Vbene Ẹmwẹ Osanobua Khian Ya Ru Iyobọ Ne Emwa Ni Lẹẹ Hin Ẹvbo Iran Rre!

Ẹbo emwa ni bun ẹre ọ lẹẹ hin ẹvbo iran rre vbe ukpo ukpo. Egbe ọlọghọmwa vbenian ẹre uwẹ vbe la gberra ra? Deghẹ erriọ nọ, gha mwẹ ilẹkẹtin wẹẹ, ọmwa rrọọ nọ gha ru iyobọ nuẹn​—Osanobua yan rẹn wẹẹ, emwi gha dunna vbe odaro, ma gha sẹtin miẹn avbe eyan na vbe uwu Ebe Nọhuanrẹn.

Emwa ni lẹẹ hin ẹvbo iran rre wa gualọ iyobọ ẹgiẹgiẹ, sokpan, a ghi vbe gi iran rẹn wẹẹ . . . emwi hia gha maan.” a Ọna ọre ẹmwẹ ne Christos Stylianides, nọ ghaa re commissioner vbe European Unionb tae. Ọmwa gha rẹn wẹẹ, emwi gha maan, ọ ghi gha ghọghọ. Sokpan, ẹ i re ọni ọkpa ẹre ọ khian ru iyobọ ne emwa ni lẹẹ hin ẹvbo iran rre, iran vbe gualọ ifuẹko.

“Vbe I lẹẹ hin ẹvbo mwẹ rre, I keghi sẹ ẹgbẹe mwẹ rae, ọ na yevbe na miẹn wẹẹ, ọghomwẹ fo nẹ. Ohan na kakabọ gha mu mwẹ, osi na gha si mwẹ, I ma ghi vbe gha ghọghọ.”​—Emmanuel, Haiti.

Erriọ vbe ye ne uwẹ ra? Deghẹ u lẹẹ hin ẹvbo ruẹ rre, ẹ i mwẹ ne u ghẹ gha gualọ ifuẹko kevbe emwi nọ gha rhie ilẹkẹtin nuẹn. De vbene Baibol khian ya ru iyobọ nuẹn hẹ?

E Baibol Fu Ima Ẹko Rre

E Baibol khare wẹẹ: “E Jehovac . . . hoẹmwẹ avbe erhunmwuyẹn.”​— Diuteronomi 10:17, 18.

E Baibol khare wẹẹ: “E Jehova sikẹ iran ni kpee tie ẹre.”​—Psalm 145:18.

E Baibol khare wẹẹ: “Osanobua ne Udazi i ru emwi dan, ẹ i vbe ru ọmwa rhọkpa emwi nọ ma ke.”​—Job 34:12.

Ọna rhie ma wẹẹ, ẹ i re Osanobua ẹre ọ si ẹre ne u na rri oya. Ẹ i re te ọ rri ruẹ oya, rhunmwuda wẹẹ, ọ hoo nọ danmwẹ ruẹ ghee.

E Baibol Wẹẹ Emwi Hia Gha Maan

E Baibol tama ima emwi ne Osanobua khian ru ne ima vbe odaro. Gi ima ghee vbene ọna ya ru iyobọ ne emwa ni lẹẹ hin ẹvbo iran rre.

E Baibol khare wẹẹ: “[Osanobua] gha khiẹn ameve hia hin aro iran rre. Uwu i khian ghi gha rrọọ, ra akhiẹ ra eve ra obalọ.”​—Arhie Maan 21:4.

Ọna rhie ma wẹẹ, usẹ i khian ghi gha rrọọ. Osanobua yan rẹn wẹẹ, irẹn gha sẹ ọfurre ye ọlọghọmwa hia ne ima la gberra.

“I rẹnrẹn wẹẹ, Osanobua gha rherhe dobọ uyinmwẹ agbọmwa ekueku yi, kevbe emwi dan ni sunu lẹga ima. Ọna ru iyobọ mẹ ya rhie aro tua ẹghẹ ne ọlọghọmwa hia khian ya fo.”​—Karla, El Salvador.

E Baibol khare wẹẹ: “A gha mianmian emwi ni sunu vbe ẹghẹ nọ gberra hia fẹfẹfẹ.”​—Aizaia 65:17.

Ọna rhie ma wẹẹ, ma i khian ghi gha ye ẹre rre avbe emwi dan ni ka sunu daa ima. Osanobua gha ru ẹre ne avbe emwi dan ni ka sunu daa ruẹ ghẹ ghi gha kpokpo ruẹ vbe orhiọn.

