Gha Mu Egbe Rrie Otọ Vbene Jehova Vbe Ye

1. Vbọzẹ nọ na yan ima unu ruan, vbe ima gha muẹn roro vbene Jehova mu egbe rrie otọ hẹ?

U GHA ghee emwa ni rre ukpo ọdakha vbe ẹdẹnẹrẹ, u gha kha wẹẹ, iran mu egbe rrie otọ ra? Egbọre u i khian kha vberriọ. Sokpan, e Jehova ne Osa ne Udazi keghi mu egbe rrie otọ. (Psm 113:​5-8) A i miẹn ọmwa nọ mu egbe rrie otọ sẹ e Jehova. Gi ima guan kaẹn emwi enẹ na wa mobọ rẹn e Jehova yi kevbe vbene emwi enẹ na ya ya ima rẹn wẹẹ, Osa nọ mu egbe rrie otọ ẹre Jehova khin. Ma gha vbe guan kaẹn odẹ ne Jesu ya ya egbe taa Erhae vbe odẹ nọ ya mu egbe rrie otọ. Avbe emwi ne ima khian zẹ iro yan na gha ru iyobọ ne ima ya sikẹ e Jehova sayọ, ma ghi vbe sẹtin ya egbe taa ẹre vbe odẹ nọ ya mu egbe rrie otọ.

ỌMWA NỌ GIA SIKẸ ẸRE JEHOVA KHIN

2. De emwi ne ebe Psalm 62:8 gi ima rẹn vbekpa e Jehova? (Vbe ya ghee efoto .)

² Emwa ni tọn egbe mu i gia sikẹ. Rhunmwuda vbene iran ya ghee egbe iran gidii, emwa i sẹtin sikẹ iran, eso ghi kue gha lẹẹ ne iran. Sokpan, e Jehova i ye vberriọ! Erha ima nọ rre ẹrinmwi keghi hoo ne ima sikẹ irẹn, ọ wa vbe hoo ne ima gi irẹn rẹn emwi ni kpokpo ima vbe orhiọn, ọna gele rhie ẹre ma wẹẹ, Osa nọ mu egbe rrie otọ ẹre nọ. (Tie Psalm 62:8.) Zẹvbe ne erha ya gbehọkotọ danmwehọ ivbi ẹre, erriọ ẹre Jehova vbe ya mu egbe nọ ya danmwehọ eguọmwadia ẹre vbe iran ghaa na erhunmwu gie ẹre. Uhiẹn, ọ na kue loo emwa ya gbẹn ni bun vbe uwu avbe erhunmwu na ye uwu e Baibol. Ọna gele rhie ẹre ma wẹẹ, Osa nọ gia sikẹ ẹre Jehova khin. (Jọs 10:​12-14; 1 Sam 1:​10-18) Sokpan, adeghẹ a na ghi miẹn wẹẹ, ugbẹnso, ima roro ẹre wẹẹ ima ma sẹ nọ gha sẹtin sikẹ e Jehova ghi vbọ?

