Ala bɛ sɔn bato min na

1. N’an bɛ Ala bato a batocogo la, an bɛna nafa jumɛnw sɔrɔ o la?

JEHOVA ALA bɛ hami an na kosɛbɛ. A b’a fɛ fana an ka nafa sɔrɔ a ka laadilikanw na, kanuya bɛ minnu na. Ni an b’a bato a batocogo la, an bɛna hɛrɛ sɔrɔ, wa an bɛna an yɛrɛ tanga kunko caman ma an ka diɲɛlatigɛ kɔnɔ. An bɛna a ka dugawu n’a ka dɛmɛ fana sɔrɔ. (Esayi 48:17) Nka, diinɛ kɛmɛ caman de bɛ yen minnu b’a fɔ ko u bɛ alako tiɲɛ fɔ. Nka Ala ye min ye, an’a bɛ min waajibiya anw ma, u bɛ min fɔ o kow kan, olu tɛ kelen ye.

2. Ka Jehova bato a batocogo ɲuman na, an bɛ se ka o dɔn cogo jumɛn na? Misali jumɛn b’an dɛmɛ ka o faamu?

² Ka Jehova bato a batocogo ɲuman na, i bɛ se ka o dɔn cogo jumɛn na? I mago tɛ ka diinɛ bɛɛ kalan. I mago bɛ dɔrɔn, k’a dɔn Bibulu bɛ min fɔ tigitigi bato lakika ko la. An ka misali dɔ ta: Wari kolon bɛ dun dugu caman na. N’a fɔra k’i ka wari ɲuman ni wari kolon bɔ ɲɔgɔn na, i bɛ n’o kɛ cogo di? Yala i bɛn’a ɲini k’a dɔn i kun fɛ wari biye wala warimisɛn kolon sifaya bɛɛ ye min ye wa? Ayi. Min bɛna fisaya i ma kosɛbɛ, o ye k’a ɲini ka wari lakika cogoya dɔn koɲuman. N’i ye o dɔn i bɛna se ka wari kolon dɔn. O cogo kelen na fana, n’an bɛ a dege k’a dɔn diinɛ lakika ye min ye, diinɛ minnu tɛ tiɲɛ ye, an bɛna se ka olu dɔn.

3. Ka kɛɲɛ ni Yesu ka kuma ye, an ka kan ka mun kɛ n’an b’a fɛ Ala ka sɔn an na?

³ Jehova bɛ sɔn batocogo min na, a nafa ka bon an k’a bato o cogo la. Mɔgɔ caman bolo, diinɛ bɛɛ ka di Ala ye, nka Bibulu tɛ o fɔ. K’a fɔ dɔrɔn ko i ye Krecɛn ye, o tɛ wasa kɛ. Yesu ko: “Mɔgɔ minnu b’a fɔ ne ma, ‘Matigi, Matigi,’ olu bɛɛ tɛna don sankolo masaya la, fɔ ne sankolola Fa sago kɛbaaw.” O la sa, walisa Ala ka sɔn an na, fo an ka kalan kɛ k’a dɔn Ala bɛ min waajibiya anw ma ani ka o kɛ. Mɔgɔ minnu tɛ Ala sago kɛ, Yesu y’a fɔ olu ma ko “kojugukɛlaw.” (Matiyu 7:21-23) I ko nafa jɔnjɔn si tɛ wari kolon na, o cogo kelen na fana, nafa jɔnjɔn si tɛ diinɛ nkalonma na. Wa, min ka jugu n’o ye, o ye ko diinɛ nkalonma bɛ se ka kɛ i ma kojugu ye tiɲɛ na.