“E Baibol wẹẹ, vbe odaro ma gha mianmian obalọ ne ima he miẹn kevbe emwi ni he wii ima. Ọna keghi ru iyobọ mẹ ya zin egbe rhunmwuda, I rẹnrẹn wẹẹ, emwi hia gha rherhe fi werriẹ.”​—Natalia, Ukraine.

E Baibol khare wẹẹ: “Osanobua ẹrinmwi gha mu arriọba nẹi khian fo vbe otọ gbọọ . . . irẹn gha fuẹn avbe arriọba nii fẹẹrẹ.”​—Daniẹl 2:44.

Ọna rhie ma wẹẹ, arriọba Osanobua gha ke ẹrinmwi gha kha yan uhunmwu otagbọn na. Osanobua gha ya arriọba ọghẹe nọ rre ẹrinmwi rhie ihe arriọba emwa nagbọn. Arriọba na gha ru ẹre ne ọfunmwegbe kevbe agbẹkunsotọ gha rre ehe hia, a i khian gha bu ohiẹn ku, emwi ghi vbe dunna ne emwa hia.​—Maika 4:3, 4.

“Arriọba Osanobua gha rre nẹ, a i ghi ya obọ yẹnyẹn ọmwa rhọkpa mu otọ, a i ghi vbe ya obọ dan mu ọmwa rhọkpa rhunmwuda ẹvbo nọ ke rre, emwa hia ghi gba ẹko egbe. Ọna wa ya mwẹ ghọghọ.”​—Mustafa, Middle East.

Ibude Ni Rre Uwu E Baibol

Ibude ni rre Baibol gha sẹtin ru iyobọ nuẹn, zẹvbe ne u ya zin egbe emwi nọ sunu daa ruẹ. Deghẹ emwi ewe ne u mwẹ wii ruẹ, ra ọ mwẹ ọlọghọmwa ọvbehe ne u la gberra nian rhunmwuda emwi nọ sunu daa ruẹ, e Baibol gha vbe ru iyobọ nuẹn ya rẹn emwi nọ khẹke ya ru. Gi ima guan kaẹn vbene Baibol ya ru iyobọ ne emwa ni lẹẹ hin ẹvbo iran rre:

E Baibol khare wẹẹ: “Ọ gha khọnrẹn ne ọmwa gha mwẹ emwi ọrhẹnrhẹn, emwi nọ mwẹ i sẹtin rhie arrọọ nẹẹn.”​—Luk 12:15.

Vbene ako ọghe Baibol na gha ya sẹtin ru iyobọ nuẹn hẹ: Ẹ i mwẹ emwi nọ sunu daa ruẹ ma gbe ruẹ egbe, ẹ i mwẹ emwi nọ wii ruẹ ma vbe kakabọ da ruẹ. Sokpan ghẹ mianmian wẹẹ, uhunmwu nọ rre agbọn ẹre ọ khuan igho. Deghẹ u na gha mwẹ ọna vbe orhiọn, u i khian fi agbọn ye otọ rhunmwuda emwi nọ wii ruẹ.

“Arrọọ ẹre ọ ru ekpataki sẹ emwi ewe. Emwi eso gha sunu, igho ra emwi ewe i khian ghi gha mwẹ iyobọ nọ ye.”​—Natalia, Ukraine.

E Baibol khare wẹẹ: “Ghẹ gha nọ wẹẹ, ‘Vbọzẹ ne ẹghẹ nẹdẹ na wa maan sẹ ẹghẹ na?’”​—Asan Ibo 7:10.

Vbene ako ọghe Baibol na gha ya sẹtin ru iyobọ nuẹn hẹ: A sẹtin miẹn wẹẹ emwi wa ba so ruẹ nian, sokpan, ghẹ yae tae vbene emwi ghaa ye hẹ vbe ẹghẹ nọ gberra. Ọna gha ru iyobọ nuẹn, ne u ghẹ mieke na gha gbe ọsumẹ sẹ egbe.

“Te I wa hia ne I miẹn ọnrẹn yi wẹẹ, emwi i ghi ye vbene ọ ka ye, ọna ru iyobọ mẹ ya gha ya aro nọ khẹke ghee vbene emwi ghi ye hẹ nian.”​—Eli, Rwanda.