3. Vbọzẹ ne u gha na sẹtin gha mwẹ ilẹkẹtin wẹẹ, e Jehova hoo ne u gha na erhunmwu gie irẹn vbe ẹghẹ hia?

³ Ma gha sẹtin na erhunmwu gie Jehova ọ gha khọnrẹn wẹẹ, ma roro ẹre wẹẹ, ma ma sẹ ne Jehova gha hoẹmwẹ ọnrẹn. Vbe ima gu kha vberriọ? Vbe erre ne Jesu zẹ ọghe ọmọ nọ wiri, ọ keghi ya e Jehova gie erha nọ mwẹ agiẹngiẹn, ne ovbi ẹre ghaa roro ẹre wẹẹ, irẹn ma sẹ na gha dọlegbe miẹn yi zẹvbe ọmọ. De emwi ne erha ọmọ nii ru vbe ovbi ẹre dọlegbe gha die owa? E Jesu khare wẹẹ, vbe ọ ke urria bẹghe ẹre wẹẹ, ovbi ẹre dee “ọ na rhulẹ bu ẹre, ọ na gbae ginna egbe, ọ na fẹko mu unu soso ẹre.” (Luk 15:​17-20) Te Jehova wa yevbe na ghee erha ọmọ na. Ọmwa ne iro han rẹn rhunmwuda orukhọ nọ ru ra rhunmwuda wẹẹ osi si ẹre, gha na erhunmwu gie Jehova, e Jehova ghi wa họn erhunmwu ẹnrẹn rhunmwuda Osa nọ mu egbe rrie otọ ẹre nọ. (Eve 3:​19, 20) E Jehova keghi mwẹ ẹnina daa egbe emwa vbenian, ọ ghi yevbe na miẹn wẹẹ, te ọ rhulẹ bu iran, nọ ya fu iran ẹko rre, ọ ghi vbe gi iran rẹn wẹẹ, irẹn gha tohan iran kevbe wẹẹ, irẹn hoẹmwẹ iran. (Aiz 57:15) De vbene Jehova ya “rhulẹ bu” ima vbe ẹdẹnẹrẹ? Avbe ediọn, emwa ima vbe uwu ẹgbẹe ni vbe gae kevbe avbe etẹn vbe iko ẹre ọ ya ima obọ. (Jems 5:​14, 15) E Jehova keghi loo iran ya ru iyobọ ne ima rhunmwuda ọ hoo ne ima sikẹ irẹn.

4. De vbene Jesu ya rhie ẹre ma wẹẹ, ọmwa nọ gia sikẹ ẹre irẹn khin?

⁴ Jesu ya egbe taa Erhae. Vbe na ghee Erhae, Jesu keghi mu egbe rrie otọ. Rhunmwuda ọni, ọmwa nọ gia sikẹ ẹre wa gha nọ vbe ọ rre uhunmwu otagbọn na. Te emwa wa gha nọ ọnrẹn ọta vbene ohan i na mu iran. (Mak 4:​10, 11) Rhunmwuda ọni, adeghẹ Jesu na nọ iran ọta, iran ghi sẹtin gele wa tae vbene ọ wa ya rre iran ekhọe. (Mat 16:​13-16) Iran gha ru abakuru, iran ma vbe gha mu ohan wẹẹ, Jesu gha mu ohu iran, rhunmwuda iran rẹnrẹn wẹẹ, ọmwa esi nọ mwẹ itohan kevbe nọ mwẹ izinegbe ẹre Jesu khin. (Mat 17:​24-27) Rhunmwuda ne Jesu na gha ya egbe taa Erhae, emwa ni lelẹe khian keghi lekpae uyinmwẹ ọnrẹn do rẹn aro ọmwa ne Jehova khin. (Jọn 14:9) Iran keghi do bẹghe ẹre wẹẹ e Jehova i khọọ, kevbe wẹẹ, ẹ i vbe tọn egbe mu vbe na ghee avbe ọkaolotu ugamwẹ ni ghaa rrọọ vbe ẹghẹ nii. Nọghayayerriọ, ọmwa nọ mu egbe rrie otọ nọ gia sikẹ ẹre Jehova khin.