4. Yesu ye kuma min fɔ sira fila ko la, o kɔrɔ ye mun ye? O sira kelen-kelen bɛɛ bɛ taa min?

⁴ Jehova bɛ cogoya di mɔgɔ kelen-kelen bɛɛ ma dugukolo kan, walisa a ka se ka ɲɛnamaya banbali sɔrɔ. Nka, walisa an ka se ka ɲɛnamaya banbali sɔrɔ alijinɛ kɔnɔ, fo an ka Ala bato i ko a ka kan ka bato cogo min na. O la, kabini sisan, an ka kan ka an ka ɲɛnamaya kɛ cogo la a bɛ sɔn min na. Nka, dusukasiko don ko mɔgɔ caman bɛ ban ka o kɛ. O de kosɔn, Yesu y’a fɔ ko: “A’ ye don da dɔgɔmannin fɛ, katuguni sira min bɛ taa halaki yɔrɔ la, o donda ni a kɔnɔ bɛɛ ka bon, a taabaaw ka ca. Nka sira min bɛ taa ɲɛnamaya la, o donda ni a kɔnɔ bɛɛ ka dɔgɔ, a sɔrɔbaaw man ca.” (Matiyu 7:13, 14) Diinɛ lakika bɛ taa ɲɛnamaya banbali la. Diinɛ nkalonmaw bɛ taa halakili la. Jehova t’a fɛ hadamaden si ka halaki. O kosɔn, a bɛ cogo di mɔgɔ bɛɛ ma, u mana kɛ yɔrɔ o yɔrɔ la, u ka se ka kalan kɛ k’ale dɔn. (2 Piɛrɛ 3:9) O la sa, an bɛ Ala bato cogo min na, o kɔrɔ bɛ se ka kɛ an bolo ɲɛnamaya ye walima saya ye tiɲɛ na.

DIINƐ LAKIKA BƐ DƆN COGO MIN NA

5. An bɛ se ka diinɛ lakika kɔnɔmɔgɔw dɔn ka bɔ mɔgɔ tɔw la cogo jumɛn na?

⁵ ‘Sira min bɛ taa ɲɛnamaya la,’ o bɛ se ka sɔrɔ cogo jumɛn na? Yesu y’a fɔ ko diinɛ lakika bɛna dɔn a kɔnɔmɔgɔw ka ɲɛnamaya kɛcogo fɛ. A ko: “Aw na u dɔn u ka kɛwalew de fɛ.” A y’a fɔ fana ko: “Jiri ɲuman bɛ den ɲumanw kɛ.” (Matiyu 7:16, 17) Fɔcogo wɛrɛ la, diinɛ lakika kɔnɔmɔgɔw bɛna dɔn u ka dannakow n’u taamacogo de fɛ. Hali ni u tɛ mɔgɔ dafalenw ye, ani ko u bɛ fili, o bɛɛ n’a ta, n’i ye u jamakulu bɛɛ lajɛ, i b’a ye ko u b’u jija ka Ala sago kɛ. An ka fɛn wɔɔrɔ lajɛ minnu b’a to an bɛ se ka diinɛ lakika kɔnɔmɔgɔw dɔn ka bɔ mɔgɔ tɔw la.

6, 7. Ala ka baarakɛlaw bɛ Bibulu filɛ mun ye? Yesu ye misali ɲuman jumɛn jira o sira la?

⁶ Ala ka baarakɛlaw bɛ u ka kalansiraw sinsin Bibulu kan. Bibulu yɛrɛ b’a fɔ ko: “Kitabu kuma bɛɛ kɛra a sɛbɛnnikɛlaw kɔnɔ Ala dafiɲɛ fɛ. Nafa b’a la kalanni ni kɔrɔfɔli ni latilenni kama, ani kololi, tilennenya ko la, walisa Ala ka mɔgɔ ka dafa, a selen kɛwale ɲumanw bɛɛ la.” (2 Timote 3:16, 17) Ciden Paul y’a sɛbɛn Krecɛn tɔw ye ko: “An ye Ala ka kuma fɔ aw ye tuma min na, aw y’a lamɛn, k’a minɛ i ko Ala ka kuma. Aw ma a jate mɔgɔ ka kuma ye. Tiɲɛ la Ala ka kuma yɛrɛ don.” (1 Tesalonikekaw 2:13). O la sa, diinɛ lakika kɔnɔmɔgɔw ka dannakow ni u ka ko kɛtaw sinsinnen tɛ hadamadenw hakililata kan walima hadamadenw ka laadaw kan. Nka, u sinsinnen bɛ Ala ka kuma fyɛlen de kan, n’o ye Bibulu ye.