E Baibol khare wẹẹ: “Ma gha miẹn evbare re, ma na vbe miẹn ukpọn rhuan, ọ ghi wa sẹ ima ọkẹn.”​—1 Timoti 6:8.

Vbene ako ọghe Baibol na gha ya sẹtin ru iyobọ nuẹn hẹ: Gi emwi ni gele ru ekpataki sẹ gha sẹ ruẹ ọkẹn. U gha ru vberriọ, egbe ghi rọkhọ ruẹ rhunmwuda, u i khian gha si osi gbe.

“E Baibol keghi ru iyobọ mẹ, ne I ghẹ gha rhie aro tua emwi ni wii ima. Mẹ vbe ọvbokhan mwẹ wa ghọghọ wẹẹ ima miẹn uhunmwu, kevbe wẹẹ ima rre ehe ne orhiọn ima na sẹ otọ.”​—Ivan, Ukraine.

E Baibol khare wẹẹ: “Nọnaghiyerriọ, emwi hia ne uwa hoo ne emwa ru ne uwa, ọ khẹke ne uwa vbe ru ẹre ne iran.”​—Matiu 7:12.

Vbene ako ọghe Baibol na gha ya sẹtin ru iyobọ nuẹn hẹ: Adeghẹ u na gha ru ẹse ne emwa, u na vbe gha re ọmwa nọ mwẹ izinegbe, u ghi sẹtin gha gu emwa rrọọ vbe ọfunmwegbe. Deba ọni, ọna sẹtin ya emwa ni rre ẹvbo nii gha ya aro nọ maan ghee ruẹ, ne iran gha te ya gha ghee ruẹ ọmwa dan, rhunmwuda ne u na re ọrriọvbe.

“Ẹko wa rhiẹnrhiẹn emwa ni bun, deghẹ u na gha rhie ọghọ ne iran kevbe deghẹ u na gha ya obọ nọ maan mu iran. Ọna sẹtin ya uwẹ vbe emwa ni rre ẹvbo nii gha loo kugbe.”​—Angelo, Sri Lanka.

E Baibol khare wẹẹ: “Wa gha nọ emwi hia ne uwa gualọ vbe obọ Osanobua vbe erhunmwu, . . . ẹghẹ nii, ọfunmwegbe ọghe Osanobua . . . gha gbogba ga ekhọe uwa kevbe iziro ọghe uwa.”​—Filipai 4:6, 7.

Vbene ako ọghe Baibol na gha ya sẹtin ru iyobọ nuẹn hẹ: Fannọ otọ ẹko ruẹ ma Osanobua vbe erhunmwu, tama rẹn emwi ne u gualọ, emwi nọ da ruẹ vbe orhiọn kevbe emwi nọ ya ohan mu ruẹ. U gha ru vberriọ, orhiọn ruẹ ghi sẹ otọ, ọlọghọmwa ne u ye i khian vbe gbe ruẹ orhiọn mu otọ.

“Ẹghẹ ke ẹghẹ ne I ya rre uwu ọlọghọmwa, te I wa na erhunmwu gie Osanobua, ọ wa vbe họn erhunmwu mwẹ. Emwi ne I ruẹ vbe Baibol vbe ya orhiọn mwẹ sẹ otọ.”​—Yol, South Sudan.

“Ibude nọ maan ne I miẹn vbe uwu e Baibol wa mu mwẹ orhiọn sẹ otọ, ọna keghi ru iyobọ mẹ ya zin egbe, vbe uwu ẹghẹ nọ wegbe ne I ye na.”​—Valentina, Ukraine.

“Ọ wa rhie igiọdu mẹ ne I na rẹn wẹẹ, Osanobua yan rẹn nẹ wẹẹ, agbọn ne ọlọghọmwa i ye dee vbe odaro.”​—Emmanuel, Haiti

Emwi ni bun ọvbehe rre uwu e Baibol ni fu ima ẹko rre kevbe ni ya ima rẹn wẹẹ, emwi hia gha maan vbe odaro. U ghaa hoo ne u rẹn ena hia kevbe emwi nọ ya ima rẹn wẹẹ ẹmwẹ ne Osanobua tae gha gele sunu, tama ọmwa nọ rhie ebe na nuẹn, ra Osẹe Jehova ọvbehe nọ do gu ruẹ gha ruẹ e Baibol. Iran gha wa hoo ne iran ru iyobọ nuẹn.