5. Ma ghaa mu egbe rrie otọ vbọ khian ya ru iyobọ ne ima ya gha re ọmwa nọ gia sikẹ?

⁵ Vbe ima khian ya sẹtin ya egbe taa e Jehova hẹ? Ma ghaa mu egbe rrie otọ, ma ghi gha re ọmwa nọ gia sikẹ. Ma i khian gha gbọvo emwa ra ne ima gha ghee ẹre wẹẹ, ma maan sẹ emwa ọvbehe, ma i khian vbe gha rhie ẹmwẹ ye ẹko. Avbe uyinmwẹ vbenian gha sẹtin ya emwa gha lẹẹ ne ima. Sokpan, imuegberriotọ gha ru iyobọ ne ima ya gha re ọmwa nọ ya obọ esi mu emwa ọvbehe, nọ mwẹ izinegbe kevbe nọ yabọ, ena hia keghi re uyinmwẹ esi nọ gha ya emwa gha hoo ne iran sikẹ ima. (Kọl 3:​12-14) Te ọ wa khẹke ne ediọn gha re emwa nọ gia sikẹ. Ne emwa mieke na sẹtin gha sikẹ ediọn, te ọ khẹke na gha bẹghe iran. Ọna rhie ma wẹẹ, te ọ khẹke ne ediọn hia ne iran gha yo iko ghee mwẹ ghee ruẹ, ne iran gha te ya gha loo e videoconferencing katekate deghẹ esa i rrọọ ne iran ya ru vberriọ. Erriọ ẹre iran vbe ya hia ne iran deba etẹn winna vbe ikporhu ke owa ya sẹ owa. Ena gha ru iyobọ ne etẹn ya sikẹ ediọn, ẹghẹ nii, ẹ i khian lọghọ iran ya fannọ otọ ẹko iran ma ediọn adeghẹ emwi na de rre.

ỌMWA NỌ MWẸ AMURORO ẸRE JEHOVA KHIN

6-7. De igiemwi eso nọ rhie ẹre ma wẹẹ, e Jehova mwẹ amuroro kevbe ẹnina daa eguọmwadia ẹre?

⁶ Emwa ni tọn egbe mu i mwẹ amuroro. Sokpan, rhunmwuda ne Jehova na mu egbe rrie otọ, ọ keghi mwẹ amuroro agharhemiẹn wẹẹ, irẹn ọre ọmwa nọ yo sẹ vbe agbọn vbe ẹrinmwi. Gia guan kaẹn obọ ne Jehova ya mu ọtiẹn e Mozis ighẹ e Miriam. E Miriam vbe Erọn ẹre ọ gba gha gui ẹzọ e Mozis, nọ re ọmwa ne Jehova ya zẹ ihegbe. Nọnaghiyerriọ, e Jehova tobọre ẹre Miriam ru khọọ. Rhunmwuda ọni, ohu keghi mu e Jehova, ẹre ọ na mu emianmwẹ oti kue Miriam. Sokpan, Erọn keghi rinmwian e Mozis, e Mozis na ghi rinmwian e Jehova nọ mu ẹre egbe rran. De emwi ne Osanobua ghi ru? Osanobua ma kha wẹẹ, irẹn tae nẹ, emwi rhọkpa i khian sẹtin fi ẹre werriẹ. Rhunmwuda ne Jehova na mu egbe rrie otọ, ọ na mu e Miriam egbe rran.​—Nọm 12:​1-15.

⁷ Obọ ne Jehova ya mu Ọba ighẹ Hẹzẹkaia vbe rhie ẹre ma wẹẹ, Osa nọ mu egbe rrie otọ ẹre nọ. Ọ keghi loo akhasẹ ọghẹe ya tama Hẹzẹkaia wẹẹ, ọ gha rherhe wu. Hẹzẹkaia keghi gbe akhe eve rua, ọ na gha rinmwian e Jehova. E Jehova keghi tohan rẹn, ọ na rhie ukpo 15 ba ẹdagbọn ọnrẹn. (2 Ọba 20:​1, 5, 6) Ọghe ne ẹmwata, rhunmwuda ne Jehova na mu egbe rrie otọ ẹre ọ si ẹre nọ na mwẹ ẹnina kevbe amuroro.

8. De igiemwi eso nọ rhie ẹre ma wẹẹ, ọmwa nọ mwẹ amuroro ẹre Jesu khin? (Mak 3:​1-6)

⁸ Jesu ya egbe taa Erhae. Vbe Jesu rre uhunmwu otagbọn na, te ọ wa vbe gha rhie ẹre ma wẹẹ, irẹn mwẹ amuroro daa emwa vbe ẹkpotọ gha kie nẹẹn ya ru vberriọ. Vbe igiemwi, e Jesu keghi mu emwa egbe rran vbe Ẹdẹ Ikẹtin, agharhemiẹn wẹẹ, avbe ọkaolotu ugamwẹ ghaa gbodan ghee ẹre. (Tie Mak 3:​1-6.) Zẹvbe uhunmwuta ọghe iko vbe ẹdẹnẹrẹ, Jesu wa ye mwẹ amuroro. Vbe igiemwi, ọmwa nọ rre uwu iko gha ru orukhọ nọ wegbe, ọ keghi mwẹ izinegbe vbe egbe ẹre, nọ mieke na sẹtin fi werriẹ.​—Arhie 2:​2-5.