⁷ Yesu yɛrɛ ye misali ɲuman jira an na, a kɛtɔ ka a ka kalansiraw sinsin Ala ka kuma kan. A ka delili dɔ kɔnɔna na, a y’a fɔ a sankolola Fa ye ko: “I ka kuma ye tiɲɛ ye.” (Yuhana 17:17) Yesu tun dalen bɛ Ala ka Kuma na, wa a tun bɛ mɔgɔw kalan fɛn o fɛn na, olu kelen-kelen bɛɛ ni Ala ka Kuma sɛbɛnnen tun bɛ ɲɔgɔn minɛ. Yesu tun b’a fɔ tuma caman na ko: “A sɛbɛnnen bɛ.” (Matiyu 4:4, 7, 10) O kɔfɛ, a tun bɛ Ala ka kuma sɛbɛnnen yɔrɔ dɔ kofɔ. O cogo kelen na bi fana, Ala ka baarakɛlaw tɛ mɔgɔw kalan olu yɛrɛ hakililataw la. U dalen b’a la ko Bibulu ye Ala ka Kuma ye. O de y’a to, u bɛ u ka kalansiraw sinsin kosɛbɛ Bibulu kɔnɔkuma kan.

8. Mun sen bɛ Jehova batoli la?

⁸ Diinɛ lakika kɔnɔmɔgɔw bɛ Jehova kelenpe de bato, ka mɔgɔw ladɔnniya a tɔgɔ la. Yesu y’a fɔ ko: “I ka i Matigi [Jehova] Ala bato ka baara kɛ o kelenpe ye.” (Matiyu 4:10) O la sa, Ala ka baarakɛlaw tɛ fɛn wɛrɛ si bato fo Jehova kelenpe dɔrɔn. Nin fɛnw sen bɛ u ka bato la, n’o ye: Ka mɔgɔw ladɔnniya Ala lakika tɔgɔ la ani k’a fɔ u ye Ala ye min ye. Zaburu 83:19, BS b’a fɔ ko: “Walisa u k’a dɔn ko e min tɔgɔ ko Jehova, ko e kelenpe ye Kɔrɔtalenba ye dugukolo bɛɛ kun na.” Yesu ye misali ɲuman jira an na mɔgɔw dɛmɛni ko la u ka Ala dɔn, i ko a y’a fɔ cogo min na a ka delili dɔ kɔnɔna na, ko: “I ye mɔgɔ minnu di ne ma ka bɔ diɲɛ la, ne ye i tɔgɔ jira olu la.” (Yuhana 17:6) O cogo kelen na bi fana, Ala batobaga lakikaw bɛ mɔgɔw kalan Ala tɔgɔ la ani a sagonata ni a jogo ɲumanw na.

9, 10. Kretiɛn lakikaw b’a jira ko u bɛ ɲɔgɔn kanu cogo jumɛnw de la?

