1 Samuẹl

3 Ẹghẹ ne ọmọ nii ighẹ Samuẹl na gha ga e Jehova vbe ototọ Elai. E Jehova i mobọ gie uhunmwu rre, umian nọ mu ma emwa, wa vbe gha vbee vbe ẹghẹ nii. 2 Ọ ghi sẹ asọn ọkpa, Elai ne aro ẹre sa oze nẹ vbe ẹghẹ na kegha vbiẹ vbe ughugha ẹre. 3 E Samuẹl keghi vbe gha vbiẹ vbe uwu ogiukpo, ehe ne Ekpẹti Ile ọghe Osanobua ye. Ukpa nọ rre evba keghi ye gha baa. 4 E Jehova keghi tie Samuẹl, irẹn keghi khuẹnniẹn wẹẹ: “Ghe mwẹ evbavba!” 5 Ọ keghi rhulẹ bu Elai, ọ na wẹẹ: “Ẹi re te u tie mwẹ.” Sokpan Elai wanniẹn wẹẹ, “I ma tie ruẹ ovbi mwẹ, gha khian ya lovbiẹ.” Ẹre Samuẹl na ya dọlegbe lovbiẹ. 6 E Jehova keghi vbe dọlegbe tie Samuẹl, ẹre Samuẹl na kpaegbe, ọ na bu Elai gha khian ya tama rẹn wẹẹ “ Ẹi re te u tie mwẹ, ghee mwẹ.” Sokpan Elai wanniẹn wẹẹ, “I ma tie ruẹ ovbi mwẹ, gha khian ya lovbiẹ.” 7 (E Samuẹl ma he rẹn e Jehova rhunmwuda, e Jehova ma he ka gu ẹre guan ẹdẹ.) 8 E Jehova keghi dọlegbe tie Samuẹl ukpogieha, ẹre ọ na guakpaegbe, ọ na bu Elai, ọ tama rẹn wẹẹ, “Ẹi re te u tie mwẹ, ghee mwẹ.” Ẹghẹ nii ẹre Elai na do rẹn wẹẹ, e Jehova ẹre ọ tie ọmọ na. 9 Irẹn keghi rhunmwuda ọni tama rẹn wẹẹ, “ya dọlegbe lovbiẹ, ọ gha ye dọlegbe tie ruẹ, u ghi kha wẹẹ, ‘Gha guan e Jehova, ọguọmwadia ruẹ danmwehọ.’” Ẹre Samuẹl na werriegbe ya lovbiẹ. 10 E Jehova kegha dee, ọ keghi mudia vbe evba, ọ keghi dọlegbe tie zẹ vbene ọ ka tie yi, “Samuẹl! Samuẹl!” E Samuẹl keghi wanniẹn wẹẹ, “Gha guan; ọguọmwadia ruẹ danmwehọ.” 11 E Jehova keghi tama rẹn wẹẹ, “I khian ru emwa Izrẹl emwi nọ mu ohan, sẹ vberriọ wẹẹ, ọmwa ke ọmwa nọ rhirhi họn rẹn, ikponi ghi sa ku ọre. 12 Vbe ẹdẹ ne ẹdẹrriọ, I gha ru emwi ne I yan rẹn wẹẹ, I gha ru ẹgbẹe ọghe Elai re, ke omuhẹn ya sẹ ufomwẹ ọnrẹn. 13 Ya tama rẹn wẹẹ, I gha rri igiowa re oya vbe edẹdẹmwẹdẹ, rhunmwuda, ivbi ẹre fi unu gu mwẹ. Elai rẹnrẹn ighẹ iran ru emwi na, sokpan ọ ma kie iran ukpọ ọre. 14 Rhunmwuda ọni, I yan ma ẹgbẹe ọghe Elai nẹ wẹẹ, izọese ra izọhẹ ọkpa i rrọọ na khian ru, na khian ya sẹtin yabọ orukhọ hia fẹẹrẹ ne igiowa ọghe Elai ru. 15 E Samuẹl keghi lovbiẹ ye ukpo ẹre rhinrin ya sẹ owiẹ, ọ keghi kpaegbe ọ na ya kie urho Ọguosa. Ohan ma gi ẹre ta umian nii ma Elai. 16 Elai keghi tie ẹre wẹẹ, “Samuẹl ne ovbi mwẹ,” Irẹn keghi wanniẹn wẹẹ, “Ghee mwẹ enọwanrẹn.” 17 Elai keghi nọ rẹn wẹẹ, “De emwi ne Osanobua tama ruẹ? Ghẹ rhie emwi rhọkpa lẹre mẹ. Osanobua gha ya obọ nọ tọn muẹn adeghẹ u ma ta emwi nọ tae ma mwẹ.” 18 Ẹre Samuẹl na talọ emwi hia ma rẹn, ọ ma vbe mu emwi rhọkpa lẹre nẹẹn. Elai keghi wanniẹn wẹẹ, “Irẹn ọrọre Jehova, emwi ke emwi nọ kei sẹ vbe aro ẹre ọ re ọ ra ru.” Irẹn ọre Jehova. Gi ẹre ru emwi ke emwi nọ yẹẹ ọre.