9. Vbe ima khian ya sẹtin gha rhie ẹre ma vbe odẹ ne ima ya roro emwi kevbe ne ima ya ru emwi wẹẹ ima mwẹ amuroro? (Vbe ya ghee avbe efoto.)

⁹ Vbe ima khian ya sẹtin ya egbe taa e Jehova hẹ? Te ọ khẹke ne ima hia ne odẹ ne ima ya roro emwi kevbe ne ima ya ru emwi gha rhie ẹre ma wẹẹ, ma mwẹ amuroro vbe na ghee Jehova. (Jems 3:17) Vbe igiemwi, evbibiẹ emọ ma hoo ne ivbi iran gha re obẹrure, ọrheyerriọ, adeghẹ iran mwẹ amuroro, iran i khian wẹẹ ne ivbi iran ru emwi ne ẹtin iran ma sẹ. Ebe Gẹnẹsis 33:​12-14 gi ima rẹn wẹẹ, ọmwa nọ ghaa mwẹ amuroro daa ivbi ẹre, ẹre Jekọb ghaa khin. Evbibiẹ emọ ni mu egbe rrie otọ kevbe ni mwẹ amuroro, i ya emwi ne ọmọ ọkpa sẹtin ru ya taa ọvbehe. Te ọ wa vbe khẹke ne ediọn gha mwẹ amuroro. Odẹ ọkpa ne iran ya ru ọnọna ọre ne iran na rhie obọ ba emwi ne eni bun sẹ vbe ẹbu ediọn tae, adeghẹ iran ma rhie obọ gberra ilele rhọkpa vbe Baibol. (1 Tim 3:​2, 3) Ma hia gha vbe sẹtin hia ne ima gha rẹn otọ vbene emwa ọvbehe ya ghee emwi, ọ gha khọnrẹn wẹẹ, ma tobọ ima ma te ghee ẹre vberriọ. (Rom 14:1) Te ọ khẹke ne emwa hia ni rre iko hia na rẹn iran “ye emwa ni mwẹ amuroro.”​—Fil 4:5.

ỌMWA NỌ MWẸ ẸBO IZINEGBE ẸRE JEHOVA KHIN

10. De odẹ eso ne Jehova he ya rhie ẹre ma wẹẹ, irẹn mwẹ izinegbe?

¹⁰ Ẹ i mwẹ aro ruẹ ma he dae wẹẹ, vbene emwa ni tọn egbe mu te zin egbe kherhe, egbe suẹn gha balọ iran nẹ. Sokpan, e Jehova i zẹdẹ yerriọ, irẹn ẹre ọ ghi rhie igiemwi nọ ghi maan sẹ ye otọ, vbọ gha de ọghe na gha mwẹ ẹbo izinegbe! Vbe igiemwi, vbe ẹghẹ Noa, e Jehova keghi kha wẹẹ, irẹn gha ya ukpo 120 zin egbe irẹn ke guọghọ emwa dan. (Gẹn 6:3) Rhunmwuda ọni, e Noa keghi miẹn ẹghẹ nọ sẹ omwa ya koko ivbi ẹre waan, irẹn vbe ẹgbẹe ọre na vbe miẹn ẹghẹ ya kan okọ. Ukpo ni bun ghi gberra nẹ, odibo ne Jehova ya zẹ ihegbe keghi gbehọkotọ danmwehọ Ebraham, vbe Ebraham ghaa nọ ọnrẹn ọta vbekpa ọguọghua ọghe Sọdọm kevbe Gomorra. Akpawẹ ọmwa nọ tọn egbe mu ẹre nọ, ọ gha te nọ Ebraham wẹẹ, ‘Ihua ẹre I khin ra, ne u na nọ mwẹ ọta?’ Sokpan, ọ keghi ya egbe taa e Jehova, ọ na fẹko gbehọkotọ danmwehọ Ebraham.​—Gẹn 18:​20-33.