⁹ Ala batobaga lakikaw b’a jira ko u bɛ ɲɔgɔn kanu tiɲɛ na, wa u bɛ o kɛ Ala de kama. Yesu y’a fɔ ko: “Ni aw bɛ ɲɔgɔn kanu, mɔgɔw bɛɛ n’a dɔn o de fɛ ko aw ye ne ka kalandenw ye.” (Yuhana 13:35) Krecɛn fɔlɔw tun bɛ ɲɔgɔn kanu o cogo de la. Kanuya min sinsinnen bɛ Bibulu sariyakolow kan, o bɛ gɛlɛyaw kunnasagon minnu bɛ se ka na ni farali ye mɔgɔw ni ɲɔgɔn cɛ, i n’a fɔ ni mɔgɔw tɛ siya kelen ye, walima ni u tɛ bɔ jamana kelen na, walima ni u ka sɔrɔ tɛ kelen ye. O kanuya bɛ mɔgɔw gɛrɛ ɲɔgɔn na ani ka kɛ sababu ye balimaya yɛrɛ-yɛrɛ bɛ kɛ u ni ɲɔgɔn cɛ, min cɛjuru tɛ se ka tiɲɛ cogo si la. (Kolosekaw 3:14) O balimaya sugu tɛ diinɛ nkalonmaw kɔnɔmɔgɔw ni ɲɔgɔn cɛ. An b’o dɔn cogo jumɛn na? U bɛ ɲɔgɔn faga bawo u tɛ jamana kelen mɔgɔw ye, walima u tɛ siya kelen mɔgɔw ye. Krecɛn lakikaw tɛ kɛlɛkɛminɛnw ta ka u Krecɛnɲɔgɔnw faga, minnu ye u balimaw ye diinɛ sira la. U tɛ kɛlɛkɛminɛn ta ka mɔgɔ wɛrɛ si fana faga. Bibulu b’a fɔ ko: “Ala denw ni Sitanɛ denw bɛ dɔn ka bɔ ɲɔgɔn na nin de la: Min tɛ to ka tilennenya kow kɛ, o ma bɔ Ala la, ani min tɛ a balima kanu fana . . . An ka ɲɔgɔn kanu. An kana kɛ i ko Kaɛn, o bɔra Sitanɛ la, ka a yɛrɛ dɔgɔkɛ faga.”—1 Yuhana 3:10-12; 4:20, 21.

¹⁰ A jɛlen don ko kanuya sɛbɛ kɔrɔ tɛ dɔrɔn ko i tɛ mɔgɔ faga. Krecɛn lakikaw tɛ miiri fɔlɔ u yɛrɛ la. U bɛ u ka waati, u barika ni u bolofɛnw kɛ ka ɲɔgɔn dɛmɛ ani ka dusu don ɲɔgɔn kɔnɔ. (Heburuw 10:24, 25) U bɛ ɲɔgɔn dɛmɛ gɛlɛya waatiw la. U tilennen bɛ mɔgɔ bɛɛ fan fɛ fana. U ka diɲɛlatigɛ kɔnɔ, u bɛ tugu Bibulu ka laadilikan na, n’o ye “ka ko ɲuman kɛ mɔgɔw bɛɛ ye.”—Galasikaw 6:10.

11. Mun na a nafa ka bon ka sɔn Yesu Krisita la i ko mɔgɔ kelenpe min sababu fɛ Ala bɛ mɔgɔw kisi?

¹¹ Krecɛn lakikaw bɛ sɔn Yesu Krisita la i ko mɔgɔ kelenpe min sababu fɛ Ala bɛ mɔgɔw kisi. Bibulu b’a fɔ ko: “Kisili tɛ sɔrɔ dɔ wɛrɛ si la Yesu kɔ, katuguni an ka kan ka kisi tɔgɔ min fɛ, o dɔ wɛrɛ ma di mɔgɔw ma sankolo jukɔrɔ ale tɔgɔ kɔ.” (Kɛwalew 4:12) I ko an y’a ye Tilayɔrɔba 5nan na cogo min na, Yesu y’a ka ɲɛnamaya di walisa hadamaden minnu bɛ Ala kan minɛ, a ka kɛ olu kunmabɔsara ye. (Matiyu 20:28) Ka fara o kan, Yesu ye Masakɛ ye min sigira Ala fɛ sankolo Masaya la, min bɛna dugukolo bɛɛ mara. O kosɔn, n’an b’a fɛ ka ɲɛnamaya banbali sɔrɔ, Ala b’a ɲini an fɛ an ka Yesu kan minɛ, ka tugu a ka kalansiraw la. O de y’a to Bibulu b’a fɔ ko: “Min dara a Denkɛ la, ɲɛnamaya banbali bɛ o tigi fɛ. Min tɛ sɔn ka Denkɛ kan minɛ, o tɛna ɲɛnamaya sɔrɔ.”—Yuhana 3:36.

