Ihuan ọghe Solomọn

7 A miẹn vbene u mose hẹ uvbi! A miẹn vbe owẹ ruẹ mose hẹ vbe uwu ibata, vbene u ya gada owẹ, te ọ yevbe iwinna ọghe owinna nọ guẹ ona. 2 Ọkpan ne amẹ nọ winhin i na fo rre evba. Ikun erhan ọka na gbae rre evba, vbene iyokho ẹzẹ na lẹga ẹre. 3 Ewẹn ruẹ yevbe ẹrhuẹ nọ re ivin eva, ra uzo nọ re ivin eva. 4 Ẹyaẹn ruẹ yevbe orrẹ ọghe akọn eni, aro ruẹ yevbe ọghọdọ nọ rre Hesbọn nọ rre ọkpẹn onurho ẹvbo nii. Ihue ruẹ ye mose mose vbe owa ọkhẹ ọghe Lẹbanọn nọ khẹ odẹ vbe Damaskọs. 5 Uhunmwu ruẹ ye gelete vbe Oke Kamẹl, eto ruẹ na mẹ gha fi wainwain vbe esiliki, ose ẹre gha sẹtin mu ọba ye imu. 6 A miẹn vbe u mose hẹ, a miẹn vbe u yẹẹ ọmwa hẹ, vbene ahoẹmwọmwa ruẹ ye ọmwa hẹ, nọ gbae nọ. 7 Te u ye hiọnhiọnhiọn vbe udin, ewẹn ruẹ yevbe ititi ivin. 8 I gha hin udin nii ne I ya fan vbe ẹdin ẹnrẹn, te ewẹn ruẹ yevbe ititi alimo vbe odaro mwẹ. Uhiọnrọnmwẹ ruẹ yevbe uwinhinmwẹ otiẹn. 9 Unu ruẹ yevbe ayọn nọ maan sẹ. Wa gi nene ayọn gha lẹẹ bu enida mwẹ yo. Nọ gha lẹẹ ye ọre akhuarhamwunu kevbe akọn. 10 Enida mwẹ ẹre ọ yan mwẹ, ọ vbe gualọ aro mwẹ. 11 Larre, enida mwẹ gi ima khian ladian hin orere ẹvbo rre, ne ima ya gbe asọn eso vbe avbe igue. 12 Ma ghi rherhe rhiọrre vbe owie na gha ghee avbe azara na ghee deghẹ iran suẹn gha zọ nẹ, adeghẹ obobo ẹre rhan nẹ. Adeghẹ avbe erhan e pomegranẹt gbe obobo nẹ. Evba ẹre I gha na rhie ahoẹmwọmwa mwẹ nuẹn. 13 U gha sẹtin winhin erhan ni winhin, avbe ọmọ erhan ni maan hia sikẹ onurho mwa. Enida, I viọ emwi ni ya ẹko rhiẹnrhiẹn nẹdẹ kevbe ọghe orre na khẹ ruẹ.