Gi Ilele Ni Rre Baibol Gha Dia Ekhọe Ruẹ

1-2. (a) De ẹse na ya wee Adam vbe Ivi? (b) De vbene iran gha te ya rhie ẹre ma wẹẹ iran gbọyẹmwẹ ye ẹse na?

TE AVBE aranmwẹ wa yin vbene iran rhirhi miẹn. Emwa vbe kun e masini ni bun vbene iran gualọe yi; vbene iran hoo ne avbe masini na ya gha winna, erriọ ẹre iran wa ya winna zẹẹ. Sokpan te emwa nagbọn wa lughaẹn. Ọ mwẹ ẹse ne kpataki ne Jehova ya wee ima vbe ọ yi ima, aro nọ ghaan ẹre Ivbi Otu e Kristi wa ya ghee ẹse ne kpataki na. Ẹse na, ọre asẹ na ya zẹ ne egbe ọmwa. E Baibol gi ima rẹn wẹẹ, te Osanobua yi Adam nọ re okpia nokaro nọ gha yevbe irẹn. (Gẹn 1:​26, 27) Te Jehova yi Adam vbe Ivi ne iran sẹtin gha zẹ ne egbe iran.

² E Jehova ma yi uhi ni bun ne Adam vbe Ivi. Emwi ne Jehova wa tama iran ọre ne iran gbaroghe uhunmwu otagbọn na, ne iran biẹlẹ vuọn ọnrẹn kevbe wẹẹ, irẹn ẹre ọ mwẹ asẹ nọ ya ta emwi ne iran gha ru kevbe ne iran i khian ru. (Gẹn 1:28; 2:​16, 17) De vbene Adam vbe Ivi gha te ya rhie ẹre ma wẹẹ iran gbọyẹmwẹ ye asẹ na ya zẹ ne egbe ọmwa ne Osanobua ya wee iran? Rhunmwuda emwi hia ne Jehova ru ne Adam vbe Ivi, te ọ te khẹke ne iran ya ekhọe hia họn ẹmwẹ ne Jehova rhunmwuda wẹẹ, iran hoẹmwẹ ọnrẹn kevbe wẹẹ, iran hoo ne iran ya ẹko rhiẹnrhiẹn ọnrẹn.​—Itan 23:15.

3. De vbene Adam vbe Ivi ya loo asẹ na ya zẹ ne egbe ọmwa ne Jehova ya wee iran?

³ E Baibol gi ima rẹn wẹẹ, Adam vbe Ivi ma loo asẹ na ya zẹ ne egbe ọmwa ne Jehova ya wee iran vbe odẹ nọ khẹke. Nọghayayerriọ, iran keghi he ẹmwẹ ye Jehova obọ. Azẹ ne iran ru na rhie ẹre ma wẹẹ, iran ma hoẹmwẹ e Jehova, sokpan ọghe enegbe iran ọkpa ẹre iran ghaa mu roro. (Gẹn 3:​1-7) Te ima ne emwa nagbọn wa ye rri oya rhunmwuda azẹ ne iran ru na.​—Rom 5:12.

4. (a) Zẹvbe nọ rre ebe Galetia 6:​5, vbọ khẹke ne ima hia gha ru? (b) De emwi ọvbehe ne Osanobua ya wee ima ne ima khian guan kaẹn vbe ako iruẹmwi na?

⁴ Agbọn wegbe gbe vbe ẹghẹ ne ima ye na. Rhunmwuda ọni, ma keghi ru azẹ ni bun vbe ẹdẹgbegbe. (Tie Galetia 6:5.) Azẹ eso i lọghọ na ru, sokpan ọ mwẹ eso nọ wa vbe lọghọ. Vbe ima khian ya gha ru azẹ nọ yẹẹ Jehova? Te ọ khẹke ne ima rẹn wẹẹ, ma gualọ iyobọ e Jehova. (Itan 16:3; Jer 10:23) Agharhemiẹn wẹẹ, ọmwa nọ gbae ẹre Jesu ghaa khin te ọ wa ye gha gualọ iyobọ vbe obọ Osanobua. (Hib 5:7) Inu ghi nọ ne ima ne emwa ni ma gba; ma ẹre ọ ghi gualọ iyobọ Jehova sẹ. Nian, gi ima guan kaẹn ekhọe ọguọmwaziro ọghe ima nọ re emwi ọvbehe ne Osanobua ya wee ima, kevbe vbe nọ gha ya sẹtin ru iyobọ ne ima ya gha ru azẹ nọ maan.