12. Ni a fɔra ko Ala batobagaw tɛ diɲɛ taw ye, o kɔrɔ ye mun ye?

¹² Ala batobaga lakikaw tɛ diɲɛ taw ye. Tuma min na Yesu tun jɔlen bɛ Romɛ gofɛrɛnɛrɛ Pilate ɲɛkɔrɔ a ka kiritigɛ kama, a y’a fɔ ko: “Ne ka masaya tɛ nin diɲɛ ta ye.” (Yuhana 18:36) Yesu ka kalanden lakikaw mana kɛ jamana o jamana na, u ye Yesu ka sankolola Masaya marakɔnɔmɔgɔw ye. O kosɔn, u bɛ ban pewu ka u da don diɲɛ ka politiki kow la. U tɛ u sen don a kɛlɛw la cogo si fana na. Nka, ni mɔgɔ dɔ y’a sugandi ka kɛ politiki pariti dɔ mɔgɔ ye, walima ka jɔyɔrɔ kɛrɛnkɛrɛnnen dɔ ɲini politiki la, walima k’a ni don kalafili la, Jehova batobagaw tɛna a ɲini ka o tigi bali ka o kow kɛ. K’a sɔrɔ u ni tɛ politiki la, u bɛ sariyaw bonya. Mun na? Bawo Ala ka kuma b’a fɔ u ye ko “mɔgɔw bɛɛ ka kolo an kunna fangaw ye” n’o ye gofɛrɛnamanw ye. (Romɛkaw 13:1) Ala bɛ min ɲini an fɛ ani gofɛrɛnaman bɛ min wajibiya an ma, ni o fɛn fila bɛ ɲɔgɔn sɔsɔ tuma min na, Jehova batobaga lakikaw bɛ cidenw ladege, olu minnu y’a fɔ ko: “Wajibi don an ka Ala kan minɛ ka tɛmɛn mɔgɔw ta kan.”—Kɛwalew 5:29; Marka 12:17.

13. Ala ka Masaya ye mun ye Yesu ka kalanden lakikaw bolo? O de y’a to u bɛ mun kɛ?

¹³ Yesu ka kalanden lakikaw bɛ Ala ka Masaya kibaru duman waajuli kɛ, k’a jira ko Ala ka Masaya de ye hadamadenw ka jigiya kelenpe ye. Yesu ye nin kirayakuma fɔ ko: “Nin Kibaru Duman waajuli na kɛ diɲɛ yɔrɔw bɛɛ la sankolo masaya ko la ka kɛ siyaw bɛɛ seere ye. O kɔ, a laban na se.” (Matiyu 24:14) Yesu Krisita ka kalanden lakikaw tɛ dusu don mɔgɔw kɔnɔ u ka u jigi da hadamaden kuntigiw kan walisa u ka u kunkow ɲɛnabɔ. Nka, u bɛ Ala ka sankolola Masaya de weleweleda, k’a jira ko o kelenpe de ye hadamadenw ka jigiya ye. (Zaburu 146:3) An bɛ se ka delili kɛ cogo min na o gofɛrɛnaman dafalen ko la, Yesu y’o jira an na a y’a fɔ tuma min na ko: “I ka masaya ka na. I sago ka kɛ dugukolo kan i ko a bɛ kɛ sankolo la cogo min na.” (Matiyu 6:10) Ala ka Kuma y’a jira ko o sankolola Masaya bɛna “masaya tɔw [minnu bɛ yen sisan] tiɲɛ ka u halaki. Ale yɛrɛ na sigi masaya la badaa.”—Daniɛl 2:44.

