Aizaia
2 Ghee uhunmwu ne Osanobua gie Aizaia ne ovbi Amọz re vbekpa e Juda kevbe Jerusalẹm: 2 Vbe ẹdẹ nọ dee, uhunmwu oke na gha bọ ọgua Osa yi, ghi gha re uhunmwu oke nọ yo sẹ ehia, ọ ghi gha ghee avbe oke hia uhunmwu. Agbẹnvbo ni bun gha rre, iran ghi gha bi la rọ. 3 Emwa iran ghi vbe gha kha wẹẹ, “Wa gi ima hin oke ọghe Jehova gha rrie ọgua Osa ọghe Osanobua Izrẹl, ọ gha ma ima emwi nọ hoo ne ima ru, ma gha lele odẹ nọ zẹ.” E Jerusalẹm ẹre Jehova ke ma ọmwa emwi, e Zaiọn ẹre ọ ke gu emwa rẹn guan. 4 Ọ gha dọlọ avbe uhunmwu ẹvbo nikhua kugbe. Iran gha ya umozo iran dunmwu emwi nọ yevbe ẹguẹ kevbe asoro iran, iran gha ya dunmwu ikhu. Avbe uhunmwu ẹvbo i ghi khọn okuo ọvbehe, iran i ghi mu egbe okuo ọvbehe. 5 Banbanna nian, wa ne ivbi uniẹn e Jekọb, wa gi ima gha khian vbe uwu uwanmwẹ ne Jehova rhie ne ima. 6 Wẹ mianmian avbe emwa ruẹ nẹ, ighẹ avbe ivbi e Jekọb. Uyinmwẹ imamase ẹre ọ ghi gba otọ nii hia, ke odẹ ahọ ya sẹ Filistia. Uyinmwẹ ẹvbo ẹrrẹe ẹre avbe emwa nii ghi yin. 7 Otọ iran vuọn ne esiliva kevbe igoru. Ẹfe iran i vbe mwẹ inu nọ khin. Otọ iran vuọn ne avbe ẹsin kevbe ikẹkẹ okuo, a i kue sẹtin ka iran. 8 Otọ iran vuọn ne amazẹ, emwi ne iran ya obọ iran ma, ẹre iran ghi ghoo. 9 A gha si edọmwadẹ ọghẹe vbe uwu iran kẹ otọ, a ghi fa iran rua. Osanobua i khian yabọ iran. 10 Lẹẹ ya khuakhua egbe vbe uwu uvun okuta, rhunmwuda izohu kevbe uyi ọghe Jehova nọ dee. 11 Ẹdẹ dee na gha dobọ itengbemu ọmwa nagbọn yi, a ghi vbe fuẹn uhiomwẹ ọmwa nagbọn rua. Ẹghẹ nii, e Jehova ọkpa, ẹre a gha rhie uyi na.