Wa Ne Etẹn Ni Khian Eniwanrẹn Nẹ Wa Mwẹ Iyobọ Ne kpataki Ne Uwa Ye Vbe Uwu Iko

O gha kẹ, vbene emwi ye ne ọtẹn nokhuo na erriọ ẹre ọ vbe ye ne uwẹ. Ọ gha khọnrẹn wẹẹ, ọ kpẹẹ re ne u ke ga e Jehova, u sẹtin gha roro ẹre wẹẹ, u i mwẹ esa ne u ye rhunmwuda ne u i na sẹtin ru emwi ne u te ka ru. Vbe igiemwi, u sẹtin gha ya emwi ne u ru vbe ẹghẹ ne u na gha re igbama gie emwi ne u ghi sẹtin ru nian. Adeghẹ erriọ ẹre nọ, de emwi nọ gha ru iyobọ nuẹn ne u ghẹ gha mwẹ egbe iziro vbenian?

EMWI NE JEHOVA HOO NE U RU

Nọ egbuẹ wẹẹ, ‘De emwi ne Jehova hoo ne I ru?’ Ẹmwẹ nọ rre ebe Diuteronomi 6:​5, gha wa fu ruẹ ẹko rre, ọ khare wẹẹ: “Ya ekhọe ruẹ hia hoẹmwẹ e Jehova ne Osanobua ruẹ, kevbe orhiọn ruẹ hia kevbe ẹtin ruẹ hia.”

Zẹvbe nọ rre ako nii, e Jehova hoo ne u ya ekhọe ruẹ hia, orhiọn ruẹ hia kevbe ẹtin ruẹ hia gae. Ọna gha ya ruẹ rẹn wẹẹ, ọ ma khẹke ne u gha ya egbuẹ gie emwa ọvbehe, ra ne u gha ya emwi ne u sẹtin ru nian gie emwi ne u ka ru vbe ẹghẹ nọ gberra.

Gele muẹn roro: Vbe ẹghẹ ne u na gha re igbama, de emwi ne u ghaa ru vbe ugamwẹ e Jehova? Eguọmwadia e Jehova ni bun gha kha wẹẹ, te iran wa gha ru vbene ẹtin iran sẹ. Vbe nai na gbawawẹ, u ghaa ru vbene ẹtin ruẹ sẹ vbe ẹghẹ nii. De emwi ne u ghi sẹtin ru vbe ugamwẹ e Jehova nian? Vbene ẹtin ruẹ sẹ ẹre u ye ru nian. U gha kọ ọna ye orhiọn, ọ gha ya ruẹ rẹn wẹẹ, emwi ne u sẹtin ru vbe ẹghẹ nọ gberra ẹre u ye ru vbe ẹghẹ na. Adeghẹ u ghaa ru vbene ẹtin ruẹ sẹ vbe ẹghẹ nọ gberra, ọ rhie ma wẹẹ, u ye hia vbene ẹtin ruẹ sẹ vbe ẹghẹ na.

U GHA SẸTIN RU IYOBỌ NE EMWA ỌVBEHE

Ne u gha te ya gha muẹn roro emwi ne u i ghi sẹtin ru rhunmwuda ne u na khian ọmaẹn nẹ, gha muẹn roro iyobọ ne u gha sẹtin ru ne emwa ọvbehe. Ọ mwẹ emwi eso ne u ghẹ te sẹtin ru vbe u rre igbama ne u gha sẹtin ru nian. Vbe igiemwi, u sẹtin ru avbe emwi na sunu yi vbe ototọ mwa:

Ya emwi ne u he miẹn vbe agbọn ru iyobọ ne emwa ọvbehe. Muẹn roro ifiẹmwẹ nọ rre Baibol na sunu yi vbe ototọ mwa:

Ọba ighẹ e Devid: “Ọmaẹn ẹre I ghi khin na, I kpẹẹ agbọn nẹ, sokpan, I ma he miẹn wẹẹ, e Nọyaẹnmwa fi iyeke gbe ọmwa esi ẹdẹ, ra ne ivbi ẹre gha vbu evbare re.”​—Psm 37:25.

Jọsua: “Banbanna nian, te imẹ khian ghi wu, dọmwadẹ ọghẹe vbe uwu uwa rẹnrẹn vbe uwu ekhọe ọghẹe kevbe orhiọn rẹn wẹẹ, e Jehova ne Osanobua uwa viọ emwi esi hia na ve uwa re ne uwa nẹ. Emwi hia nọ yan rẹn, a ru iran nẹ, ọkpa nọ fira vbe uwu eyan nii, i rrọọ.”​—Jọs 23:14.