14. E fɛ, diinɛ jumɛn na Ala bɛ bato i ko a ka kan ka bato cogo min na?

¹⁴ An tilatɔ filɛ nin ye ka kuma fɛn minnu kan, i hakili jakabɔ o kan, k’i yɛrɛ ɲininka ko: ‘Diinɛ jumɛn de b’a ka kalansiraw bɛɛ sinsin Bibulu kan ani ka mɔgɔw ladɔnniya Ala tɔgɔ la? Diinɛ jumɛn bɛ mɔgɔw kanu ka kɛɲɛ ni Ala sago ye, n’a bɛ dannaya kɛ Yesu la, n’a tɛ diɲɛ ta ye, ani n’a bɛ Ala ka Masaya weleweleda i ko jigiya jɔnjɔn kelenpe min bɛ hadamadenw la? Diinɛ minnu bɛɛ bɛ dugukolo kan, olu la, diinɛ jumɛn de bɛ nin taamasyɛn waleya?’ Kow b’a jira k’a jɛya ko o diinɛ ye Jehova Seerew de ye.—Esayi 43:10-12.

I BƐNA MUN KƐ?

15. Yala Ala bolo, ka da a la ko a bɛ yen, o bɛ wasa kɛ wa?

¹⁵ Ka da a la ko Ala bɛ yen, o dɔrɔn tɛ wasa kɛ walisa ka an ko diya Ala ye. Bibulu b’a fɔ ko hali jinɛw dalen b’a la ko Ala bɛ yen. (Yakuba 2:19) Nka, a jɛlen don ko jinɛw tɛ Ala sago kɛ, wa ko Ala fana tɛ sɔn u la. Walisa Ala ka sɔn an na, an ka kan ka da a la ko a bɛ yen, nka an ka kan fana k’a sago kɛ. An ka kan ka bɔ pewu diinɛ nkalonmaw la fana, ka don bato lakika la.

16. An ka kan ka mun kɛ diinɛ nkalonma ko la?

¹⁶ Ciden Paul y’a jira ko an man kan k’an sen don bato nkalonma la. A y’a sɛbɛn ko: “Matigi ko: ‘A’ ye bɔ u cɛma ka fara u la. Aw kana maga fɛn saniyabali si la. Ni aw ye o kɛ, ne na sɔn aw ma.’ ” (2 Kɔrɛntekaw 6:17; Esayi 52:11) O la sa, Krecɛn lakikaw bɛ u yɛrɛ tanga fɛn bɛɛ lajɛlen ma minnu sirilen bɛ bato nkalonma na.

17, 18. “Babilonɛba” ye mun ye? Ani mun na a ka kan i ka teliya ka “bɔ” a kɔnɔ?

¹⁷ Bibulu b’a jira ko “Babilonɛba” ye diinɛ nkalonma bɛɛ lajɛlen de ye.a (Jirali 17:5) O tɔgɔ b’an hakili jigin Babilonɛ dugu kɔrɔ la, diinɛ nkalonma daminɛna yɔrɔ min na, Sanjiba nalen kɔfɛ, Nuhun tile la. Diinɛ nkalonma bɛ mɔgɔw kalan fɛn minnu na bi ani a bɛ laada minnu sirataama bi, olu fanba bɔra Babilonɛ dugu de kɔnɔ a mɛnna. Misali la, Babilonɛkaw tun bɛ fɛn minnu bato i ko u ka alaw, tubabukan na, a bɛ fɔ o fɛnw ma ko trinité, walima ko triade, n’o ye Ala sabaya ye. Bi, o kuma kelen de bɛ fɔ Ala ko la diinɛ caman na. U b’a fɔ ko Ala ye trinité ye. O de fana ye u ka kalansiraw bɛɛ la nafama dɔ la kelen ye. Nka Bibulu b’a fɔ k’a jɛya ko Ala sɛbɛ kelenpe dɔrɔn de bɛ yen, n’o ye Jehova ye, ani ko Yesu Krisita y’a Denkɛ ye. (Yuhana 17:3) Babilonɛkaw tun dalen bɛ ko dɔ fana na, o ye ko fɛn dɔ bɛ hadamaden na min tɛ sa, n’o bɛ wele ko ni. Olu fɛ, ni mɔgɔ sara, farikolo bɛ sa, nka ni tɛ sa, ani ko ni bɛ se ka tɔɔrɔ, tɔɔrɔyɔrɔba dɔ la. Bi fana, diinɛ fanba b’a fɔ ko: Ni walima hakili tɛ sa, ani ko o bɛ se ka tɔɔrɔ jahanama tasuma na.

