Itan

9 Ẹwaẹn ọghe ẹmwata bọ owa ẹre nẹ, ọ keghi ru orrẹ ihinrọn yọ. 2 Ọ keghi gbe aranmwẹ na ya rri evbare, ọ keghi ya emwi nọ winhin gua ayọn, ọ keghi mwamwa emwi ye eteburu. 3 Ọ gie avbe eguọmwadia ẹre nikhuo ladian ne iran ya tie ẹvbo ke ehe nọ ghi rree sẹ vbe ẹvbo nii rre: 4 “Uwa larre vbe uwu owa, wa ni ma rẹn na ye!” Ọ na vbe khama akpa wẹẹ, 5 “Larre do rri evbare mwẹ ne u vbe da ayọn ne I guare. 6 Ladian vbe uwu ẹbu emwa ni ma rẹn na ye, ne u gha rre agbọn. Uwẹ lele odẹ irẹnmwi.” 7 U gha tama ọmwa nọ khare ighẹ irẹn wa rẹn emwi hia wẹẹ, ọ ba emwi eso ku ru, ihẹn ẹre ọ khian tie nuẹn. U gha gu ọmwa dan gui ye ọkhọ, te ọ khian kuan ruẹ. 8 Ghẹ tama ọmwa nọ wẹẹ irẹn wa rẹn fo ighẹ ọ ba emwi ku ru, te ọ khian gha mu ohu ruẹ yọ. Sokpan, u gha tama umẹwaẹn ighẹ ọ ba emwi ku ru, ọ ghi gha ya ọghọ nuẹn. 9 Emwi ne u rhirhi tama umẹwaẹn, te ọ yae waan yọ. Emwi ne u rhirhi tama ọmwa esi, te ọ rhie ba ẹre irẹnmwi. 10 Adeghẹ u hoo ne u gha re ọmwa ẹwaẹn, te u gha ka mu ohan e Jehova nẹ. Adẹghe uwẹ rẹn Ọmwa Nọhuanrẹn nii, uwẹ mwẹ irẹnmwi. 11 Te ẹwaẹn fian ba ọmwa utọmwẹ. 12 U ghaa waan, ere nọ rrọọ, ọghuẹ nọ; adeghẹ u na vbe fi iyeke gbe ẹre, wẹ ẹre ọ khian rri oya. 13 Okhuo nọ kọẹn ghi talọ, ọ ma rẹn na ye, te awa lalọ ẹre aro. 14 Ọ ghi tota ye onurho owa ẹre, ye aga vbe ehe ne emwa ghi na bun sẹ vbe ẹvbo nii 15 ọ ghi gha datie emwa ni gberra khian, emwa ni hẹko ru ọghe iran khian wẹẹ: 16 “Wa larre vbe uwu owa, wa ni ma rẹn na ye.” Ọ ghi vbe tama akpa wẹẹ, 17 “Amẹ na do sa, ẹre ọ rhiẹnrhiẹn sẹ, Ebrẹd na do rhie, ẹre ọ maan sẹ vbe unu.” 18 Iran ne obọ ẹre vba re, ma vbe rẹn wẹẹ, emwa ni la owa ẹre, uhunmwu ẹre iran ya khiẹ ọre kevbe wẹẹ iran ni ka la owa ẹre yi, wa rre ehe ni dinmwi nian vbe Idin.