Gẹnẹsis

2 A keghi do yi otọ kevbe iso fo kevbe emwi hia ni rre uwu ẹre. 2 Vbe ikpẹdẹ nogie ihinrọn, Osanobua keghi winna iwinna nọ ghaa winna hia fo, ọ keghi dobọ iwinna yi. 3 Irẹn keghi fiangbe ikpẹdẹ nogie ihinrọn, ọ keghi zọe yotọ zẹvbe ẹdẹ kpataki, rhunmwuda ẹdẹ ne ẹdẹrriọ ẹre ọ winna iwinna emwi nọ yi fo, ọ na dobọ iwinna yi. 15 Ẹre Osanobua e Jehova na rhie okpia nii, ye uwu ogba Idẹni nọ gha gbe ugbo kevbe nọ gha gbaroghe ẹre. 17 Sokpan ọni nọ rhie ẹwaẹn na ya rẹn emwi nọ maan kevbe nẹi maan ne ọmwa, ghẹ rri ọmọ rẹn. U gha rri ọre, u gha wu ẹdẹ ne ẹdẹrriọ. 18 Ẹre Osanobua ne Jehova na kha wẹẹ, “Ọ ma kei ne okpia na vbe ehi ẹre ọkpa kẹkan gha rrọọ. I gha yi ogieva ẹre nọ maẹn rhie nẹẹn nọ gha yi ọre obọ.” 22 E Jehova keghi ya ifẹnmwaguẹ nọ rhie vbe egbe okpia ya ma okhuo, ọ na rhie ẹre bu ẹre gha dee. 23 Ẹre okpia nii na kha wẹẹ, “A vbe miẹn ne ima gba re ọkpa, ugboloko na rhie vbe ugboloko mwẹ kevbe ifun na rhie vbe ifun mwẹ. Okhuo ẹre a khian gha tie ẹre, rhunmwuda, egbe okpia ẹre ọ ke rrẹ.” 24 Ọna ẹre ọ si ẹre ne okpia gha na sẹ erhae kevbe iyẹe rae, ọ ghi rhikhan mu ọvbokhan rẹn, iran eva ghi do gha re ọkpa