Yesu Krisita ye Masiya kofɔlen ye

WALISA k’an dɛmɛ k’a dɔn jɔni ye Masiya ye, Jehova Ala ye Bibulu kira caman bila ka kunnafoni walawalalenw di an labilabaga ka bangeli ni a ka cidenyabaara ani a ka saya ko la. O Bibulu kirayakumaw bɛɛ tiimɛna Yesu Krisita kan. Kabako, u bɛɛ ye lɛgɛsɛ ye ani u walawalalen dɔn. Walisa ka o jira, kirayakuma minnu fɔra Masiya bangeli n’a ka denmisɛnya kan, an ka olu dɔw lajɛ.

Kira Esayi y’a fɔ ko Masiya bɛna kɛ Masakɛ Dawuda bɔnsɔn dɔ ye. (Esayi 9:7) Yesu bɔra tigitigi Dawuda bɔnsɔn de la.—Matiyu 1:1, 6-17.

Mise, n’o ye Ala ka kira dɔ wɛrɛ ye, o y’a fɔ ko a bɛna kɛ kuntigi ye ani ko a bɛna bange “Bɛtilɛhɛm Efrata.” (Mise 5:1) Yesu bangera waati min na, dugu fila tun bɛ Israɛl minnu bɛ wele ko Bɛtilɛhɛm. Kelen tun bɛ Nazarɛti kɛrɛ fɛ, jamana saheli yanfan fɛ, nka tɔ kelen tun ka surun Jerusalɛm la, Jude jamana na. Bɛtilɛhɛm min tun ka surun Jerusalɛm la, o tun bɛ wele ko Efrata, Yesu bangera o dugu de la tigitigi i ko kirayakuma y’a fɔ cogo min na.—Matiyu 2:1.

Bibulu kirayakuma wɛrɛ ka fɔ la, Ala Denkɛ bɛna wele ka bɔ “Misira.” Yesu denmisɛnman taara Misira jamana na. A bɔra yen Herɔde salen kɔfɛ, o kɛra sababu ye ka o kirayakuma tiimɛ.—Ose 11:1; Matiyu 2:15.

Yɔrɔ koorilen kɔnɔ min tɔgɔ ye ko Kirayakuma minnu ɲɛsinnen bɛ Masiya ma, “Kirayakuma” minnu fɔra Bibulu tɛmɛsiraw kɔnɔ, olu bɛ kunnafoni walawalalenw di Masiya ko la. I ka o tɛmɛsiraw suma ni “Tiimɛni” yɔrɔ tɛmɛsiraw ye. N’i y’o kɛ, o bɛna i ka dannaya kologɛlɛya Ala ka Kuma la.

N’i ye o tɛmɛsiraw lajɛ, a to i hakili la ko olu ye kirayakumaw de ye, minnu sɛbɛnna san kɛmɛ caman sani Yesu ka bange. Yesu y’a fɔ ko: “ko minnu sɛbɛnna ne ko la Musa ka sariya ni kiraw ka kitabuw ni Zaburuw la, wajibi don olu bɛɛ ka dafa.” (Luka 24:44) I bɛ se ka o lajɛ i yɛrɛ ka Bibulu kɔnɔ ko o kelen-kelen bɛɛ tiimɛna.