Egbọre uwẹ ka vbe ta ẹmwẹ vbenian nẹ. Emwi ne Devid vbe Jọsua ta wa ru ekpataki rhunmwuda, emwi ne iran miẹn vbe agbọn ne aro iran sẹ kevbe ne iran họn vbe ọwara ukpo ni bun ẹre iran ta.

Deghẹ ọ kpẹẹ re ne u ke ga e Jehova, u gha vbe sẹtin gi emwa ọvbehe rẹn afiangbe na lae miẹn vbe a ghaa ga e Jehova. Ọ mwẹ ẹghẹ ne u i khian sẹtin mianmian ne Jehova ya fiangbe emwa rẹn ra? Ọ ghaa yerriọ, hia ne u tama emwa ọvbehe vbekpa ẹre! Egbọre u bẹghe ẹre nẹ wẹẹ, emwi vbenian wa fu ruẹ ẹko rre. Te u vbe rhie igiọdu ne emwa ọvbehe vbe u gha gi iran rẹn afiangbe ne u he miẹn vbe ugamwẹ e Jehova.​—Rom 1:​11, 12.

Odẹ ọvbehe ne u gha ya sẹtin rhie igiọdu ne emwa ọvbehe ọre ne u gha yo iko vbe Ọgua Arriọba deghẹ u gha sẹtin ru vberriọ. U gha yo, u gha sẹtin rhie igiọdu ne emwa ọvbehe, iran ghi vbe sẹtin rhie igiọdu nuẹn. Ọtẹn Nokhuo Connie na ka guan kaẹn sin khare wẹẹ: “Iko ne I yo keghi ru iyobọ mẹ ne egbe ghẹ wọọ mwẹ. Vbe egbe ra khian ghi gu wọọ mwẹ hẹ, vbe etẹn ni rre iko rhie ẹre ma wẹẹ, iran hoẹmwẹ mwẹ? I keghi hia ne I gha rhie emwi ne emwa ọvbehe, agharhemiẹn wẹẹ, emwi kherhe nọ, ne I ya kpọnmwẹ iran ye emwi ne iran ru. I keghi vbe hia ne I ye gha rhiegba ye ugamwẹ e Jehova vbe na ghee etẹn nikẹre.”

E JEHOVA GBỌYẸMWẸ YE EMWI NE U RU VBE UGAMWẸ ỌNRẸN

Igiemwi ni bun wa rre Baibol ọghe emwa ne Jehova hoẹmwẹ ọnrẹn agharhemiẹn wẹẹ, iran ma sẹtin gha ru emwi eso rhunmwuda vbene emwi ghaa ye iran hẹ. Gi ima guan kaẹn Simiọn ne Ovbi Izrẹl, nọ khian ọmaẹn nẹ, nọ ye gha rre agbọn vbe ẹghẹ na ya biẹ Jesu. Ẹghẹ ke ẹghẹ ne Simiọn ya yo ọgua Osa, ẹ i mwẹ ọ ma bẹghe avbe igbama ni ru iwinna nọ hin usi vbe ọgua Osa. Sokpan, e Simiọn sẹtin gha roro ẹre wẹẹ, rhunmwuda ne irẹn na khian ọmaẹn nẹ, irẹn i ghi mwẹ esa ne irẹn ye vbe aro e Jehova, sokpan, ẹ i re aro vberriọ ẹre Jehova ya gha ghee ẹre. Vbe aro Osanobua, e Simiọn kegha re “ọmwa nọ lele uhi . . . kevbe nọ ya ekhọe hia gae,” rhunmwuda ọni, e Jehova keghi kie ẹkpotọ nẹẹn ya miẹn e Jesu vbe a da biẹ ọre. E Jehova na kue loo Simiọn ya tae ye otọ wẹẹ, e Jesu ẹre ọ khian gha re Mezaia na we ọ dee! (Luk 2:​25-35) Ọ vẹẹ na rẹn wẹẹ, e Jehova ma ghee Simiọn zẹvbe ọmwa nọ khian ọmaẹn nẹ, te ọ ghaa ghee ẹre zẹvbe okpia nọ mwẹ amuẹtinyan nọ wegbe, “orhiọn nọhuanrẹn [vbe] ghaa loo ẹre.”

