1 Samuẹl

5 Ivbi e Filistia keghi si egbe koko ne iran do gu ivbi Izrẹl gbinna. lran kegha mwẹ ikẹkẹ ematọn ọghe okuo arriaisẹn ọgban (30,000) deba emwa ni hin ẹsin arriaisẹn ehan (6,000) kevbe ivbiyokuo nibun zẹ vbe ikpekhae ni rre ọkpẹn okun. Iran kegha rrie Mikmas nọ rre odẹ ahọ ọghe Betavin, iran keghi bu agọ ye evba. 6 Iran keghi gu ivbi Izrẹl gbinna ọghe ọhanabe, ẹi ghi ye iran ẹse hiehie. Rhunmwuda ọni, eso na lẹre ye uwu uvun okuta kevbe uvun otọ vbe uwu avbe okuta, deba uwu uye kevbe uhae. 7 Ivbi e Hibru eso keghi fian Ẹzẹ ọghe Jọdan rra gha rrie otọ ọghe Gad kevbe Giliad. E Sọl keghi ye gha rre Gilgal, ohan kegha mu emwa ni gue ẹre, iran na gha guọ zẹzẹzẹ. 8 E Sọl keghi ya ikpẹdẹ ihinrọn mudia khẹ Samuẹl vbe Gilgal, zẹ vbene Samuẹl tama rẹn, sokpan, e Samuẹl ma rrie Gilgal, emwa nii keghi suẹn gha kpa sẹ e Sọl rae. 9 Ẹre Sọl na ghi tama iran wẹẹ, “Wa mu ese na giẹn ruan kevbe isara nii gu mwẹ.” Ọ keghi zọ ese na giẹn ruan nii. 13 E Samuẹl keghi tama e Sọl wẹẹ, “Emwi ukọnmwẹ ẹre u wa ru nii. U ma ru vbene Jehova ne Osanobua ruẹ tama ruẹn. Akpawẹ te u họn ẹmwẹ nẹẹn, ọ gha te gi uwa vbe uniẹn ruẹ gha khaevbisẹ yan Izrẹl vbe ẹdẹdẹmwẹdẹ. 14 Sokpan, banbanna nian, arriọba ruẹ i khian gha rrọọ khian. E Jehova gha gualọ ọmwa ne ẹmwẹ ọnrẹn yẹẹ ọre, nọ yae ma ọba yan emwa rẹn, rhunmwuda, u ma họn ẹmwẹ ne Jehova.”