Aizaia 41:10—“Wa Ghẹ Fian Afianma, I Gu Uwa Rrọọ”

“Wa ghẹ fian afianma, I gu uwa rrọọ. Uwa ghẹ si osi, rhunmwuda, mẹ ọre Osanobua uwa. I gha ya uwa wegbe, I gha ru iyobọ ne uwa, I gha ya obọ erha ọmwa mwẹ nọ gbae da uwa yi.”—Aizaia 41:10, New World Translation.

“Wa ghẹ fian afianma, I gu uwa rrọọ. Mẹ ọrọre Osanobua uwa, wa ghẹ gie emwikemwi mu uwa ohan. I gha ya uwa wegbe, I gha yi uwa obọ I gha degue uwa, I ghi miẹn uwa fan.”—Aizaia 41:10, E Baibol Ẹdo.

Emwi Ne Aizaia 41:10 Demu

E Jehovaa tama eguọmwadia ẹre ni ya ekhọe hia gae wẹẹ, ọlọghọmwa ke ọlọghọmwa ne iran rhirhi gha ye, iran i khian yangbe iran hiehie.

“I gu uwa rrọọ.” E Jehova keghi gi eguọmwadia ẹre rẹn wẹẹ irẹn gu iran rrọọ, rhunmwuda ọni, esa i rrọọ ne iran khian ya gha fian afianma. Ugbẹnvbe a miẹn we Jehova bẹghe emwi ne iran la gberra kevbe wẹẹ, ọ họn erhunmwu iran, ọ na do yevbe na miẹn wẹẹ, te ọ wa gu iran mudia.—Psalm 34:15; 1 Pita 3:12.

“Mẹ ọre Osanobua uwa.” E Jehova keghi rhie ifuẹko ne emwa rẹn, ọ na ye iran ẹre rre wẹẹ, irẹn ọre Osa ọghe iran kevbe wẹẹ, irẹn miẹn iran yi nẹ zẹvbe eguọmwadia irẹn. Iran gha sẹtin gha mwẹ ọnrẹn vbe orhiọn wẹẹ, ọlọghọmwa ke ọlọghọmwa ne iran rhirhi gha ye, Osanobua i khian sẹ iran rae.—Psalm 118:6; Rom 8:32; Hibru 13:6.

“I gha ya uwa wegbe, I gha ru iyobọ ne uwa, I gha ya obọ erha ọmwa mwẹ nọ gbae da uwa yi.” Ifiẹmwẹ eha ẹre Jehova loo ro ya nianian wẹẹ, irẹn i khian yangbe eguọmwadia ẹre ẹdẹ. Ọ na vbe ru igiemwi ọkpa ya gie obọ ne irẹn ya mu emwa rẹn vbe iran ghaa gualọ iyobọ. Ọmwa ghaa rre uwu ọlọghọmwa, Osanobua ghi niẹn obọ erha ọmwa ọghẹe ya si ọmwa nii ladian vbe uwu ọlọghọmwa nii.—Aizaia 41:13.

Osanobua keghi loo Ẹmwẹ ọnrẹn nọ re Baibol ya rhie ẹtin ne emwa ni gae, ọ vbe yae ru iyobọ ne iran. (Jọsua 1:8; Hibru 4:12) Vbe igiemwi, emwa ne obọ ma sẹ ọre, emwa ni khuọnmwi, ra emwa ne emwa iran wu, gha wa miẹn ẹmwẹ ibude ni bun vbe Baibol ni gha ru iyobọ ne iran. (Itan 2:6, 7) Osanobua vbe loo orhiọn nọhuanrẹn ọghẹe ya rhie ẹtin ne emwa ni gae, ne iran mieke na sẹtin zin egbe ọlọghọmwa ne iran ye.—Aizaia 40:29; Luk 11:13.

Emwi Ughughan Ni Ginna Aizaia 41:10

Avbe ẹmwẹ ni rre ako na wa rhie ifuẹko ne Ivbi e Ju ni ghaa rre imu vbe Babilọn. E Jehova tae ye otọ wẹẹ, ọ ghaa bu ẹghẹ na khian ya fan Ivbi e Ju vbe imu, iran gha họn okhekhe ọghe ọba ọkpa nọ khian khọn avbe agbẹnvbo nikẹre kevbe Babilọn mu otọ. (Aizaia 41:2-4; 44:1-4) Te Babilọn kevbe avbe agbẹnvbo ni lẹga ẹre khian gha guọ zẹzẹzẹ vbe iran gha họn iyẹn na, sokpan esa i rrọọ ne Ivbi e Ju khian ya gha mu ohan, rhunmwuda, e Jehova gha gbogba ga iran. Igba eha ẹre Jehova tama iran wẹẹ “uwa ghẹ fian afianma.”—Aizaia 41:5, 6, 10, 13, 14.

Vbe okaro, rhunmwuda Ivbi e Ju ẹre Jehova na we na gbẹn ẹmwẹ nọ rre Aizaia 41:10 ye otọ, ọrheyerriọ, ọ keghi gia miẹn wẹẹ ọ rre uwu e Baibol, nọ mieke na gha fu eguọmwadia ẹre ehia ẹko rre. (Aizaia 40:8; Rom 15:4) E Jehova wa vbe ru iyobọ ne eguọmwadia ẹre vbe ẹdẹnẹrẹ, zẹvbe nọ ru ẹre vbe ẹghẹ nẹdẹ.