Wẹ gha vbe sẹtin gha mwẹ ilẹkẹtin wẹẹ, e Jehova gbọyẹmwẹ ye emwi ke emwi ne u sẹtin ru vbe ugamwẹ ọnrẹn, ọ gha khọnrẹn wẹẹ, u khian ọmaẹn nẹ. Vbe aro ọre emwi ne “ọmwa ya ekhọe obọ ẹre rhie ladian ẹre [ọ] rhan obọ miẹn yi, rhunmwuda, emwi ne ọmwa mwẹ, ẹre [ọ] hoo na gha rhie ladian, ẹ i re emwi ne ọmwa i mwẹ.”​—2 Kọr 8:12.

Vbe ne u na mwẹ ọna vbe ekhọe rhie aro tua emwi ne u sẹtin ru. Vbe igiemwi, de odẹ eso ne u gha ya sẹtin kporhu nian, a gha wẹẹ ovbi ẹghẹ kherhe nọ? U gha sẹtin ya efoni ra elẹta ya rhie igiọdu ne etẹn ra? A gha wẹẹ emwi kherhe ẹre u ya ru iyobọ ne etẹn ne uwa gba ga, ọ gha wa fu iran ẹko rre, katekate ne iran na rẹn wẹẹ, ọmwa nọ kpẹẹ re nọ ke ga e Jehova ẹre ọ ru ẹse na.

Etẹn eso rrọọ ni khian eniwanrẹn nẹ nẹi ghi sẹtin ru emwi eso ne iran ka ru. Igiemwi ọghe ọtẹn nokhuo ọkpa nọ ke East Africa rre, nọ rre ẹkpẹti nọ khare wẹẹ, “Irẹn Ẹre Ọ Zẹe Ighẹ Ọ Miẹn Fan” gha ru iyobọ ne ima ya rẹn wẹẹ, etẹn ni khian eniwanrẹn nẹ gha ye sẹtin gha ru vbene ẹtin iran sẹ vbe ugamwẹ e Jehova.

Gha mwẹ ọnrẹn vbe orhiọn wẹẹ, amuẹtinyan ruẹ kevbe vbene u he ya rhikhan mu e Jehova ke ukpo ni bun gha dee gha sẹtin rhie igiọdu ne emwa ọvbehe. Igiemwi esi ẹre u he rhie ye otọ vbọ gha de ọghe na gha mwẹ izinegbe, gha mwẹ ilẹkẹtin wẹẹ, “Osanobua i re ọmwa nọ ru emwi nọ ma gba, ẹ i khian mianmian iwinna ne uwa ru kevbe vbene uwa ya rhie ẹre ma wẹẹ, wa hoẹmwẹ eni ẹnrẹn, lekpa ne uwa na ru iyobọ ne emwa ni huanrẹn, kevbe ne uwa na ye ru iyobọ ne iran khian.”​—Hib 6:10.

YE GHA RU IYOBỌ NE EMWA ỌVBEHE

Osẹ rhie ẹre ma wẹẹ, ikpia vbe ikhuo ni bun ni khian eniwanrẹn nẹ, ni ru iyobọ ne emwa ọvbehe wa mwẹ egberranmwẹ, iran roro emwi ẹse, iran vbe tọ.

Ẹmwata ma we na ghẹ tae, ọmwa ru avbe emwi na ma rhie ma wẹẹ, ẹ i khian zẹdẹ werriẹ aro daa ọlọghọmwa ni lele ọmaẹn khian. Arriọba Osanobua ọkpa ẹre ọ khian sẹtin wabọ orukhọ rua fo fẹẹrẹ, nọ wa re emwi nọ si ẹre ne ima na khian ọmaẹn kevbe ne ima na wulo.​—Rom 5:12.

Ọrheyerriọ, emwi ne u ru vbe ugamwẹ e Jehova ya sẹ egbe ne u na ru iyobọ ne emwa ọvbehe ya do rẹn e Jehova, keghi ya ayayẹro ne u mwẹ wegbe sayọ, ọ sẹtin kue ya egbuẹ situa. Etẹn ni khian eniwanrẹn nẹ, wa kọe ye orhiọn wẹẹ, e Jehova gbọyẹmwẹ ye emwi ke emwi ne uwa sẹtin ru vbe ugamwẹ ọghẹe, etẹn ni rre iko wa vbe ya aro nọ ghaan ghee uwa rhunmwuda ne uwa na mwẹ amuẹtinyan nọ wegbe.