¹⁸ Ikomi bato min tun bɛ kɛ Babilonɛ dugu kɔrɔ la, o jɛnsɛnna dugukolo yɔrɔ bɛɛ la, o la sa, Babilonɛba min bɛ yan bi, o bɛ diɲɛ diinɛ nkalonmaw bɛɛ lajɛlen fangatigiyabolo de jira cogo bɛnnen na. Ala ye a kiraya kuma fɔ ko diinɛ nkalonmaw bɛɛ lajɛlen fangatigiyabolo ka halakili bɛna cun a kan. (Jirali 18:8) I ɲɛ b’a la mun na a ka kan i ka teliya ka bɔ Babilonɛba ka ko sigilen kelen-kelen bɛɛ la wa? Jehova Ala b’a fɛ i ka teliya ka “bɔ” a kɔnɔ, sani bɔ waati ka tɛmɛ.—Jirali 18:4.

19. I bɛna mun sɔrɔ i kɛtɔ ka baara kɛ Jehova ye?

¹⁹ Ikomi i y’a latigɛ ka bɔ diinɛ nkalonma na, dɔw bɛ se ka i bila. Nka, n’i bɛ baara kɛ Jehova ye a ka jama cɛ la, i bɛna min sɔrɔ, o bɛna bonya kosɛbɛ ka tɛmɛ i bɛna bɔnɛ min na. I ko Yesu ka kalanden fɔlɔw, olu minnu jɛnna fɛn dɔw kɔ walisa ka tugu a kɔ, e fana bɛna balimakɛ ni balimamuso caman sɔrɔ diinɛ sira la. Krecɛn lakika miliyɔn caman minnu bɛ diɲɛ kɔnɔ, olu bɛ ikomi denbayaba kelen. I bɛna kɛ o denbayaba kɔnɔmɔgɔ dɔ ye, olu bɛ u ka kanuya sɛbɛ jira i la. Ani fana i bɛna dakabana jigiya sɔrɔ, o ye ka ɲɛnamaya banbali kɛ ‘diɲɛ kɔnɔ min bɛ sen na ka na’. (Marki 10:28-30, LK) Ni donw bɛ ka tɛmɛ, a bɛ se ka kɛ ko mɔgɔ minnu y’i bila i ka dannakow kosɔn, olu bɛna a lajɛ Bibulu bɛ min fɔ, ani o kɔfɛ, ka kɛ Jehova batobagaw ye.

20. Mɔgɔ minnu bɛ diinɛ lakika waleya, mun bɛ olu ɲɛ sini?

²⁰ Bibulu b’a fɔ ko yan ni dɔɔnin cɛ, Ala bɛna nin diɲɛ kow sigicogo juguman in halaki, ka kow sigicogo kura tilennen sigi o nɔ na a ka Masaya ka kuntigiya kɔrɔ. (2 Piɛrɛ 3:9, 13) O bɛna kɛ dakabana diɲɛ ye dɛ! O kow sigicogo kura kɔnɔ, diinɛ kelenpe dɔrɔn de bɛna kɛ yen, o ye bato lakika de ye. Kabini sisan, yala o tɛna kɛ hakilitigiyako ye i bolo, ni i yɛ fɛɛrɛ bɛnnenw latigɛ walisa ka na fara Ala batobaga lakikaw kan wa?