U Yerre Ra?

Wẹ gbarokotọ tie avbe ebe Owa Ọkhẹ ọghe ukpo na ra? Adeghẹ erriọ ẹre nọ, hia ne u rhie ewanniẹn ye avbe inọta na:

Vbọ ya ima rhie uyi gie Jehova?

Ma keghi rhie uyi gie Jehova rhunmwuda ma ya ekhọe hia rhie ọghọ nẹẹn. Ma vbe rhie uyi gie Jehova rhunmwuda ma hoo ne emwa do rẹn ọnrẹn.​—w25.01, ipapa 3.

Ọmwa gha ru emwi nọ sọnnọ ima, de emwi nọ khẹke ne ima ru?

Ghẹ gha ru vbe na miẹn we emwi hia ye ẹse; umamwẹ ọghe egbe ima nọ deghẹ ima ma na rhie ẹmwẹ ye ẹko kevbe deghẹ ima na mu ohu fua. Ọ gha ru iyobọ ne ima ya gha sọyẹnmwẹ ẹdagbọn ima.​—w25.02, ipapa 15-16.

Vbọzẹ ne Mak na re igiemwi esi ne etẹn nikpia ni ye re igbama?

Ekhọe hia ẹre Mak ya miẹn iwinna ugamwẹ yi. Agharhemiẹn wẹẹ, ọ mwẹ emwi nọ sunu nọ daa ẹre sẹ ugboloko, ọ ma rhunmwuda ọni kha wẹẹ, irẹn i ghi ru iwinna ugamwẹ e Jehova. Ọ keghi gu e Pọl kevbe avbe etẹn ọvbehe ni fuẹro ru ọse.​—w25.04, ipapa 27.

De emwi ne Jesu yae kha vbe ọ khare wẹẹ: “I gi iran rẹn eni ruẹ nẹ”? (Jọn 17:26)

Erhuanegbe ẹre ka rẹn eni Osanobua. Sokpan Jesu keghi gi iran rẹn aro ọmwa ne Jehova khin, emwamwa rẹn, kevbe iwinna rẹn.​—w25.05, ipapa 20-21.

Adeghẹ ima gele mu egbe rrie otọ, de emwi nọ khẹke ne ima rẹn?

Ọ khẹke ne ima rẹn wẹẹ, ọ mwẹ emwi eso ne ima ma rẹn. Vbe igiemwi, ma ma rẹn ẹghẹ ne agbọn na khian ya sẹ ufomwẹ, ma ma wa rẹn emwi ne Jehova gha ru. Ma ma rẹn ẹdẹ nọ gha gbe akhuẹ, ma i khian vbe sẹtin gele rẹn otọ vbene Jehova rẹn ima sẹ hẹ.​—w25.06, ipapa 15-18.

De emwi nọ gha ru iyobọ ne ima ya miẹn ere vbe uhunmwuta ni rre ebe ọghomwa kevbe ọta azagba ne etẹn ya guan?

Ma sẹtin nọ egbe ima wẹẹ: ‘De emwi eso na sunu yi, nọ ya ima rẹn wẹẹ, ẹmwata ẹre imamwaemwi na khin? De igiemwi eso na loo ro ne I gha sẹtin vbe loo ya ru iyobọ ne emwa ne I ma re emwi? De ọmwa ne imamwaemwi na gha yẹẹ?’​—w25.07, ipapa 19.

De emwi ne obọ ne Osanobua ya mu e Devid ma ima re vbekpa odẹ nọ ya yabọ?

Ọ ru orukhọ nọ wegbe ni bun vbe ẹdagbọn ọnrẹn. Ọrheyerriọ, ọ ghi roro iro fi uyinmwẹ werriẹ, e Jehova na yabọe. (1 Ọba 9:​4, 5) E Jehova gha yabọ ima nẹ, ọni ọre ọ yabọ ima nẹ, ọ ghi yevbe na miẹn wẹẹ, ma ma te zẹdẹ ru orukhọ.​—w25.08, ipapa 17.

Adeghẹ ọmwa ne u gu ruẹ emwi ma rẹn otọ emwi ne u guan kaẹn, vbọ khẹke ne u ru?

Uwa sẹtin ka gberra ako eso nọ ma rherhe rẹn otọ ọre, wa ghi dọlegbe do zẹ iro yan rẹn vbọ ghaa zẹ kpẹẹ.​—w25.09, ipapa 24.

E Baibol khare wẹẹ “erẹrẹ . . . lele orukhọ khian.” (Hib 3:13) Vbe ọna demu?

Orukhọ ne ima re vbe ukhu gha sẹtin gha ya ima hoo ne ima ru orukhọ, sokpan ọ gha vbe sẹtin gha ya ima gbawawẹ vbe ẹghẹ hia deghẹ e Jehova gele hoẹmwẹ ima.​—w25.10, ipapa 16.

De emwi eha nọ gha ru iyobọ ne ima ya gha mwẹ alaghodaro vbe odẹ ne ima ya na erhunmwu?

(1) Gha muẹn roro aro ọmwa ne Jehova khin. (2) Ma sẹtin mu ọlọghọmwa ne ima ye roro, ma ghi muẹn ma e Jehova vbe erhunmwu, vbe na ghee nọ ru iyobọ ne ima ya yabọ ọmwa nọ ru ima khọọ. (3) Ghẹ gha ya okhirhikhirhi na erhunmwu. Ọna gha ru iyobọ ne ima ya gele fannọ otọ ẹko ima ma e Jehova.​—w25.10, ipapa 19-20.

Vbe ima khian ya ru iyobọ ne avbe etẹn ni khian eniwanrẹn nẹ?

Ma gha sẹtin mu otuẹ gie avbe etẹn ni khian eniwanrẹn nẹ, ma gha vbe sẹtin tie iran vbe efoni. Ma gha sẹtin lele iran ya miẹn ọbo ebo vbe owa isinmwiegbe. Ma sẹtin vbe deba iran vbe iwinna ikporhu.​—w25.11, ipapa 6-7.

De emwi eso nọ khẹke ne Ivbi Otu e Kristi kọ ye orhiọn vbe iran gha khian ru orọnmwẹ?

Rhie owẹ lele uhi na lele vbe ẹvbo. Gi emwi hia ne uwa khian ru rhie ẹre ma wẹẹ, emwa ne orhiọn nọhuanrẹn dia ẹre uwa khin. Ghẹ yọ ukpọn uwa do ghee, ghẹ vbe gha mwẹ obọ vbe ilele ni ma gua e Baibol ro. Wa gha ya ọghọ vbe ute gu egbe guan vbe uwa ghaa mu egbe orọnmwẹ.​—w25.12, ipapa 21-24.