ỌTA NE EMWA NỌ

Zẹvbe nọ rre ebe Galetia 4:​24, de ile eva ne Pọl ghaa guan kaẹn?

E Pọl keghi guan kaẹn vbene Ebraham sikẹ e Sera vbe Hega sẹ hẹ, iyeke ọni, ọ na kha wẹẹ: “Okha na keghi mwẹ emwi na yae gie; ikhuo eva na keghi mudia ye ihe ile eva.” (Gal 4:​22-24) Vbene ima te ka ya rẹn otọ re ọre wẹẹ, ile ọghe Uhi kevbe ile ọghe ọgbọn ẹre ile eva na khin. Sokpan ma ghi dọlegbe mu ukpa mu uwerhẹn ghee ẹre, ma na do bẹghe ẹre wẹẹ, te ọ khẹke ne ima ru afiwerriẹ eso. Ọ khọ wẹẹ, ile ne Jehova gu Ebraham ta ẹre Pọl ghaa guan kaẹn ẹ i re ile ọghe ọgbọn. Gi ima ghee emwi eso nọ ya ima kha vberriọ.a

E Pọl keghi kha wẹẹ, te ile ọghe Uhi na tae vbe uhunmwu Oke Sainai vbe ukpo 1513 B.C.E. yevbe Hega. (Gal 4:25; Ẹks 19:​5, 6) Ọmwa nọ ma gba rhọkpa i rrọọ nọ gha sẹtin lele Uhi na vbene ọ ma na baeku, rhunmwuda ọni, ẹ i mwẹ ọna ma ya Ivbi e Ju rẹn wẹẹ, eviẹn orukhọ ẹre iran khin. Ile na gha te vbe sẹtin ya Ivbi e Ju rẹn ọmwa nọ gele re Mezaia, irẹn ọkpa ẹre ọ khian sẹtin lele Uhi na. Ọmwa nọ gbae ẹre Mezaia ghaa khin, vbe ọ ya arrọọ ọghẹe zọ ese, ọ keghi fan emwa nagbọn hin obọ orukhọ kevbe uwu rre. (Gal 3:​19, 24, 25) Jesu ghi mu emwamwa ọghe Osanobua sẹ nẹ, Uhi nii ma ghi gha mwẹ esa.​—Rom 10:4.

E Pọl keghi kha wẹẹ alughaẹn rre uwu ẹkpo Hega kevbe Sera ne “okhuo nẹi re ọviẹn” biẹ rhunmwuda ive “ne Osanobua ve ẹre.” (Gal 4:23) Ive nii ọre ile ne Jehova gu Ebraham ta. (Gal 3:29; 4:​28, 30) Ebe Gẹnẹsis 22:18 guan kaẹn ile na, ọ khare wẹẹ: “La obọ ovbuẹ [ovbi Ebraham] rre, agbẹnvbo hia vbe uhunmwu otagbọn gha miẹn afiangbe, rhunmwuda ne u na danmwehọ mwẹ.”

Ile ne Jehova gu Ebraham ta vbe guan kaẹn eyan ne Jehova ru vbe ogba ọghe Idẹn sayọ. (Gẹn 3:15) Ọ ya ima rẹn wẹẹ, uniẹn Ebraham ẹre “Ọmọ nii” na ru eyan rẹn khian la rre. E Pọl keghi rhan otọ re wẹẹ, Jesu Kristi ọre “Ọmọ nii.” Sokpan ọkpa vbe usun ọmọ nii ẹre emwa ni re “ọghe Kristi,” ni re orhunmwu 144,000 ni khian deba Jesu kha vbe Arriọba ọghẹe vbe khin. (Gal 3:​16, 29; Arhie 14:​1-3) Emwa ni mu ẹtin yan e Jesu kevbe ni vbe họn ẹmwẹ nẹẹn gha miẹn afiangbe ni bun rhunmwuda ile ne Jehova gu Ebraham ta.

De emwi ne Pọl yae kha vbe ọ khare wẹẹ, “okha na keghi mwẹ emwi na yae gie”? Te ọ ghaa kha wẹẹ, Ivbi e Ju ghaa lele Uhi e Mozis, ọviẹn orukhọ ẹre iran khian ye gha khin vbene Hega vbe gha re ọviẹn. Sokpan deghẹ iran na miẹn ọnrẹn yi ighẹ “Ọmọ nii” nọ ke uniẹn Ebraham rre nọ re Jesu Kristi, iran i khian gha re ọviẹn orukhọ vbene Sera ma vbe gha re ọviẹn. Ẹghẹ nii, a ghi gele fan iran vbe obọ orukhọ kevbe uwu. (Jọn 8:​32-34) Sokpan deghẹ iran ma mu ẹtin yan e Jesu, ọ ghi rhie ma wẹẹ iran ma rẹn evbọzẹe ne Osanobua na ta ile ọghe Uhi; te ọ ta ile na nọ ya ru iyobọ ne iran ya rẹn Kristi.

Ivbi e Galetia ni bun ne Pọl gbẹn elẹta na gie ma gha re Ivbi e Ju, rhunmwuda ọni, ọ ma gha re esalẹbẹ ne iran ya lele Uhi na. Ivbi e Ju eso kegha hoo ne Ivbi Otu e Kristi nẹi re Ivbi e Ju gha lele uhi na, ọkpa vbe usun emwi ne iran wẹẹ ne iran gha ru ọre ne iran rhuẹ. E Pọl ghee ẹre wẹẹ emwi ukọnmwẹ khian gha nọ deghẹ iran na ye gha re “eviẹn” ọghe Uhi nẹi ghi mwẹ esa nọ ye rhunmwuda, iran miẹn Jesu Kristi yi nẹ.​—Gal 5:​1, 10-14.