Gẹnẹsis

1 Vbe ẹghẹ omuhẹn, Osanobua keghi yi agbọn kevbe ẹrinmwi. 10 Irẹn keghi tie otọ nii Agbọn, ọ keghi tie amẹ na si koko nii Okun. Emwi ne Osanobua bẹghe keghi sẹ ọre ọyẹnmwẹ. 12 Emwi hia keghi zọ ke otọ rre. Emwi ne Osanobua bẹghe keghi sẹ ọre ọyẹnmwẹ. 21 Ẹre Osanobua na do yi avbe aranmwẹ nikhua ye uwu okun kevbe avbe aranmwẹ hia ni rre uwu amẹ kevbe ahianmwẹ, ọ keghi yi dọmwadẹ iran ughughan. Osanobua keghi bẹghe ẹre wẹẹ, emwi ne irẹn yi wa maan. 25 Ẹre Osanobua na do yi avbe aranmwẹ oha ye agbọn, ọ keghi yi dọmwadẹ iran ughughan; ọ na vbe yi avbe emwi irri, ọ keghi yi dọmwadẹ iran ughughan; Ọ na vbe yi avbe aranmwẹ ni hiọrọ kevbe ni sun, ọ keghi vbe yi dọmwadẹ iran ughughan. Osanobua keghi bẹghe ẹre wẹẹ, emwi ne irẹn yi wa maan. 26 Osanobua keghi kha wẹẹ, “Banbanna nian, gi ima do yi ọmwa nọ yevbe ima, ọ ghi khọ ima. Iran ghi gha mwẹ asẹ yan avbe ehẹn ni rre uwu okun, kevbe avbe ahianmwẹ ni tin vbe iso, kevbe avbe emwi irri, kẹ kevbe avbe aranmwẹ ni sun kevbe ni hiọrọ.” 27 Ẹre Osanobua na ghi yi ene okpia nọ yevbe irẹn, ọ keghi yi ẹre nọ gha yevbe irẹn tobọ irẹn; ọ keghi yi iran okpia vbe okhuo. 28 Ẹre Osanobua na ghi fiangbe iran, ọ na tama iran wẹẹ, “Wa gha biẹlẹ ne uwa gha muan yọ, ne uwa gba ehe hia vbe agbọn, ne uwa gha khaevbisẹ yan avbe ehẹn ni rre okun, avbe ahianmwẹ ni tin vbe iso kevbe avbe aranmwẹ hia ni rre uhunmwu otagbọn.” 29 Ẹre Osanobua na kha wẹẹ: “I rhie avbe ikpẹ ọmọ erhan kevbe avbe ọmọ erhan hia ne uwa, ne uwa gha re.