11. Zẹvbe nọ rre ebe 2 Pita 3:​9, vbọzẹ ne Jehova na zin egbe vbe ẹdẹnẹrẹ?

¹¹ E Jehova ma he fi werriẹ, ọ wa ye zin egbe vbe ẹdẹnẹrẹ. Ọ wa zin egbe khẹ ẹghẹ nọ khian ya guọghọ agbọn dan na rua. Vbọzẹ? “Rhunmwuda, irẹn ma hoo ne ọmwa rhọkpa fuan, sokpan, irẹn hoo ne emwa hia roro iro fi uyinmwẹ werriẹ.” (Tie 2 Pita 3:9.) Te Jehova wa zin egbe kua kẹkan ra? Hiehie! Ẹbo emwa ni bun ẹre ọ he do khian ọsie Jehova. Ma wa vbe ya aro yọ wẹẹ, ni bun ọvbehe gha ye rre do gae. Ọrheyerriọ, izinegbe ọghe Jehova mwẹ eke nọ sẹ. E Jehova hoẹmwẹ emwa sokpan, ọna ma rhie ma wẹẹ, te ọ khian wa kie abọ rre ne iran gha yin vbene ọ rhirhi khọn iran. Ọ gha guọghọ emwa dan rua.​—Hab 2:3.

12. De vbene Jesu ya rhie ẹre ma wẹẹ, irẹn mwẹ izinegbe vbe na ghee Jehova?

¹² Jesu ya egbe taa Erhae. Ke ukpo arriaisẹn ni bun gha dee ẹre Jesu ke mwẹ izinegbe vbe na ghee Jehova. Ke ẹghẹ gha dee, Jesu wa bẹghe vbene Esu ya mu eni e Jehova kevbe ọghe eguọmwadia ẹre rhia. (Gẹn 3:​4, 5; Job 1:11; Arhie 12:10) Ọ wa vbe bẹghe vbene emwa ya rri oya ne udẹn, oya ne ẹvbi. Rhunmwuda ọni, ẹ i mwẹ ọ ma ya aro ye ẹghẹ nọ khian ya “fuẹn iwinna Esu rua”! (1 Jọn 3:8) Vbọzẹ ne Jesu na zin egbe khẹ ẹghẹ ne Jehova khian ya kpasẹ yọ, nọ fuẹn iwinna Esu rua fo fẹẹrẹ? Rhunmwuda, ne Jesu na re ọmwa nọ mu egbe rrie otọ ẹre ọ si ẹre nọ na sẹ emwi hia rae ye obọ e Jehova, ọ rẹnrẹn wẹẹ, e Jehova ọkpa ẹre ọ rẹn ẹghẹ nọ khẹke nọ khian ya mu agbọn na sẹ ufomwẹ.​—Iwinna 1:7.

13. De vbene Jesu ya rhie ẹre ma wẹẹ, irẹn mwẹ izinegbe vbe egbe avbe ukọ ọghẹe, kevbe wẹẹ, vbọzẹ nọ na gha mwẹ izinegbe vbe egbe iran?

¹³ Vbe Jesu rre uhunmwu otagbọn na, te ọ wa gha mwẹ izinegbe vbe egbe avbe ukọ ọghẹe. Vbe igiemwi, ẹghẹ hia ẹre avbe ukọ ọghe Jesu ya gha muan ẹmwẹ vbekpa ọmwa nọ sẹre vbe uwu ẹbu iran, sokpan Jesu ma gi egbe iran wọọ ọre. Nọghayayerriọ, ọ keghi mwẹ izinegbe vbe egbe iran. (Luk 9:46; 22:​24-27) Ọ kegha mwẹ ilẹkẹtin wẹẹ, ọ gha sẹ ẹghẹ iran gha fi werriẹ. U he ka ru abakuru ọkpa yan egbe yan egbe ra? Adeghẹ erriọ ẹre nọ, ẹ i mwẹ u ma gbọyẹmwẹ yọ wẹẹ, u mwẹ Ọba nọ mu egbe rrie otọ kevbe nọ mwẹ izinegbe.

