Ẹzra
58 Ivbi uniẹn iran ni winna vbe Ọgua Osa, kevbe eguọmwadia e Solomọn ni ke imu rre hia kegha re erẹnrẹn i rrọọ vbe arria eva (392). 59 Iran ni ke Tẹl-Mela, Tẹl-Hasia, e Kerub, Adan kevbe Imẹ rre, ni ma sẹtin rhan otọ re wẹẹ Ivbi Izrẹl ẹre iran khin, ẹre ena khin: 60 Ivbi ẹwae Delaia, Tobaia kevbe Nẹkoda kegha re eva yan ekigbesiyeha yan arria eha (652). 61 Vbe uwu ivbi avbe ohẹn: ivbi e Hẹbaia, ivbi e Hakọz kevbe ivbi e Bazilai, ivbi ẹwae Bazilai ne ovbi e Giliad ẹre ọ na rhie okhuo, ẹre ọ na wa gha khuẹnniẹn eni ẹwae erha ọvbokhan rẹn. 62 Iran na ma miẹn ehe na gbẹn ọnrẹn yi, uniẹn ne iran ke rre, rhunmwuda ọni, a ma ka iran ba avbe ohẹn. 63 Ovbi e Ju nọ khaevbisẹ keghi tama iran wẹẹ ne iran ghẹ rri evbare na ya zọ ese gie Osa, a te do miẹn ohẹn nọ gua loo e Urim kevbe Tumim. 64 Emwa ni ghi wa ke imu rre hia kegha re iyeva i rrọọ vbe arria eva yan arriaisẹn eva yan iyeva (42,360). 65 Eguọmwadia iran nikpia kevbe nikhuo kegha re ihinrọn yan ọgban yan iyisẹn eha yan arriaisẹn ihinrọn (7,337). Ikpia kevbe ikhuo ni ghaa so ihuan kegha re uri (200). 66 Ẹsin ọghe iran kegha re enẹ i rrọọ vbe iyeva yan iyisẹn ihinrọn (736). Ẹmila ọghe iran kegha re isẹn yan iyeva yan uri (245). 67 E Kamẹl ọghe iran kegha re isẹn i rrọọ vbe iyeva yan arria eva (435). Ekẹtẹkẹtẹ ọghe iran kegha re ugie yan iyisẹn ihinrọn yan arriaisẹn ehan (6,720). 68 Iran ni ke imu rre ghi sẹ ehe ne Ọgua Osa ọghe Jehova ye vbe Jerusalẹm, eso vbe uwu avbe ọkaolotu ẹwae vbọ keghi viọ emwi izọhẹ rre, na ya ru iyobọ ya bọ Ọgua Osa ye ehe nọ ka ye. 69 Iran keghi zẹ ọhẹ ne obọ iran gba re hia ye iwinna na, ehia kegha re edrakma ọghe igoru arriaisẹn ọkpa yan iyeha (61,000), e maina ọghe esiliva arriaisẹn isẹn (5,000) kevbe ukpọn ọghe ohẹn iyisẹn (100). 70 Avbe ohẹn kevbe avbe Ivbi e Livai deba eso vbe uwu avbe emwa nii, avbe ọsihuan, iran ni khẹ Ọgua Osa, kevbe iran ni winna vbe Ọgua Osa keghi yin ẹvbo iran, avbe Ivbi Izrẹl ni dekẹe keghi ya yin ehe ne avbe erha iran odede ka gha ye.