Itan

10 Avbe itan ọghe Sọlomọn ẹre ena khin: Ọmọ nọ waan, te erhae ghee ẹre hio. Sokpan, akhiẹ ẹre ọmọ nọ kọẹn si ye iyẹe egbe. 2 Ẹfe na ya ogberhu miẹn i khian maan ne ọmwaikọmwa, sokpan te uyinmwẹ ẹmwata de ọmwa ye agbọn. 3 E Jehova i khian gi ohanmwẹ gbe ọmwa ata, sokpan, ẹ i khian gi emwi ne emwa dan hoo sẹ iran obọ. 4 Ogue ẹre obẹrure si ye ọmwa egbe, sokpan, a ya obọ mu, ẹre ẹfe la rre. 5 Umẹwaẹn ghi ya rhọ emwiokọ vbe ọ gha wo nẹ, sokpan, emwi ekhue nọ ne ọmwa wa ya ẹghẹ emwiorhọ vbiẹ. 6 Erhunmwu ẹre ọmwa esi miẹn. Ẹmwẹ ne ọmwa dan guan, ọkhọ ẹre ọ gbalọ yọ. 7 A gha ye emwa ata rre zẹvbe emwa na fiangbe, sokpan, banbanna a mianmian ọmwa dan nẹ. 8 A gha bu avbe umẹwaẹn ude esi, iran ghi rhie. Emwa ni ta ẹmwẹ ukọnmwẹ gha fuan. 9 Emwa ni yin ẹse, ẹkun gha sẹ iran otọ, sokpan, obọ gha vba emwa nẹi yin ẹse. 10 Ọmwa nọ rhie ẹmwata lẹre, te ọ gbe olighi, sokpan, ọmwa nọ tae ladian ighẹ emwi ma gba, ọfunmwegbe ẹre ọ gualọ. 11 Ẹmwẹ ne unu ọmwa esi, isi arrọọ nọ. Sokpan, ẹmwẹ ne unu ọmwa dan, ọkhọ ẹre ọ si rre. 12 Otighi ẹre ikhuiwu si rre, sokpan te ahoẹmwọmwa ya abakuru hia bọ ọmwa. 13 Ẹmwẹ ẹwaẹn ẹre ọ ke unu avbe umẹwaẹn rre, sokpan, te ọ kere na gha rri avbe akpa oya. 14 Ọmwa nọ waan ghi viọ irẹnmwi nọ miẹn hia, sokpan, akpa gha guan, u ghi rẹn ighẹ olighi gha la evba. 15 Te ẹfe degue ọmwa nọ fe sokpan, te ogue miẹn ovbiogue uhunmwu. 16 Emwi na ya san ọmwa ẹse ye emwi esi nọ ru, ọre arrọọ, sokpan te orukhọ si ọmwa la orukhọ ọvbehe. 17 Ọmwa nọ rhie ehọ ye otọ vbe a ghaa gu ẹre gui, ọ gha dia agbọn ya, sokpan, ọmwa nẹi kue wẹẹ irẹn gele ba emwi ku, te ọ rhie uhunmwu daa ẹbe. 18 Ọmwa nọ mu ohu ọmwa, sokpan ọ ghi gha mu ẹre lẹre, ọhọnhoghe nọ. Ọmwa nọ ta ewẹwẹwẹ khian, akpa nọ. 19 Ọmwa gha talọ gbe, ẹ i mwẹ ọ ma ru abakuru. Sokpan, te ọmwa nọ mwẹ ẹwaẹn kọn ẹmwẹ ta 21 Ẹmwẹ ne unu ọmwa esi ta gha rhie ọ maan gie emwa nibun, sokpan, ọmwa nẹi mwẹ ẹwaẹn, sẹtin ya ukọnmwẹ gbe egbe ẹre rua. 22 Afiangbe ọghe Jehova ẹre ọ ya ọmwa fe, ẹ i vbe rhie obalọ rhọkpa ba re.