Ẹzra

1 Vbe ukpo nokaro ne Sairọs ya gha re ọba e Pẹsia, e Jehova keghi ru ẹre ne ẹmwẹ nọ la unu e Jerimaia ne akhasẹ ta do sẹ. Ọ keghi rhie ẹre ye Sairọs ekhọe, nọ ta ẹmwẹ na ladian kevbe nọ gbẹnnẹ ọnrẹn, na vbe tie ẹre ma emwa hia, vbe otọ arriọba ẹre hia wẹẹ: 2 Ẹmwẹ ne Sairọs ne Ọgbaisi ọghe Pẹsia tae ẹre ọna khin, E Jehova ne Osanobua ọghe ẹrinmwi ẹre ọ ya mwẹ ru nọ khaemwisẹ yan uhunmwu otagbọn hia, ọ keghi vbe yae waa iwinna mẹ wẹẹ ne I bọ Ọgua Osa ne irẹn vbe Jerusalẹm nọ rre Juda. 3 Osanobua gha gu uwa hia ni re emwa rẹn gha rrọọ. Wa ghi do gha rrie Jerusalẹm nọ rre Juda, ne uwa ya werriegbe bọ owa ọghe Jehova, ne Osanobua Izrẹl, irẹn ọre Osanobua ọghe ẹmwata, ne owa ẹre rre Jerusalẹm. 4 Adeghẹ arhunmwu eso vbe uwu emwa rẹn ni rre iwe na gualọ iyobọ nọ gha ya dọlegbe gha rrie owa, emwa ẹdogbo ẹre ghi ru iyobọ na ne iran. Iran ghi viọ esiliva kevbe igoru ne iran, evbare kevbe aranmwẹ na ya kun ihẹ, deba emwi imuohan, ne iran gha viọ ladian vbe Ọgua Osa ọghe Osanobua vbe Jerusalẹm.” 5 Ẹkpo nii, ẹre avbe ọka ẹgbẹe ni rre ẹwae ni rre Juda kevbe Bẹnjamin, avbe ohẹn kevbe avbe Ivbi e Livai, deba emwa ọvbehe hia ne Osanobua ghi rhie ẹre ye ọre ekhọe, na mu egbe, ne iran do ya bọ Ọgua Osa ọghe Jehova nọ rre Jerusalẹm. 6 Emwa ni rre ẹdogbo nii hia keghi yi iran obọ, vbene iran na viọ emwi nibun ne iran: emwi na ya le evbare ọghe esiliva, igoru, evbare, aranmwẹ ni mu ihẹ, emwi ewe ọvbehe kevbe emwi na ya ru izọhẹ vbe Ọgua Osa.