Itan

2 Ovbi mwẹ, gha ruẹ emwi ne I ma ruẹ re, ghẹ vbe mianmian emwi ne I tama ruẹ ne u gha ru. 2 Gha danmwehọ ẹmwẹ ẹwaẹn, u ghi vbe gha hia ne u rẹn emwi na yae kha; 3 Yevbesọni, gha hia ne u gha rẹn otọ emwi, u ghi vbe gha hia vbe odẹ ke odẹ ne u sẹtin gha ghee umian emwi; 4 U ghaa ya ẹtin hia gualọ ẹre, vbene u gha ya gualọ esiliva, ra emwi ighobioye na rhie lẹre; 5 U gha do rẹn emwi na yae kha, na gha mu ohan e Jehova, u ghi vbe do gha mwẹ irẹnmwi ọghe Osanobua. 6 E Jehova tobọre ẹre ọ rhie ẹwaẹn ne ọmwa. Obọ ọre ẹre ẹwaẹn kevbe irẹnmwi ke rre. 7 Ọ rhie iyobọ kevbe ugue ne iran ne emwa ata, nẹi fi ibeleku. 8 Ọ degue iran ni ya obọ esi mu emwa ọvbehe, ọ ghi vbe gha khẹ odẹ ne iran ni gu obọ ẹre. 9 U gha rhie ehọ mẹ ta yi, u gha rẹn emwi nọ gbae, nọ kere kevbe ne ọ khẹke. 10 U ghi do gha wan, irẹnmwi ruẹ ghi vbe gha sẹ ruẹ ọyẹnmwẹ 11 Vbene u roro emwi hẹ gha gbogba ga ruẹ, vbene u rẹn otọe emwi hẹ, ghi tan obọ gue ruẹ. 12 Ẹ i ghi vbe ya ruẹ ru emwi nọ ma gba. Iran gha ru iyobọ nuẹn ya gha gban egbe ne emwa ni ya ẹmwẹ ne iran ta fian otighi fi emwa egbe. 13 Avbe emwa ni sẹ emwi ẹmwata na ru rae ne iran ya gha rre uwu ebiebi orukhọ. 14 Emwa ne iba na zẹ wa yẹẹ, kevbe ne uyinmwẹ ọzuọ ya ẹko ẹre rhiẹnrhiẹn. 15 Avbe ọgueva nẹi gia mu ẹtin yan. 16 U gha sẹtin yangbe avbe ikhuo ni ku ogboi ni te hoo ne iran ya aranmwẹ ne miẹnmiẹnmiẹn si ruẹ kẹ egbe. 17 Okhuo nọ ma gu obọ ọdọ ẹre, ọ na vbe mianmian ile ọghe Osa ọghẹe. 18 U gha la owa ẹre, odẹ uwu ẹre u gbẹn nii. Ọmwa gha wẹ rẹn rrie evba, eke ne emwa ni wulo nẹ ye ẹre ọ rrie nii 19 A i miẹn ọmwa nọ yo owa ẹre, nọ miẹn uhunmwu ya ke ẹre rre. Ẹ i ghi dọlegbe ya owẹ kaan odẹ nọ rrie agbọn. 20 Rhunmwuda ọni, u ghi gha ya egbe taa emwa esi, ne u gha yin uyinmwẹ esi. 21 Emwa ẹmwata kevbe emwa ni rẹn enegbe, gha yin otọ agbọn na. 22 Sokpan, Osanobua gha sanmwẹ emwa dan hin otọ nii rre, ọ ghi vbọlọ avbe emwa orukhọ ladian vbọ, zẹvbe na vbọlọ irunmwu hin otọ rre.