VBỌ RE EKHỌE ỌGUỌMWAZIRO?

5. (a) Vbọ re ekhọe ọguọmwaziro? (b) De vbene ekhọe ọguọmwaziro ya ru iyobọ ne ima hẹ? (Rom 2:​14, 15)

⁵ Ekhọe ọguọmwaziro ọre ẹwaẹn nọ rre uwu ima, nọ ya ima rẹn emwi nọ maan kevbe nẹi maan. Uhiẹn, ọmwa nọ ma rẹn emwi rhọkpa vbekpa uhi ọghe Osanobua vbe mwẹ ekhọe ọguọmwaziro. (2 Kọr 4:2) Ekhọe ọguọmwaziro ọghe ima ẹre ọ ya ima rẹn deghẹ iziro nọ maan ra nẹi maan ẹre ima mwẹ, ra deghẹ emwi esi ẹre ima ru ra emwi dan nọ. (Tie Rom 2:​14, 15.) Ekhọe ọguọmwaziro wa vbe ya obọ sekhae ne ima vbe ima gha khian ru emwi dan. (1 Sam 26:​8-11) Ọ sẹtin vbe gua ima kpa ya ru emwi nọ khẹke. Ne ima na mwẹ asẹ ne ima ya zẹ ne egbe ima ma rhie ma wẹẹ, ẹghẹ hia ẹre ima khian ya gha ru azẹ nọ ya ẹko rhiẹnrhiẹn e Jehova. Te ọ khẹke ne ekhọe ọguọmwaziro ọghe ima sẹtin ru iyobọ ne ima ya rẹn azẹ nọ maan kevbe nẹi maan.

6. Vbọzẹ ne ekhọe ọguọmwaziro ọghe ima i na winna ẹse vbe ugbẹnso?

⁶ Sokpan, evbọ da ọmwa nọ wẹẹ, ẹ i re ẹghẹ hia ẹre ekhọe ọguọmwaziro ọghe ima ya winna ẹse rhunmwuda ne ima na re emwa ni ma gba. Emwi ni bun rrọọ nọ gha sẹtin ya ekhọe ọguọmwaziro ọghe ima gha winna ghee ihan, vbe na ghee, vbene a ya koko ima waan hẹ, vbene a ya ru emwi vbe eke ne ima ke rre kevbe iziro nọ ma gba ne ima mwẹ. E Baibol gi ima rẹn wẹẹ, ekhọe ọguọmwaziro sẹtin khian nọ “ma wegbe,” nọ “ma huan,” nọ “gbin vbe na miẹn wẹẹ, te a mu ematọn ye erhẹn ya tọẹn,” ra nọ vuọn ne “emwi dan.” (1 Kọr 8:12; Tai 1:15; 1 Tim 4:2; Hib 10:22) Egbe ekhọe ọguọmwaziro vbenian i khian ghi sẹtin ru iyobọ ne ọmwa ya ru azẹ nọ maan. Te ọ yevbe na ghee esikel (scale) nọ rhia nẹ, nọ khẹke na dọlọ yi. Rhunmwuda ọni, te ọ khẹke ne ima hia ne ima gha mwẹ ekhọe ọguọmwaziro nọ maan. (1 Pit 3:16) Vbe ima khian ya ru ọna hẹ?

VBENE IMA KHIAN YA GHA YA ILELE NI RRE BAIBOL DIA EKHỌE ỌGUỌMWAZIRO ỌGHE IMA

7-8. (a) De vbene ima khian ya dia ekhọe ọguọmwaziro ọghe ima? (b) De vbene ilele nọ rre Baibol ya ru iyobọ ne ima hẹ? Ru igiemwi yọ. (Vbe ya ghee efoto.)

