1 Ọba

5 Na kha na, Adonaija ne ovbi e Hagit, kegha tọn egbe mu, ọ na gha kha wẹẹ. “Mẹ ẹre ọ khian gha re ọba!” Ọ keghi dẹlẹ ikeke okuo kevbe ẹsin ne egbe ẹre, deba orhunmwu ekigbe siyeha ni lelẹe khian. 6 E Devid ma he vbe zẹ ọkan guẹ ere gui ye emwi rhọkpa ẹdẹ. Ọ keghi dẹlẹ ikeke okuo kevbe ẹsin ne egbe ẹre, deba arhin ekigbe siyeha ni lele ẹre khian. 7 Ọ keghi gu e Joab guan ne ovbi e Zeruaia kevbe Abiata ne ohẹn, iran keghi kue yọ wẹẹ iran gha viọ obọ ye ọre iyeke vbe emwi nọ khian ru. 8 Sokpan, e Zadọk ne ohẹn, e Benaia ne ovbi Jehoaida, e Natan ne akhasẹ, e Simẹi, e Rei kevbe emwa ne Devid ya khẹ egbe, ma yobọ ye Adonaija re. 28 E Devid ne ọba keghi kha wẹẹ, “Uwa tama e Batsiẹba nọ dọlegbe la owa.” Irẹn keghi gha dee do mudia ye odaro ọba. 29 Ọba keghi tama rẹn wẹẹ, “Te I ya eni e Jehova nọ rrọọ, ọmwa nọ yuo mwẹ hin uwu ọlọghọmwa mwẹ hia rre vẹn ihẹn wẹẹ, 30 ẹdẹnẹrẹ na I gha muẹn sẹ ighẹ eyan ne I ya eni e Jehova ne Osanobua ọghe Izrẹl yan ma ruẹ wẹẹ, e Solomọn ne ovbuẹ ẹre ọ khian rri ọba lele mwẹ.” 31 E Batsiẹba keghi vbokho uhunmwu rriotọ, ọ wẹẹ, “Enaẹmwẹ ne ọba gha tọ, ọ kpẹre.” 32 Ẹre Devid ne ọba na wẹẹ na tie Zadọk, e Natan kevbe Benaia rre. Iran keghi la owa. 33 Ọba keghi tama iran wẹẹ, “Uwa viọ avbe ukọ ne iwẹguae mwẹ ba egbe, uwa mu e Solomọn ne ovbi mwẹ yan ekẹtẹkẹtẹ mwẹ, nọ hin ẹnrẹn ne uwa lelẹe gha rrie Ẹzẹ e Gihọn, 34 ne Zadọk kevbe Natan ma ẹre ọba Izrẹl vbe evba, iyeke ọni, uwa ghi kpe okpe ne uwa datu wẹẹ, ‘E Solomọn ne ọba gha tọ, ọ kpẹre.’ 35 Wa ghi dọlegbe lele ẹre gha die emwana, nọ do tota ye ẹkete mwẹ, Rẹn ẹre ọ gha rriọba lele mwẹ rhunmwuda rẹn ẹre I zẹẹ nọ gha khaevbisẹ yan Izrẹl kevbe Juda. 36 E Benaia keghi kha wẹẹ, “Te a gha ru ẹre, te Jehova ne Osanobua ruẹ gha vbe so igiẹ yọ. 37 Zẹ vbene Jehova yaba ruẹ, umogun, te ọ gha vbe yaba e Solomọn vberriọ, te ọ gha ya ẹkete ọghẹe khian nọ mwẹ uyi sẹ ọghe Devid ne arowa mwẹ. 39 E Zadọk keghi mu emwi na sa ori oliv yi, nọ rhie ke Owa Ukpọn rre, ọ keghi sae yan e Solomọn. Iran keghi kpe okpe, emwa hia keghi datu wẹẹ, “E Sọlomọn ne oba gha tọ, ọ kpẹre.” 40 Ẹre iran hia na dọlegbe lelẹe gha dee, iran kegha wee uwemwe oghọghọ, iran na gha kpe ẹrere, iran keghi wee sẹrriọ wẹẹ, te otọ ghaa mu rueghe. 52 E Solomọn keghi wanniẹn wẹẹ, “Adeghẹ ọ ma sọtẹ, ai vbe ye obọ kan ẹre ukpeto ọkpa vbe uhunmwu, sokpan ọ gha sọtẹ, te ọ gha wu.” 53 E Solomọn ne ọba keghi gie na tie Adonaija, ọ na wẹẹ na ya rhie ẹre ke ogiukpo gha dee, Adonaija keghi bu ọba gha khian, ọ na vbokho uhunmwu rre vbe odaro ẹre. Ọba keghi khama rẹn wẹẹ, “U sẹtin gha rrie owa.”