1 Samuẹl

7 Ẹre ikpia ni rre Kiriat Jearim na ya mu Ẹkpẹti Ile ọghe Jehova, iran na ya muẹn ye owa Abinadab nọ rre uhunmwu oke. Iran keghi ya Eliaza ne ovbi ẹre yo ulamwẹ nọ gha gbaroghe ẹre. 2 Ẹkpẹti Ile ọghe Jehova kpẹẹ re vbe Kiriat Jearim ẹsẹse, ọ sẹ odẹ ukpo ugie. Vbe uwu ẹghẹ na hia, ivbi Izrẹl kegha tu tie Jehova, nọ do ye iran obọ. 3 E Samuẹl keghi tama ivbi Izrẹl wẹẹ, “Adeghẹ te uwa hoo ne uwa ya ekhọe uwa hia werriegbe bu e Jehova gha dee, wa ghi viọ avbe ẹbọ ẹrrẹe kevbe amazẹ ọghe Astorẹt hia ni gu uwa kua. Wa ye egbe uwa hia fi ohan ne Jehova, ne uwa vbe gha ga irẹn ọkpa, irẹn ghi do miẹn uwa fan hin obọ ẹtin ọghe ivbi e Filistia rre.” 4 Rhunmwuda ọni, ivbi Izrẹl keghi viọ avbe amazẹ ọghe Baal ni gue iran kua deba ọghe Astat Astorẹt, iran na gha ga e Jehova ọkpa kẹkan. 5 Ẹre Samuẹl na kha wẹẹ: “Wẹẹ ne ivbi Izrẹl hia si egbe koko vbe Mizpa, I gha na erhunmwu gie Jehova ne uwa vbe evba.” 6 Iran keghi rhunmwuda ọnii ya si egbe koko vbe Mizpa. Iran keghi sa amẹ, iran na sae kua zẹ vbe emwi imuohan ne Jehova. lran keghi wa ya ẹdẹrriọ hia gha rre aguẹ. Iran kegha kha wẹẹ. “Ma ru orukhọ ghee Jehova nẹ.” E Samuẹl kegha rre Mizpa, ọ na gha khaevbisẹ yan ivbi Izrẹl vbe evba. 7 Avbe ivbi e Filistia ghi họn wẹẹ ivbi Izrẹl si egbe koko ye Mizpa, avbe enigie nii rre ẹvbo ọghe ivbi e Filistia keghi viọ emwa iran ladian ne iran ya gu iran khọn. Ivbi Izrẹl ghi họn, afianma kegha fian iran. 8 Ẹre ivbi Izrẹl na tama e Samuẹl wẹẹ, “Ye gha na erhunmwu gie Jehova ne Osanobua mwa, nọ miẹn ima fan vbe obọ ivbi e Filistia.” 9 E Samuẹl keghi gbe oteghe ohuan okpa, ọ keghi wa giẹn ikun ẹnrẹn rua, ọ na yae zọ ese ne Jehova. Ọ keghi na erhunmwu gie Jehova, nọ yi ivbi Izrẹl obọ, e Jehova keghi họn erhunmwu ẹnrẹn. 10 Ẹghẹ ne Samuẹl na wa gha zọ ese nii, ivbi e Filistia keghi rhulẹ ghe odaro ne iran ya gu iran gbinna. Sokpan, vbe ẹghẹ nii zẹẹ, e Jehova keghi gie avan nukhunmwu van ke ẹrinmwi rre yan iran. Ezurọ keghi la iran hia egbe, iran na lẹkua. 11 lvbi lzrẹl keghi ke Mizpa vẹ ladian, iran na zẹ ivbi Filistia khu ya sẹ ọkpẹn Betka, iran na gha gbele iran lele odẹ khian. 12 Ẹre Samuẹl na mu okuta ọkpa, o keghi muẹn ye ẹkpo e Mizpa kevbe Jesanah, ọ wẹẹ, “Te Nọyaẹnmwa wa ye ima obọ ke ẹghẹ nii gha dee.” Ọ na rhunmwuda ọni gha tie ẹre Okuta lyobọ. 13 Erriọ iran ghi ya khọn ivbi e Filistia mu otọ, e Jehova ma ghi rhie ẹghẹ ne iran ya dọlegbe mu okuo la otọ Izrẹl, vbe ẹghẹ ne Samuẹl yae vbe agbọn. 14 Avbe ẹvbo ne ivbi e Filistia te munọ hia, kevbe Ekrọn ya sẹ Gat, a keghi kie ehia werriegbe ne ivbi Izrẹl. Izrẹl keghi dọlegbe miẹn otọ ẹre hia werriegbe vbe obọ ivbi e Filistia. Ofumwegbe kegha rre ẹkpo ivbi lzrẹl kevbe Ivbi Amọri.