14. Vbe ima khian ya gha mwẹ izinegbe hẹ?

¹⁴ Vbe ima khian ya sẹtin ya egbe taa e Jehova hẹ? Ma ghaa mwẹ “ekhọe Kristi,” ẹre ima khian na sẹtin gha roro emwi vbene Jehova ya roro emwi, ma ghi vbe sẹtin gha ya egbe taa ẹre vbe odẹ nọ ya ru emwi. (1 Kọr 2:16) Adeghẹ ima hoo ne ima gele rẹn ekhọe Kristi, te ọ khẹke ne ima tie Ebe Enẹ Ni Ta Okha Ọghe Jesu. Ma ghaa tie avbe okha na, ma ghi gele muẹn roro emwi ne Jesu ru kevbe evbọzẹe nọ na ru ẹre. Vbe deba ọni, te ọ khẹke ne ima na erhunmwu gie Jehova nọ ru iyobọ ne ima ya gha mu egbe rrie otọ kevbe ne ima gha mwẹ izinegbe vbe na ghee Jesu. Ma ghaa mwẹ ekhọe Kristi, ma ghi gha mwẹ izinegbe vbe egbe emwa ọvbehe vbene Jehova vbe ye, ma ghi vbe rẹn wẹẹ, ọ sẹtin rhie ẹghẹ ma ke sẹtin gha ru emwi vbene Jehova ya ru emwi.​—Mat 18:​26-30, 35.

ARO NỌ GHAAN ẸRE JEHOVA YA GHEE EMWA NI MU EGBE RRIE OTỌ

15. Zẹvbe nọ rre Psalm 138:​6, de vbene Jehova he ya rhie ẹre ma wẹẹ, irẹn ya aro nọ ghaan ghee emwa ni mu egbe rrie otọ?

¹⁵ Tie Psalm 138:6. Egie nọkhua ẹre emwa ni mu egbe rrie otọ wa ye, rhunmwuda ne Jehova na gbarokotọ vbe egbe iran! Gi ima guan kaẹn emwa eso ni mu egbe rrie otọ ne Jehova mu uyi ye ọre egbe vbe ẹghẹ nẹdẹ. Emwa ni bun ma rẹn eso vbe uwu iran na, sokpan okha ọghe iran rre Baibol. E Jehova keghi loo e Mozis ya gbẹn eni e nọsi ọkpa na tie ẹre Dẹbora nọ ghaa rrọọ vbe ẹghẹ nẹdẹ ye Baibol. Ọ rrie odẹ ukpo 125 nọ ya winna vbe igiowa ọghe Aizik kevbe ọghe Jekọb! Agharhemiẹn wẹẹ, a ma mobọ rẹn emwi ni bun vbekpa okhuo esi na, e Jehova keghi gia miẹn wẹẹ, a gbẹn eni ẹnrẹn ye Baibol, nọ rhie ẹre ma wẹẹ, e Jekọb vbe ẹgbẹe ọre hoẹmwẹ ọnrẹn. (Gẹn 24:59; 35:8) Ukpo ni bun ghi gberra nẹ, e Jehova keghi ma e Devid ọba ọghe Izrẹl, vbe ẹghẹ na kha na, ọvbokhan nọ ye su ohuan erhae ẹre ghaa nọ. (2 Sam 22:​1, 36) Vbe a wa da biẹ e Jesu, Osanobua keghi gie avbe odibo ọghẹe ne iran ya mu uyi ye avbe ọsuohuan eso egbe, ọ na gi iran gha re emwa okaro ni rẹnrẹn wẹẹ, a biẹ e Mezaia vbe Bẹtlẹhẹm. (Luk 2:​8-11) Vbe Josẹf vbe Meri mu Jesu gha rrie ọgua Osa, e Jehova keghi kie ẹkpotọ ne Simiọn kevbe Anna ni khian ọmaẹn nẹ ya miẹn Ovbi ẹre ighẹ e Jesu. (Luk 2:​25-30, 36-38) Vbene ẹmwata, “agharhemiẹn wẹẹ, ehe ne Jehova ye vbe odukhunmwu yo ẹsẹsẹmwẹse, ọ keghi gbarokotọ vbe egbe emwa ni mu egbe rrie otọ”!

