Ẹsta

13 Zẹvbe ne ọba ru ẹre, emwi nọ ghi dekaan ẹmwẹ uhi kevbe emwi uhẹn nẹ, te ọ nọ iran ni rẹn emwi dinmwi ẹsẹse vbẹne iran roro ẹre yi, rhunmwuda ọni, ọ keghi gie na tie iguọbaziro ẹre, emwa ni gha rẹn vbene a gha ru emwi na hẹ. 14 Iran nọ mobọ tie ye egbe iro vberriọ kegha re Kasiena, e Sieta, Admata, e Tasis, e Meres, e Masena, kevbe Memukan—iran ihinrọn ni rre asẹ vbe Pẹsia kevbe Midia, emwa ni rre ukpo ni yo sẹ vbe otọ arriọba nii. 15 Ọ keghi tama emwa na wẹẹ, “Mẹ ne Kzakzis ne Ọba, keghi gie avbe eguọmwadia mwẹ gie Vasti ne Oloi, ọ keghi fieghe uhunmwu ye ẹmwẹ nii. Vbe uhi a kha wẹẹ na ru ẹre re?” 16 Ẹre Memukan na tama ọba kevbe ekhaẹmwẹ ọnrẹn wẹẹ, “Ẹ i re ọba ọkpa ẹre Vasti ne Oloi yaghae na, sokpan kevbe avbe ekhaẹmwẹ ọnrẹn kevbe ikpia hia ni rre otọ arriọba na. 17 Okhuo ke okhuo vbe otọ arriọba na, nọ ghi họn emwi ne Oloi ru na nia, ẹ i ghi ghee ọdọ ẹre sẹ ọmwa. Iran ghi gha tae wẹẹ, ‘Kzakzis ne Ọba gie na tie Vasti ne Oloi, ọ ma yo.’ 18 Avbe amwẹ ekhaẹmwẹ ọba ni rre Pẹsia kevbe Midia gha miẹn emwi ya gha kpe ọdafẹn iran ofi babanna. A i ghi miẹn okhuo nọ ghi ra gha ya ọghọ ne ọdọ ẹre, avbe ọdọ ghi do gha mu ohu amwẹ iran. 19 Adeghẹ ọ yẹẹ ruẹ vbenian Umogun, ya asẹ ọghe ọba tae ladian wẹẹ ne Vasti ghẹ ghi ya aro kaan ruẹ aro. U ghi rhie ukpo ẹre zẹvbe Oloi ne okhuo ọvbehe nọ maan sẹ ọre. 20 A gha na iyẹn ẹmwẹ ne u tae na ma emwa hia vbe otọ arriọba nọkhua na, dọmwadẹ okhuo ghi gha rhie ọghọ nọ kere ne ọdọ ẹre, ọre ọdafẹn nọ ra ovbiogue.” 21 Ẹmwẹ na keghi wa yẹẹ ọba kevbe ekhaẹmwẹ ọnrẹn, ọ keghi ru vbene Memukan zẹ iro ẹre. 22 Ọ keghi gie uhunmwu vbe ẹvbo ne iran zẹ kevbe vbene iran ya gbẹn emwi, gha rrie dọmwadẹ ehe na ghae otọ arriọba nii yi wẹẹ, dọmwadẹ ọdọ ẹre ọ khian gha re ọdafẹn nọ yan owa ẹre, ẹmwẹ nọ tae ẹre ọ gha vbe gha re ọfo ye ẹmwẹ hia.