⁷ De vbene ima khian ya sẹtin dia ekhọe ọguọmwaziro ọghe ima? Te ọ khẹke ne ima gha tie Baibol vbe ẹghẹ hia ne ima mieke na rẹn emwi nọ yẹẹ e Jehova kevbe nẹi yẹẹ ọre. Ma gha gele rẹn otọ avbe uhi ọghe Osanobua, ọ gha ru iyobọ ne ima ya rẹn aro nọ ya ghee emwi. Sokpan, zẹvbe ne ima ruẹ ọre vbe ako iruẹmwi nọ lae, odẹ ọkpa ẹre a mobọ ya lele uhi, ugbẹnso, ẹghẹ na ya yi uhi nii gha gberra nẹ, ẹ i ghi vbe mwẹ esa nọ ye. Ọna ẹre ọ si ẹre nọ na khẹke ne ima gha gualọ ilele ni rre uwu e Baibol rhunmwuda, iran ru iyobọ ne ima ya gele rẹn aro ne Jehova ya ghee emwi.​—Aiz 55:9.

⁸ Ma gha sẹtin ya ẹdagbọn ima gie ọmwa nọ mu okhian la uwu ato. Gia kha wẹẹ, odẹ rhọkpa kevbe ama na ya rẹn eke na rrie i rre uwu ato nii, ovẹn kevbe avbe orhọnmwẹ ni rre iso gha sẹtin ya ọmwa rẹn eke nọ rrie. Sokpan ọ mwẹ emapu eso nọ mu emwi eso na rherhe bẹghe vbe na ghee oke ra ẹzẹ, ne ọmwa mieke na rẹn eke nọ ye, emapu vbenian ẹre ọ khian ru iyobọ ne ọmwa sẹ. Emapu vbenian gha ru iyobọ ne ima ya rẹn eke nọ khẹke ne ima la, ne ima ghẹ mieke na bibi odẹ. Ma hoo ne ima gha ru emwi nọ ya ẹko rhiẹnrhiẹn e Jehova vbe ẹdagbọn ima. Te Baibol yevbe na ghee emapu nọ ya ima rẹn emwi nọ khẹke ya ru. Vbene ilele ni rre Baibol na yevbe emwi ughughan nọ rre uwu ato, nọ ya ima rẹn eke ne ima ye. Adeghẹ ima na gha ya avbe ilele ni rre Baibol ru emwi, ma gha musọe.

9. Zẹvbe nọ rre ebe Rom 9:​1, de emwi ọvbehe ne Jehova ya ru iyobọ ne ima, ne ekhọe ọguọmwaziro ọghe ima mieke na gha winna ẹse?

⁹ Orhiọn nọhuanrẹn ọghe Osanobua ẹre ọ khian ru iyobọ ne ima ya gha mwẹ ekhọe ọguọmwaziro nọ winna ẹse. (Tie Rom 9:1.) Orhiọn nọhuanrẹn ọghe Osanobua gha ru iyobọ ne ima ya rẹn aro ne Jehova ya ghee emwi. Ọ vbe rhie aguakpa kevbe ẹtin ne ima ya gha ru ahoo ọghe Jehova. (Fil 2:13) Sokpan, vbọ khian ru iyobọ ne ima ya gha mwẹ orhiọn nọhuanrẹn ọghe Jehova?

10. Vbọ khian ru iyobọ ne ima ya gha mwẹ orhiọn nọhuanrẹn? (Luk 11:​10, 13)

¹⁰ Gha na erhunmwu ne Jehova rhie orhiọn nọhuanrẹn nuẹn. (Tie Luk 11:​10, 13.) Ma gha sẹtin gha mwẹ ilẹkẹtin wẹẹ, e Jehova i ya orhiọn nọhuanrẹn ọghẹe mwẹ akhaẹn. (Jọn 3:34) Ekhọe hia ẹre Jehova ya rhie orhiọn nọhuanrẹn ne emwa ni ru emwi nọ yẹẹ ọre. (Itan 1:23; Jems 1:5) De emwi ọvbehe nọ gha ru iyobọ ne ima ya gha mwẹ ekhọe ọguọmwaziro nọ winna ẹse?

