Mun bɛ kɛ an ka lajɛw la?

San kɛmɛ fɔlɔ krecɛnw lajɛw tun tɛ fɛn kelen kan min bɛ kɛ tuma bɛɛ. Nka o lajɛw kɔnɔna na dɔnkiliw, deliliw, kalanjɛ ani barow tun bɛ kɛ Bibulu tɛmɛsiraw kan. (1 Kɔrɛntekaw 14:26) An ka lajɛw fana bɛ kɛ o cogo la bi.

Kalan nafama min sinsinnen bɛ Bibulu kan. Sibiridonw walima karidonw na, jɛkulu kelen-kelen bɛɛ bɛ ɲɔgɔn dalajɛ walasa ka Bibulu jɛmukan lamɛn miniti 30 kɔnɔ, o min bɛ a jira nafa min bɛ Bibulu la ka ɲɛsin an ka ɲɛnamaya ma ani ka ɲɛsin an ka nin waatiw ma. A ɲininnen bɛ bɛɛ fɛ, Bibulu tɛmɛsiraw minnu bɛ kofɔ, u ka olu ta, u yɛrɛw ka Bibulu kɔnɔ. O jɛmukan kɔfɛ, a ɲininnen bɛ jɛkulu fɛ u ka u sen don “La Tour de Garde” kalan na. O baro min bɛ kɛ lɛrɛ kelen kɔnɔ, ni o bɛ kɛ ni La Tour de Garde sɛbɛn ye, min bɛ kalan o waati la, o bɛ an dɛmɛ ka Bibulu sariyakolow waleya an ka ɲɛnamaya kɔnɔ. O sɛbɛn kelen bɛ sɛgɛsɛgɛ an ka jɛkulu 110 000 ni kɔ kelen-kelen bɛɛ fɛ diɲɛ yɔrɔ bɛɛ la.

An bɛ labɛn mɔgɔ kalanni kama. An bɛ ɲɔgɔn dalajɛ fana dɔgɔkun don kelen wuladafɛ, walasa ka kalan suguya saba kɛ ni olu ye An ka krecɛnya ni an ka waajulibaara ye, ni o sinsinnen bɛ fɛnw kan minnu bɛ sɔrɔ Krecɛnya ni waajulibaara lajɛ sɛbɛn kɔnɔ ni o ye sɛbɛn ye min bɛ bɔ kalo o kalo. O lajɛ bɛ daminɛ ni Ala ka Kuma nafolomafɛnw ye ni o bɛ an dɛmɛ an ka Bibulu yɔrɔ dɔ faamu ka ɲɛ jɛkulu ye o min kalan sani o waati cɛ. O kɔ, I dege waajulibaara la yɔrɔ bɛ daminɛ, o yɔrɔ kɔnɔna na, ɲɛjiraliw bɛ kɛ minnu bɛ a jira cogo min na baro bɛ se ka kɛ ni mɔgɔ wɛrɛw ye Bibulu kan. O kɔ min bɛ o kalanso ɲɛminɛ, ale bɛ laadilikan damadɔ di walasa ka kalandenw dɛmɛ u ka taa ɲɛ u ka kalan kɛ cogo la ani u ka kuma kɛcogo la. (1 Timote 4:13) Lajɛ sɛbɛn yɔrɔ laban na ni o ye An ka ɲɛnamaya kɛ iko krecɛnw, o yɔrɔ bɛ kuma Bibulu sariyakolow waleya cogo ɲuman kan an ka don o don ɲɛnamaya kɔnɔ. O bɛ kɛ ni ɲininkaliw ni jaabiw ye, olu minnu dabɔlen bɛ ka dɔ fara an ka Bibulu faamuyali kan.

An ka lajɛw waati la, an bɛ Bibulu kalan ɲuman min sɔrɔ, o bɛna aw dabali ban.—Esayi 54:13.

• Jehova Seerew ka lajɛw bɛ kɛ cogo di?

• A ka di i ye ka na lajɛ jumɛn na fɔlɔ?