Itan

1 Avbe itan e Sọlomọn ne ovbi e Devid ne ọba Izrẹl 2 Avbe itan ne u gha ya rẹn ẹwaẹn kevbe ibude esi, ẹre ena khin, u gha vbe yae rẹn otọ avbe ẹmwẹ nọ mwẹ emwi nọ dinmwi na yae kha. 3 Iran gha sẹtin ma ruẹ vbene a ya ya ẹwaẹn yin agbọn hẹ, vbene a ya mwẹ uyinmwẹ a i zẹ ibeleku hẹ, ẹmwata kevbe a ya obọ ọkpa mu emwa hia. 4 Iran gha sẹtin ya ọmwa nọ ma rẹn emwi rhọkpa khian nọ gu ẹwaẹn. Ọ ghi ya avbe igbama gha mwẹ irẹnmwi, ọ ghi vbe ya iran gha roro emwi ẹse. 5 Ọmwa nọ mwẹ ẹwaẹn ghaa danmwehọ, ọ ghi gha rẹn emwi ba emwi. Ọmwa nọ rẹn otọ emwi, ẹre ọ khian sẹtin rhan obọ miẹn adia nọ maan. 6 Vbene a gha na miẹn wẹẹ, iran ghi sẹtin gha rẹn ẹmwẹ ni dinmwi na ya itan ta, kevbe avbe ọta ni lọghọ ne avbe umẹwaẹn nọ. 7 Ọmwa nọ hoo nọ gha wan, ọ ghi ka gha ya ọghọ ne Jehova nẹ. Avbe ọzuọ i zẹdẹ da ne ẹwaẹn, iran i vbe hoo ne iran ruẹ emwi. 8 Ovbimwẹ, u ghi gha danmwehọ ẹmwẹ ne erhaa kevbe iyuẹ tama ruẹ. 9 Emwi ne iran ma ruẹ re gha dọlọ uyinmwẹ ruẹ yi, zẹvbe ne emwi na ya te egbe ọghe uhunmwu, kevbe ọghe eyaẹn, dọlọ egbe ne u mu yi. 10 Ovbi mwẹ, emwa orukhọ ghaa hoo ne iran rẹrẹ ruẹ, ghẹ kue yọ. 11 Adeghẹ iran khare wẹẹ, “Larre, gi ima ya gualọ orhiọnkpa na gbẹe rua. Wa gia ya gu emwa eso ni ma ru emwi rhọkpa gbinna, ne ima miẹn ogiẹ giẹ. 12 Iran sẹtin gha rre agbọn, egbe ghi vbe rran iran vbe ima gha miẹn iran, sokpan, ma gha ghi gu iran do ẹre fo nẹ, iran ghi gha re ikun orinmwi. 13 Ma gha miẹn ẹfe ughughan ni bun, ma ghi ya emwi na furu vuọn owa ima. 14 Do deba ima, ne ima hia gba ghae emwi ne ima do viọ.” 15 Ovbi mwẹ, ghẹ gu emwa vberriọ mu obọ. Gban egbe ne iran. 16 Iran i sẹtin zin egbe ne iran ghẹ ru emwi dan. Iran wa mu egbe vbe ẹghẹ hia ne iran do izigha. 17 Ẹ i mwẹ esa na gha rhuẹ ifi ahianmwẹ vbene ahianmwẹ na rhuẹ ọre khẹ ghee ọmwa. 18 Sokpan, emwa vberriọ, egbe iran ẹre iran rhuẹ ifi khẹ, ifi ne iran khian wulo yi. 19 Ẹmwẹ oyi na rha, ẹre oyi lele rrie, emwi na ẹre ọ sunu vbe egbe ọmwa nọ yin uyinmwẹ ika. 20 Ẹwaẹn ọghe ẹmwata go tie emwa vbe adesẹ orere kevbe ada. 21 Ọ tọn urhu mu gha tie emwa vbe onurho ẹvbo kevbe ehe ne emwa ghi na gbe ẹbu, ọ wẹẹ, 22 “Wa ne akpa! Inu ẹghẹ wa hoo ne uwa ya gha re akpa? Inu ẹghẹ wa ra ghọghọ ye irẹnmwi ne uwa ya gbogiẹ la? Wa i ra ruẹ emwi ẹdẹdẹmwẹdẹ ra? 23 Wa gha danmwehọ vbe a gha gu uwa gui. I gha rhie ibude esi ne uwa, I ghi vbe ghae ne uwa vbe uwu irẹnmwi mwẹ. 24 Ọ kpẹre ne I kegha tie uwa, I na wẹẹ ne uwa gha dee, sokpan wa ma danmwehọ. Wa ma zẹ yọmwẹ ẹre. 25 Wa fi iyeke gbe ibude mwẹ hia, wa ma vbe kue yọ wẹẹ ne I dia uwa ye odẹ. 33 Sokpan, ọmwaikọmwa nọ rhie ehọ mẹ ta yi, ẹkun gha sẹ ọre otọ. Ọ gha rrọọ vbe a i mwẹ ẹbe, vbe ne emwi i na vbe rrọọ ne ọ gha gie ohan gha mu ẹẹn.”