11. (a) Vbọ khẹke nọ gha re emwi nọ ru ekpataki sẹ vbe ẹdagbọn ima? (b) Vbọzẹ nọ na khẹke ne ima hia ne ilele ni rre Baibol gha dia ekhọe ọguọmwaziro ọghe ima?

¹¹ Hia vbe odẹ ke odẹ ne u gha ru emwi nọ yẹẹ e Jehova. (Itan 8:​34, 35) Ọna ẹre ọ khẹke nọ gha re emwi nọ ru ekpataki sẹ vbe ẹdagbọn ima. Ma gha ke ọna ye orhiọn, ọ gha ru iyobọ ne ima ya gha dia ekhọe ọguọmwaziro ọghe ima vbe uwu ọlọghọmwa ne ima rhirhi gha ye. Ma ghaa mwẹ ekhọe ọguọmwaziro ne ilele nọ rre Baibol dia, ọ ghi ru iyobọ ne ima ya gha roro emwi vbene Jehova ya roro emwi, ọ ghi vbe ya ima rẹn emwi nọ yẹẹ ọre. Te ọ wa khẹke ne ima gha ya ilele ni rre Baibol dia ekhọe ọguọmwaziro ọghe ima, rhunmwuda, ẹghẹ nọ wegbe ẹre ima ye na. Emwi eso keghi de rre vbe ugbẹnso ne Baibol ma wa gbe uhi yi, nọ na khẹke ne ima tobọ ima zẹ emwi ne ima gha ru. Ọ sẹtin gha re azẹ nọ dekaẹn emwi ne ima ya rọkhọ egbe, iwinna ne ima ru, owebe ne ima gha yo ra aro emwa nọ khẹke ne ima gu ru ọse. Nọnaghiyerriọ, vbe ima khian ya rẹn wẹẹ, azẹ ne ima ru ya ẹko rhiẹnrhiẹn e Jehova?​—2 Kọr 1:12.

12. De emwi nọ khian ya ima rẹn deghẹ ekhọe ọguọmwaziro ọghe ima ya ima ru azẹ nọ maan? (Ẹfisọs 5:10)

¹² Gha mu emwi ne u tie vbe Baibol roro. (Psm 49:3) U ghaa tie Baibol, hia ne u gualọ ilele ni rre Baibol nọ gha ru iyobọ nuẹn ya rẹn aro ne Jehova ya ghee emwi. (Tie Ẹfisọs 5:10.) Zẹvbe ne ima ya werriẹ aro daa ọlọghọmwa ughughan vbe ẹdagbọn ima, te ọ khẹke ne ima gha gualọ ilele ni rre Baibol nọ gha ya ima rẹn deghẹ ekhọe ọguọmwaziro ọghe ima ru iyobọ ne ima ya gha ru azẹ nọ khẹke. (Itan 2:​4-9, 11-13) Avbe ilele na ẹre ọ khian ru iyobọ ne ima ya dia iziro ọghe ima, ne ima mieke na gha ru emwi nọ yẹẹ e Jehova.​—Hib 5:14.

