10 Kɛ dannamɔgɔ ye

O KƆRƆ YE MUN YE?

Mɔgɔ min ye dannamɔgɔ ye, o tigi bangebaaw, a teriw ani a ka patɔrɔn bɛ dannaya da a kan. A bɛ sariyaw bato, a b’a ka layiduw timɛ wa a bɛ tiɲɛ fɔ tuma bɛɛ.

MUN NA O NAFA KA BON?

Tuma caman na, ni waati bɛ tɛmɛn, i bangebaaw bɛ da i la fɔ ka se hakɛ min ma, u bɛ yɛrɛmahɔrɔnya fana di i ma ka kɛɲɛ ni o hakɛ de ye.

“Ni i b’a fɛ i bangebaaw ka da i la, i ka kan k’a jira u la k’i ye mɔgɔ hakiliman ye ani ko i bɛ kow kɛ cogoya ɲuman na ni i ni u bɛ ɲɔgɔn fɛ ani hali ni i ni u tɛ ɲɔgɔn fɛ tuma min na.”—Sarahi.

BIBULU SARIYAKOLO: “A’ ye aw yɛrɛw kɔrɔbɔ k’a filɛ.”—2 Kɔrɛntekaw 13:5.

I BƐ SE KA MIN KƐ

N’i b’a fɛ tɔw ka da i la walima ka u ka dannaya sɔrɔ kura ye, nin hakilina nata ninnu bɛna i dɛmɛ.

Tiɲɛ fɔ tuma bɛɛ. Fɛn min bɛ se k’a to tɔw ka tigɛ i la joona, o ye nkalontigɛ de ye. Nka ni i bɛ i tilen ka tiɲɛ fɔ tuma bɛɛ, kɛrɛnkɛrɛnnenya la ni i ye filimankow kɛ, o b’a to tɔw bɛ da i la.

“Tiɲɛ fɔli ka nɔgɔn ni kojugu fosi ma kɛ. Nka ni i ye tiɲɛ fɔ hali ni i ye kojugu dɔ kɛ i t’a fɛ ka min fɔ, o b’a to tɔw ka da i la.”—Caiman.

BIBULU SARIYAKOLO: “An b’a fɛ ka taama cogo bɛnnen na ko bɛɛ la.”—Heburuw 13:18.

Kɛ mɔgɔ tilennen ye. Mɔgɔ kɛmɛ ɲininkara Etats-unis u b’a fɛ ka mɔgɔ sugu minnu ta u ka baara la, mɔgɔ 78 y’a fɔ ko ka kɛ dannamɔgɔ ye o bɛ “jogo fɔlɔ sabaw cɛma u b’a fɛ ka min sɔrɔ u ka baarakɛlaw la.” Ka kɛ mɔgɔ tilennen ye sisan, o bɛna i nafa ni i kɛra baliku ye.

“Ni ne ye n’ka sokɔnɔbaaraw kɛ ka ɲɛ k’a sɔrɔ n’bangebaaw ma o fɔ ne ye, u bɛ o jateminɛ. Ni ne ye o ko suguw kɛ k’a sɔrɔ mɔgɔ ma o fɔ ne ye, u bɛ u ka dannaya da ne kan ka ta’a fɛ.”—Sarah.

BIBULU SARIYAKOLO: “Ne y’a dɔn k’a jɛya ko ne bɛ min ɲini i fɛ, ko i na o kɛ. . . . Ne y’a dɔn ko i n’a kɛ ka tɛmɛn ne ka fɔlen kan yɛrɛ.”—Filemon 21.

I kana kɔrɔtɔ. Ni i bɛ ka kɔrɔbaya farikolo tan fan fɛ, mɔgɔw bɛ o ye ka ɲɛ nka ni i bɛ ka kɔrɔbaya hakili ta fan fɛ, ka baliku jogow ta, o ye man di mɔgɔw fɛ, o la i kana kɔrɔtɔ u ka dannaya nɔfɛ.

“Wale kelen dɔrɔn tɛ se k’a to i ka i bangebaaw ani mɔgɔ tɔw ka dannaya sɔrɔ. Nka i bɛ se k’a sɔrɔ dɔɔnin dɔɔnin n’i ye walew kɛ tuma bɛɛ minnu b’a jira ko u bɛ se ka da i la.”—Brandon.

BIBULU SARIYAKOLO: “Aw ka . . . muɲuli don aw la.”—Kolosekaw 3:12.