan kɛ ka ɲɛ? Sɔgɔma sani an ka baara daminɛ walima su fɛ denmisɛnw dalen kɔ? Hali n’a y’a sɔrɔ i tɛ se ka waati jan kɛ kalan na, a latigɛ i bɛna waati hakɛ min kɛ o kalan na ani ka kɛɲɛ ni i seko bɛɛ ye, foyi kana i ka o waati bolodalen tiɲɛ. Yɔrɔ ɲini min masumalen don, fɛn min bɛ se ka i ɲɛnajɛ i n’a fɔ arajɔ, telewisiɔn, telefɔni olu faga. Delili kɛ sani i ka kalan daminɛ, o bɛna i dɛmɛ ka i hakili bɔ tile mumɛ gɛlɛyaw la ani haminankow kan, o bɛna a to i bɛ i sinsin Ala ka kuma kan.—Filipekaw 4:6, 7.

An kɛtɔ ka daɲɛ kolomaw kɔrɔ ci ani ka an labɛn jaabi di kama. A daminɛ k’a ɲini ka faamuyaliba kelen sɔrɔ barokun kan. I hakilijagabɔ kalan barokun kan walima tilayɔrɔ kan, jɛɲɔgɔnya min bɛ kalan barokun ni tilayɔrɔ ni ɲɔgɔn cɛ o ɲini. Jaw lajɛ. Seginkanni ɲininkaliw kalan o min bɛ kalan kolomayɔrɔw kan. O kɔ dakun kelen-kelen bɛɛ kalan ani ka ɲininkali jaabi ɲini. Tɛmɛsiraw minnu dilen bɛ olu kalan ani jɛɲɔgɔnya min bɛ u ni barokun cɛ, o ɲini. (Kɛwalew 17:11) Ni i ye dakun ka ɲininkali jaabi sɔrɔ, o kɔrɔ ci walima kumaden ɲɛgɛn minnu bɛna i dɛmɛ ka jaabi di. Ni a ka di i ye, lajɛ waati la i bɛ se ka i bolo wili ka jaabi surun dɔ di i yɛrɛ ka ɲɛfɔ cogow la.

I bɛ kalan min kɛ dɔgɔkun o dɔgɔkun ni i bɛ o barokunw sɛgɛsɛgɛ lajɛw la, i bɛ kɔnɔkisɛ kuraw fara i ka Bibulu dɔnniya kan n’o bɛ i ko nafolo.—Matiyu 13:51, 52.

• I bɛ se ka waati bolodali jumɛn bila sen na walisa ka lajɛw labɛn?

• Cogo jumɛn na i bɛ se ka jaabi labɛn lajɛ dɔ kama?