13. De emwi nọ ma khẹke ne ima ru? Ru igiemwi yọ.

¹³ Ọ ma khẹke ne u ka ru azẹ nẹ, u ke gha gualọ ilele nọ rre Baibol. Ma ma hoo ne ima gha yevbe Ivbi Izrẹl ni ye gha rre Juda iyeke vbe a guọghọ e Jerusalẹm rua nẹ vbe ukpo 607 B.C.E. Iran keghi tama e Jerimaia wẹẹ: “Na erhunmwu ne Jehova ne Osanobua ruẹ ma ima odẹ ne ima gha la kevbe emwi ne ima gha ru.” (Jer 42:​3-6) Sokpan ọ kẹ iran ya tae nẹ vbe ekhọe iran emwi ne iran gha ru. Rhunmwuda ọni, e Jehova ghi rhie adia ne iran, iran ma lele adia nii, rhunmwuda, ọni i re emwi ne iran te gualọ. Vbe okiekie, ẹbe keghi rruan iran. (Jer 42:​19-22; 43:​1, 2, 4) Nọnaghiyerriọ, vbene ima te ru azẹ, te ọ khẹke ne ima ka gualọ ilele ni rre Baibol nọ gha ya ima rẹn aro ne Jehova ya ghee emwi nii, iyeke ọni, ma ghi zẹ owẹ lelẹe.

14. Vbọzẹ nọ na khẹke ne ima ya ilele ni rre Baibol ru emwi vbe ima gha khian ru azẹ?

¹⁴ Gha ru azẹ nọ gua ilele nọ rre Baibol ro. (Mat 7:​24-29; Jems 1:​23-25) Ma gha ru azẹ nọ gua ilele nọ rre Baibol ro, te ima kie ẹkpotọ yọ ne orhiọn nọhuanrẹn gha dia ima. Odẹ vberriọ, e Jehova ghi ye gha rhie orhiọn nọhuanrẹn ne ima. (Iwinna 5:32) Sokpan, deghẹ ima ma kie ẹkpotọ yọ ne orhiọn nọhuanrẹn ọghe Jehova gha dia ima, ọni rhie ma wẹẹ, te ima “ru emwi nọ gha ya orhiọn nọhuanrẹn ọghe Osanobua gha khiẹ,” ra te ima bizugbe iyobọ ọghe orhiọn nọhuanrẹn. (Ẹfis 4:30; Aiz 63:10; Iwinna 7:51) E Jehova sẹtin kue wa miẹn ima orhiọn nọhuanrẹn ọghẹe. (Psm 51:11; 1 Tẹs 5:19) Ọna i khian zẹdẹ gha maan hiehie rhunmwuda, ma wa gualọ ẹtin kevbe iyobọ ne orhiọn nọhuanrẹn rhie ne ọmwa vbe ẹdagbọn ima.​—Ẹfis 3:16.

VBENE IMA KHIAN YA MIẸN ILELE NI RRE BAIBOL NỌ GHA RU IYOBỌ NE IMA

15-16. (a) Vbe ima khian ya miẹn ilele ni rre Baibol nọ gha gele ru iyobọ ne ima? (b) De ilele ni rre Baibol nọ gha sẹtin ru iyobọ ne ọmwa ne ima gu ruẹ e Baibol ya ban esiga na si?

¹⁵ Gha loo emwi ughughan ne ima ya ru ezanzan. Deghẹ ima na rẹn eke ne avbe ilele ye vbe Ebe Nọhuanrẹn, ẹre ima khian na sẹtin yae ru emwi. Vbe igiemwi, a sẹtin miẹn wẹẹ, ọmwa ne u gu ruẹ e Baibol ma wa rẹn evbọzẹe nọ na khẹke ne irẹn ban esiga na si. Ọ sẹtin gha roro ẹre wẹẹ: ‘E Baibol ma guan kaẹn esiga na si. Rhunmwuda ọni, vbe ima ghi ya rẹn hẹ wẹẹ, ọ ma khẹke na gha si esiga?’ Vbua khian ya ru iyobọ nẹẹn, nọ mieke na rẹn ilele nọ rre Baibol nọ rhie ẹre ma wẹẹ, esiga na si sọnnọ e Jehova? Emwi ọkpa nọ gha wa ru iyobọ ọre Ebe Ne Avbe Osẹe Jehova Ya Gualọ Otọ Emwi. U sẹtin gie uhunmwuta nọ khare wẹẹ, “Tobacco and Smoking” ma rẹn. Vbe ototọ uhunmwuta nii, ọ gha miẹn uhunmwuta ọkpa nọ khare wẹẹ, “What Is God’s View of Smoking?” (Ya ghee The Watchtower ọghe June 1, 2014.) De ako ebe nọhuanrẹn kevbe ilele eso nọ gha miẹn vbe uhunmwuta na?

