Bibulu tiɲɛw dɔnna kokura cogo di?

Bibulu tun y’a fɔ ko Krisita ka saya kɔfɛ, karamɔgɔw nkalonmaw bɛna ye krecɛn fɔlɔw cɛma ani ko olu bɛna Bibulu tiɲɛw yɛlɛma. (Kɛwalew 20:29, 30) Wa o de kɛra tigitigi. Hakilinan minnu tɛ krecɛn hakilinanw ye, olu ɲagamina Yesu ka kalan na, o kɛra sababu ye krecɛnya suguya wɛrɛ ka kɛ yen min ma ɲi. (2 Timote 4:3, 4) O la, cogo jumɛn na an bɛ se ka d’a la, k’an ka sisan faamuyali, Bibulu bɛ min fɔ tigitigi ko la, o ye tiɲɛ ye?

Waati tun sera walasa Jehova ka tiɲɛ bɔ kɛnɛ kan. Jehova tun y’a fɔ ko “waati latigɛlen na dɔnniya kow na caya.” (Daniɛl 12:4) San 1870, kulu dennin dɔ, tiɲɛ dɔnni tun ka di minnu ye, olu y’a faamu ko kalansira caman min tun bɛ bɔ diinɛw yɔrɔ, o ni Bibulu kɔnɔ taw tun bɛ fɔ ɲɔgɔn kɔ. O la, olu y’a ɲini k’a dɔn Bibulu kalansiraw tun ye min ye kabini a dilan tuma. Jehova ye u dɛmɛ o la.

U ye sɛgɛsɛgɛli dunnen daminɛ Bibulu kan. Kalankɛ cogo dɔ tun bɛ Bibulu kalanbagaw la, an bɛ baara kɛ ni min ye hali bi. U tun bɛ Bibulu sɛgɛsɛgɛ barokun ni barokun. Ni tɛmɛsira dɔ tun bɛ yen u tɛ min faamu, u tun bɛ tɛmɛsira wɛrɛw ɲini minnu tun bɛ se ka o tɛmɛsira ɲɛfɔ. O la ni u tun bɛnna fɛn kan min ni Bibulu kuma tɔw tun bɛ taa, u bɛ o sɛbɛn. K’a to Bibulu k’a yɛrɛ ɲɛfɔ, o kɛra sababu ye u ye tiɲɛ dɔn Ala tɔgɔ kan, a ka masaya kan, a sagonnata kan ka ɲɛsin dugukolo ani hadamadenw ma, suw cogoya ani lakunnuni kan. Ɲininiw ye u hɔrɔnya ka bɔ dannakow ani kɛwalew nkalonma caman de la.—Yuhana 8:31, 32.

San 1879, Bibulu kalanbagaw y’a faamu ko waati tun sera walasa tiɲɛ ka lakɔdɔn kosɛbɛ. O kama u ye a daminɛ ka La Tour de Garde annonce le Royaume de Jéhovah bɔ, o min ye sɛbɛn ye an bɛ min bɔ fo bi. Bi bi in na, an bɛ Bibulu tiɲɛw kuma fɔ jamana 240 kɔnɔ ani an bɛ o kɛ kan 750 na. Dɔnniya lakika ma deli ka caya abadaa ka nin bɔ!

• Krisita ka saya kɔfɛ, mun ye Bibulu tiɲɛw sɔrɔ?

• O tiɲɛw lakɔdɔnna kokura cogo di?