Ọmwa Gha Ya E Jesu Yi, Ọni Ọkpa Wa Sẹ Nọ Gha Yae Miẹn Fan Ra?
Ewanniẹn ne Baibol rhie ye inọta na
Ivbi Otu e Kristi yayi wẹẹ te Jesu do wu ye orukhọ ọghe emwa nagbọn. (1 Pita 3:18) Sokpan, ma gha yayi we Jesu ọre Ọmiọnmwafan ọghe ima, ọni ọkpa ma wa sẹ nọ gha ya ima miẹn fan. Avbe orhiọn dan rẹnrẹn we Jesu ọre “Ovbi Osanobua,” ọrheyerriọ, te a khian fuẹn iran rua, iran i khian miẹn fan.—Luk 4:41; Jud 6.
De emwi ne I gha ru ne I mieke na miẹn fan?
Te ọ khẹke ne u yayi wẹẹ, te Jesu ya arrọọ ọghẹe zọ ese ye orukhọ ọghe ima. (Iwinna 16:30, 31; 1 Jọn 2:2) Ọni nọ wẹẹ, u ghi yayi we Jesu gele yin agbọn na, kevbe wẹẹ, te emwi hia ne Baibol tae vbekpa ẹre wa gba.
Hia ne u ruẹ emwi nọ rre Baibol. (2 Timoti 3:15) E Baibol gi ima rẹn wẹẹ, e Pọl vbe Sailas keghi tama esaghan ọkpa wẹẹ: “U gha ya Enọyaẹnmwa e Jesu yi, u gha miẹn fan.” Iyeke ọni, iran na suẹn gha ma esaghan nii “ẹmwẹ ọghe Jehova.”a (Iwinna 16:31, 32) Ọna rhie ma wẹẹ esaghan nii i khian sẹtin gele ya e Jesu yi, vbe ẹ i re wẹẹ ọ mwẹ irẹnmwi nọ gbae ọghe Ẹmwẹ Osanobua.—1 Timoti 2:3, 4.
Ro iro fi uyinmwẹ werriẹ. (Iwinna 3:19) Te ọ khẹke ne u ro iro fi uyinmwẹ werriẹ, u ghi gbe I ma rẹn ye orukhọ ne u ru. Emwa hia ghi vbe bẹghe ẹre wẹẹ u i ghi mwẹ obọ vbe avbe uyinmwẹ ni sọnnọ Osanobua kevbe wẹẹ, u “ru emwi nọ rhie ẹre ma wẹẹ [u] gele fi werriẹ nẹ.”—Iwinna 26:20.
U ghi dinmwiamẹ. (Matiu 28:19) E Jesu khare wẹẹ, te emwa ni khian gha re erhuanegbe irẹn khian dinmwiamẹ. Eseghan na ka guan kaẹn sin vbe dinmwiamẹ. (Iwinna 16:33) Vbe iyeke vbe Pita ghi ma emwa ni gbe ẹbu ẹmwata vbekpa e Jesu nẹ, “emwa ni ya ekhọe hia miẹn ẹmwẹ nọ tae yi keghi dinmwiamẹ.”—Iwinna 2:40, 41.
Gha họn ẹmwẹ ne Jesu. (Hibru 5:9) Emwa ni “ru emwi hia” ne Jesu khare keghi rhie ẹre ma vbe uyinmwẹ iran wẹẹ erhuanegbe Jesu ẹre iran khin. (Matiu 28:20) Iran keghi “ya ẹmwẹ Osanobua ru emwi,” ẹ i re te iran wa “ya ehọ viọ ọre kẹkan.”—Jems 1:22.
Zin egbe ya sẹ ufomwẹ. (Mak 13:13) Ne erhuanegbe Jesu mieke na sẹtin miẹn fan, ọ khẹke ne iran gha “mwẹ izinegbe.” (Hibru 10:36) Vbe igiemwi, te ukọ ighẹ e Pọl wa gha lele imamwaemwi ọghe Jesu hia, erriọ ẹre ọ vbe ya gha ya ẹkoata ga Osanobua. Te ọ wa zin egbe zẹvbe Ovbi Otu e Kristi ya sẹ ẹdẹ nọ wu.—1 Kọrint 9:27.
Vbe Baibol a ta vbekpa “Erhunmwu Emwa Orukhọ”?
Ọ mwẹ erhunmwu eso ne emwa na vbe ugamwẹ eso, iran tie ẹre “Erhunmwu Emwa Orukhọ” kevbe “Erhunmwu Imiẹnfan.” Iran gha ghi miẹn orukhọ ọghe kue ne, iran ghi vbe ya unu kaan rẹn wẹẹ, iran yayi we Jesu wu ye orukhọ ọghe iran. Iyeke ọni, iran ghi we ne Jesu do miẹn agbadia vbe ẹdagbọn iran. Sokpan, ako rhọkpa i rre Baibol na na we ne ima gha na erhunmwu na tie ẹre “Erhunmwu Emwa Orukhọ.”
Emwa eso yayi wẹẹ, iran ghaa na “Erhunmwu Emwa Orukhọ,” ẹ i mwẹ ne imiẹnfan etẹbitẹ ghẹ sẹ iran obọ. Sokpan, ẹ i re erhunmwu ẹre ọ khian ya ima gha mwẹ imiẹnfan. Ẹghẹ hia ma ya ru abakuru, rhunmwuda, emwa orukhọ ẹre ima khin. (1 Jọn 1:8) Ọna ẹre ọ si ẹre ne Jesu na we ne erhuanegbe ẹre gha na erhunmwu vbe ẹghẹ hia na ya orukhọ iran bọ iran. (Luk 11:2, 4) Deba ọni, Ivbi Otu e Kristi eso rrọọ ne ẹkpotọ te kie na ya miẹn imiẹnfan etẹbitẹ, sokpan iran na sẹ Osanobua rae, ẹkpotọ vberriọ na ghi la iran ban.—Hibru 6:4-6; 2 Pita 2:20, 21.
De vbene “Erhunmwu Emwa Orukhọ” ne emwa na ya suẹn hẹ?
Ẹmwẹ ughughan ẹre avbe ọtokha ta vbekpa vbene emwa ya suẹn gha na erhunmwu na hẹ. Emwa eso wẹẹ ẹghẹ na ya mu avbe esọsi e Protestant gbọọ ẹre a suẹn gha na erhunmwu na. Emwa eso vbe kha wẹẹ ẹghẹ na ya gha mu otu ugamwẹ ughughan gbọọ vbe odẹ ukpo 1700 ya fi 1800 ẹre ọ suẹn rẹn. Vbọrhirhighayehẹ, egbe erhunmwu vbenian gbodan ghee emwi nọ rre Baibol. Osanobua hoo ne ima gha ya ekhọe hia na erhunmwu gie ẹre, ẹ i re ne ima gha ta ẹmwẹ ọkpa yangbe yangbe.
a E Baibol gi ima rẹn wẹẹ e Jehova ọre eni Osanobua.