1 Samuẹl

1 Okpia ọkpa na tie ẹre Ẹlkana kegha rrọọ, ovbi Ifreim nọ, ọ kegha rre Rama ne ẹvbo uhunmwu oke vbe otọ Ifreim. Ovbi e Jeroham nọ, eyẹ ọghe Elihu, vbe ẹgbẹe Tohu ne uniẹn e Zuf. 2 Ẹlkana keghi mwẹ ikhuo eva, ọkpa Hanna kevbe nọkpa Penina. E Penina keghi mwẹ emọ, sokpan, e Hanna ma biẹ. 3 Ukpukpo ẹre Ẹlkana ya ke ẹvbo ẹre kpa gha rrie Siailo, nọ ya ga, kevbe nọ ya zọ ese ghee Jehova ne Osa ọghe ivbiyokuo. E Hofnai kevbe Finihaz ne ivbi Elai eva, kegha re ohẹn ọghe Jehova vbe evba. 4 Ẹdẹ ọkpa, Ẹlkana keghi ya zọ ese, ọ keghi ghae ne Penina kevbe ivbi ẹre, ọkpọkpa. 5 Sokpan ọ keghi rhie nọ maan sẹ ne Hanna, rhunmwuda ọ kakabọ hoẹmwẹ ọnrẹn, sokpan e Jehova ma rhie ọmọ nẹẹn biẹ. 6 E Pẹnina ne ọrue ẹre na khian rẹn ikọ, ọ ma gi egbe rọkhọe, nọ mieke na gha khiẹ, rhunmwuda wẹẹ, e Jehova ma rhie ọmọ nẹẹn biẹ. 7 Erriọ ẹre emwi na ghaa sunu ukpukpo; ẹghẹ ke ẹghẹ ne iran ya yo owa e Jehova, e Pẹnina ghi ru e Hanna sẹrriọ wẹẹ, ọ ghi gha viẹ, ẹ i rri evbare rhọkpa. 8 Ẹlkana ne ọdọ ẹre ghi nọ rẹn wẹẹ, “Hanna, vbọzẹ ne u na viẹ yi? Vbọzẹ ne u ma na rri evbare? Vbọzẹ ne ẹko ruẹ na rhia sẹrriọ ẹghẹ hia? Mẹ ma sẹ emọ igbe ne uwẹ ra?” 9 E Hanna keghi kpaegbe, iyeke vbe iran ghi re nẹ kevbe vbe iran ghi da nẹ. Elai ne ohẹn keghi tota ye ọkpẹn onurho Ọgua Osa ọghe Jehova. 10 Iro keghi wa han e Hanna, ọ na viẹ eve orriara vbe ehe nọ na na erhunmwu gie Jehova. 11 E Hanna keghi yan wẹẹ, “Eo Jehova ne Osa ọghe ivbiyokuo, ghee mwẹ, mẹ ne ọguọmwadia ruẹ. Ghee ọlọghọmwa ne I ye, ne u ye mwẹ rre. Adeghẹ u na rhie ọmọ okpia mẹ, I gha yae fi ohan nuẹn nọ gha re ọghuẹ vbe ẹdagbọn rẹn hia, ẹi khian vbe gbe eto ẹre.” 12 E Hanna keghi wa ya ẹghẹ nọ taẹn gha na erhunmwu gie Jehova. Elai kegha ghee unu ẹnrẹn. 13 Ọ kegha na erhunmwu ye uwu unu, akhuarhamwunu ẹnrẹn kegha guọ, sokpan a ma gha họn ẹmwẹ nọ ta. Rhunmwuda ọni, Elai kegha roro ẹre wẹẹ, te ọ da ayọn. 14 Elai keghi tama rẹn wẹẹ, “Ayọn ayọn uwẹ khian wa gha da ra? Ghẹ ghi da ayọn.” 15 Hana keghi wanniẹn wẹẹ, “Ẹi re erriọ enọwanrẹn, I ma da ayọn, I ma he vbe ye ayọn kan unu. Oya ẹre ọ ru mwẹ, ẹre I na gha na erhunmwu, te I wa te enegbe mwẹ ma e Jehova. 16 Ghẹ gha roro ẹre wẹẹ, okhuo nọ ma rẹn enegbe ẹre I khin. Te I ghaa na erhunmwu vberriọ rhunmwuda te agbọn wa khan mwẹ.” 17 Elai keghi tama rẹn wẹẹ, “Gha khian vbe ọfunmwegbe, te Osanobua ọghe Izrẹl gha rhie emwi ne u nọ ẹre nuẹn.” 18 Okhuo nii keghi wanniẹn wẹẹ, “Lahọ gha ya arọ nọ maan ghee ọguọmwadia ruẹ.” Ọ na kpa. Ọ keghi ya rri evbare, ọ ma ghi vbe gha khiẹ. 19 Vbe owiẹ nọ lelẹe, Ẹlkana kevbe ẹgbẹe ọre keghi kpaegbe, iran ghi ga e Jehova nẹ, iran keghi werriegbe gha rrie owa iran vbe Rama. Elkana kevbe Hanna ne amwẹ ọnrẹn keghi miẹn egbe, e Jehova keghi họn erhunmwu ẹnrẹn. 20 Erriọ a miẹn ọnrẹn wẹẹ, ọ keghi hanmwa, ọ na biẹ ọmokpia. Ọ keghi he ẹre Samuẹl. Ọ wẹẹ, “Obọ e Jehova ẹre I na nọ rẹn.” 21 Ẹlkana kevbe ẹgbẹe ọre kegha rrie Siailo nọ ya zọ ese ukpukpo kevbe ese ne irẹn yan rẹn, gie Jehova. 22 Sokpan, e Hanna ma yo. Ọ keghi tama ọdọ ẹre wẹẹ, “Ọmọ na gha ghi fian ewẹn nẹ, I ghi rhie ẹre gha rrie owa e Jehova, ọ ghi ya gha rre evba vbe ẹdagbọn rẹn hia.” 23 Ẹlkana keghi tama rẹn wẹẹ, “Ru ẹre vbene ọ ke yi sẹ vbe aro ruẹ, tota ye owa u te do fian ọmọ nii ewẹn. Osanobua nọ gi eyan ne u yan rẹn sẹ.” Rhunmwuda ọni, e Hanna keghi tota vbe owa, ọ na gha koko ovbi ẹre. 24 Ugbẹnvbe ọ ghi fian ẹre ewẹn nẹ, ọ keghi rhie ẹre gha rrie Siailo, ọ keghi mu ẹkhuia ẹmila nọ rre ukpo eha mwẹ kevbe ọduẹki irhuarhua kevbe ọgọ ohian ayọn ọkpa. Ọ kegha die owa e Jehova vbe Siailo, ọ na rhie ọmọ nii lele egbe gha dee. 25 Iran ghi gbe ẹkhuia ẹmila nii nẹ, a keghi rhie ọmọ nii gie Elai. 26 E Hanna keghi tama rẹn wẹẹ, “Dọmọ o, u ye yi mwẹ ẹro ra? Mẹ ọre okhuo nii ne u miẹn vbe ọ mudia vbe emwa na gha na erhunmwu gie Jehova. 27 Ọmọ na ẹre l nọ rẹn ẹre, ọ keghi vbe rhie emwi ne I nọ rẹn ẹre mẹ. 28 Rhunmwuda ọni, te imẹ ghi ra yae fi ohan ne Jehova. Ẹghẹ nọ rhirhi ya vbe agbọn, ọghe Jehova irẹn khian gha khin.” Ẹre iran na ga e Jehova vbe evba.