16. De vbene Jesu ya rhie ẹre ma wẹẹ, obọ ne Erhae ya mu emwa ọvbehe ẹre irẹn vbe ya mu iran?

¹⁶ Jesu ya egbe taa Erhae. Jesu wa vbe ya aro nọ ghaan ghee emwa ni mu egbe rrie otọ vbene Jehova vbe ye. Ọ ma “emwa kẹkan ni ma yo owebe” ẹmwata vbekpa Arriọba Osanobua. (Iwinna 4:13; Mat 11:25) Ọ vbe mu emwa ni khuọnmwi egbe rran, odẹ nọ ya mu iran egbe rran keghi ya iran rẹn wẹẹ, ọ hoẹmwẹ iran. (Luk 5:13) Vbe asọn nọ gbe fi ẹdẹ nọ wu, e Jesu keghi kpe avbe ukọ ọghẹe owẹ, iwinna ọviẹn ọmwa ẹre ọna ghaa khin. (Jọn 13:5) Vbene ọ te kpa gha rrie ẹrinmwi vbe ọ ghi rhiọkpaegbe nẹ, ọ keghi mu uyi ye erhuanegbe ẹre hia egbe, ya sẹ egbe ima ni rrọọ vbe ẹdẹnẹrẹ, ọ na mu iwinna nọ ghi hin usi sẹ ne ima, ọni ọre ne ima ru iyobọ ne emwa ya sẹtin do gha mwẹ arrọọ ọghe etẹbitẹ.​—Mat 28:​19, 20.

17. Vbe ima khian ya sẹtin gha mu uyi ye emwa ọvbehe egbe? (Vbe ya ghee efoto.)

¹⁷ Vbe ima khian ya sẹtin ya egbe taa e Jehova hẹ? Adeghẹ ima i lele ehe ne emwa ke rre, ra vbene iran yo owa ebe sẹ hẹ vbe ima ghaa kporhu, te ima rhie ẹre ma wẹẹ, ma mu uyi ye iran egbe. Ọ gha khọnrẹn wẹẹ, ọ mwẹ emwi eso ne ima kakabọ guẹ ra iwinna eso ne ima ru vbe otu e Jehova, te ọ ye khẹke ne ima gha ghee ẹre wẹẹ, etẹn ima sẹ ima, ma gha ru vberriọ te ima rhie ẹre ma wẹẹ, ma mu uyi ye iran egbe. (Fil 2:3) Adeghẹ ima na gha “mu asanikaro” vbọ gha de ọghe na gha mu uyi ye emwa ọvbehe egbe vbe odẹ vbenian ra odẹ ọvbehe, ẹko ghi wa gha rhiẹnrhiẹn e Jehova.​—Rom 12:10; Zẹf 3:12.

18. Vbọzẹ ne u na hoo ne u gha mu egbe rrie otọ vbe na ghee Jehova?

¹⁸ Ma ghaa ya egbe taa Erha ima nọ rre ẹrinmwi vbe odẹ nọ ya mu egbe rrie otọ, ma ghi gele do gha re emwa nọ gia sikẹ, nọ mwẹ amuroro kevbe nọ mwẹ izinegbe. Ma ghi vbe sẹtin gha mu uyi ye emwa egbe vbene Jehova vbe ru ẹre. Adeghẹ ima na gha hia vbene ẹtin ima sẹ ne ima gha ya egbe taa e Jehova nọ re Osa nọ mu egbe rrie otọ, ọ ghi gha ya aro nọ ghaan ghee ima!​—Aiz 43:4.