¹⁶ Ena ọre ilele isẹn nọ gha miẹn vbe uhunmwuta na. (1) Ọ ma khẹke ne ima gha re ọviẹn emwi nọ gha sẹtin miẹn ima uhunmwu. (Rom 6:16) (2) Te ọ khẹke ne ima bizugbe emwi ke emwi nọ gha sẹtin si emianmwẹ ye ima egbe. (2 Kọr 7:1) (3) E Jehova hoo ne ima gha ya ekhọe hia ga irẹn. (Mat 22:37) (4) Ọ ma khẹke ne emwi ne ima ru si ọlọghọmwa ye emwa ọvbehe egbe. (Mat 22:39; 1 Kọr 10:24) (5) E Jehova gha sẹtin ru iyobọ ne ima ya ru emwi nọ khẹke. (Fil 4:13) Agharhemiẹn wẹẹ, e Baibol ma wa guan kaẹn esiga na si, ilele ni rre uwu ẹre gha sẹtin ru iyobọ ne ọmwa ne u gu ruẹ e Baibol ya rẹn aro ne Jehova ya ghee esiga na si.

17. De vbene Ivbi Otu e Kristi ni mu egbe orọnmwẹ khian ya miẹn ilele ni rre Baibol nọ gha gele ru iyobọ ne iran?

¹⁷ De vbene ọtẹn nokpia kevbe ọtẹn nokhuo ni mu egbe orọnmwẹ khian ya miẹn ilele ni rre Baibol nọ gha gele ru iyobọ ne iran ya ru azẹ nọ khẹke? Ebe Ne Avbe Osẹe Jehova Ya Gualọ Otọ Emwi gha vbe sẹtin ru iyobọ ne iran. Vbe ototọ uhunmwuta nọ khare wẹẹ, “Weddings and Receptions,” iran gha miẹn ilele ni bun nọ gha ru iyobọ ne iran. Gi ima guan kaẹn ehan vbọ. (1) Gi emwi hia ne uwa khian ru vba rhie uyi gie Jehova. (1 Kọr 10:​31, 32) (2) Gi emwi ne uwa khian yọ gha rre oreghe, ọ ghi vbe gha re ukpọn nọ khẹke Ivbi Otu e Kristi. (1 Tim 2:9; 1 Pit 3:​3, 4) (3) Ọ ma khẹke ne ugie orọnmwẹ ọghe uwa gha re ọghe uwa do ghee vbene ọghe emwa ni rre uwu agbọn ye. (Jọn 17:14; Jems 1:27; 1 Jọn 2:​15, 16) (4) Te ọ khẹke ne u mwamwa emwi ẹse ne emwi hia mieke na khian hẹnnẹhẹnnẹ. (1 Kọr 14:40) (5) Adeghẹ uwa na gha rre eke ne uwa khian na sọyẹnmwẹ egbe, ọ ma khẹke ne uwa gha ku iku na na gbe izabọbọ ẹwia ra na na da ayọn gbe egbe. (Gal 5:21) (6) Ọ khẹke ne uwa gha mwẹ ọmwa nọ khian siẹnro emwi hia vbene ọ khẹke​—Jọn 2:​8, 9.

18-19. (a) De emwi ọvbehe nọ gha sẹtin ru iyobọ ne ima? (b) De ilele nọ gha ru iyobọ nuẹn ya ru azẹ nọ khẹke vbe nọ dekaẹn aro ugie nọ khẹke ne Ivbi Otu e Kristi gha do? (Ya ghee ẹkpẹti nọ khare wẹẹ, “Hia Ne U Rẹn Ilele Nọ Rrọọ”)

¹⁸ Ebe ọvbehe nọ vbe ru iyobọ ne emwa ọre Avbe Ako Ọghe Ebe Nọhuanrẹn Ni Ru Iyobọ Ne Ivbi Otu E Kristi. U gha miẹn ako ọghe ebe nọhuanrẹn nọ gha ru iyobọ nuẹn vbe dọmwadẹ uhunmwuta ni rre ebe na. Vbe ototọ uhunmwuta ne u khian tie, u gha miẹn avbe inọta kevbe ako ọghe ebe nọhuanrẹn eso ni gha ru iyobọ nuẹn ya rẹn avbe ilele ni rre Baibol. Vbe igiemwi, Ovbi Otu e Kristi sẹtin gha roro ẹre deghẹ ọ khẹke ne irẹn yo eke na na do ugie eso. Adeghẹ ọ na gha rhie uhunmwuta nọ khare wẹẹ, “Avbe Ugie,” ọ gha miẹn abọ uhunmwuta nọ khare wẹẹ, “Avbe ugie nọ ma khẹke ne Ivbi Otu e Kristi na gha mwẹ obọ.”

¹⁹ Usun emwi na guan kaẹn vbe uhunmwuta na ọre: “Vbọzẹ nọ ma na khẹke na gha mwẹ obọ vbe avbe ugie nọ ghi ginna ugamwẹ ohoghe nẹ? (1 Kọr 10:21; 2 Kọr 6:​14-18; Ẹfis 5:​10, 11).” A keghi vbe ya unu kaẹn ugie eso ni ginna ugamwẹ ohoghe. Vbe ototọ abọ uhunmwuta nọ khare wẹẹ, “Avbe ugie na ya rhie uyi gie arriọba,” u gha miẹn ilele eso ni rre Baibol nọ gha ru iyobọ nuẹn ya ru azẹ nọ khẹke vbọ gha de ọghe avbe ugie na ya rhie uyi gie arriọba rhunmwuda emwi ne iran he fiangbua, ugie ayere ọghe okuo na khọn rẹn vbe ẹvbo, ra avbe ugie na ya rhie uyi nọ khẹke Osanobua ne avbe okpọmwa ni rre ẹvbo. Ma wa ya ekhọe hia kpọnmwẹ e Jehova nọ na loo otu ọghẹe ya kpemehe emwi vbenian nọ ru iyobọ ne ima ya gha dia ekhọe ọguọmwaziro ọghe ima!

RHIE ẸRE MA WẸẸ U YA ILELE NI RRE BAIBOL DIA EKHỌE ỌGUỌMWAZIRO RUẸ

20. De vbene ima khian ya rhie ẹre ma hẹ wẹẹ ma ya ilele ni rre Baibol dia ekhọe ọguọmwaziro ọghe ima?

²⁰ Ma wa gbọyẹmwẹ ye asẹ na ya zẹ ne egbe ọmwa ne Jehova ya wee ima. Sokpan ma wa vbe rẹn wẹẹ, te ọ khẹke ne ima gha ya ilele ni rre Baibol dia ekhọe ọguọmwaziro ọghe ima, ne ima mieke na sẹtin gha loo asẹ na vbe odẹ nọ khẹke. Ekhọe ọguọmwaziro nọ winna ẹse gha sẹtin ru iyobọ ne ima ya gha ru azẹ nọ gha rhie uyi gie Jehova kevbe nọ gua ahoo ọghẹe ro. Orhiọn nọhuanrẹn ọghe Jehova ẹre ọ khian sẹtin ru iyobọ ne ima ya ru ọna. Rhunmwuda ọni, te ọ khẹke ne ima ye gha rinmwian Osanobua nọ rhie orhiọn nọhuanrẹn ne ima, ma ghi vbe kue ne orhiọn nọhuanrẹn ọghẹe gha dia ima. Emwi ọvbehe nọ gha vbe ru iyobọ ne ima ya gha dia ekhọe ọguọmwaziro ọghe ima, ọre ilele ni rre Baibol. Ma ghaa loo avbe ẹse na ne Osanobua ya wee ima vbe odẹ nọ khẹke, ma gha bẹghe vbene Ẹmwẹ Osanobua mwẹ ẹtin hẹ.​—2 Tim 3:​16, 17; Hib 4:12.