Itan

5 Ovbi mwẹ, danmwehọ, ne u vbe rhie ehọ ye otọ ye ẹwaẹn mwẹ, kevbe vbene I ya ghee umian emwi. 2 Ẹghẹ nii, u gha rẹn vbene a ya yin ẹse hẹ, ẹmwẹ ne u ta gha vbe rhie ma wẹẹ u mwẹ irẹnmwi. 3 Akhuarhamwunu amwẹ errẹe sẹtin gha miẹnmiẹn vbe owọn, isosonu ẹnrẹn sẹtin vbe ye rọkhọ vbe ofigbọn oliv, 4 Sokpan, vbe okiekie ehia, emwi ne u khian miẹn vbọ ma gberra orriara kevbe obalọ. 5 Te ọ khian si ruẹ la eke ne iran ni wulo nẹ ye, odẹ nọ la khian nii, ehe nọ rrie uwu ẹre nọ. 6 Ẹ i vbe mudia ye odẹ nọ rrie arrọọ, ọ ghi bibi odẹ, vbe nẹi na vbe rẹn emwi nọ sunu. 7 Wa danmwehọ mwẹ nian, ivbi mwẹ, wa ghẹ vbe mianmian ẹmwẹ ne I ta. 8 Wa gha lẹẹ ne egbe okhuo vberriọ; ghẹ vbe sikẹ onurho ẹre hiehie. 9 U gha danmwẹ ọnrẹn, ọghọ nọ te ka rrọọ ruẹ egbe gha gberra la obọ emwa ọvbehe, emwa nẹi mwẹ itohan ẹre ọ khian vbe gbua. 10 Vbene ẹmwata, ẹrrẹe ẹre ọ khian viọ emwi ruẹ, emwi ne u miẹn ẹsọn yi hia ghi la ghee obọ ọmwa ọvbehe. 11 U ghi lovbiẹ gha rri akọn vbe ukpo uwu, efun egbe kevbe inian ruẹ ghi gha ranran vbe odọ. 12 Wẹ ghi do gha kha wẹẹ, “Vbe a na miẹn hẹ wẹẹ mẹ i zẹdẹ ro iro? Vbọzẹ ne I i na gi ọmwaikọmwa dia mwẹ ye odẹ? 13 I i zẹdẹ danmwehọ avbe ọmamwaemwi mwẹ, I ma zẹ ye iran re. 14 Vbe udemwurri nian, efa ọghe uwu ẹbu ẹre I ghi miẹn.” 15 Rhiegbe mu amwọn ọkpa, irẹn ọkpa ẹre ọ gha vbe re ne u hoẹmwẹ ọnrẹn. 16 Emọ ne ikhuo ọvbehe biẹlẹ nuẹn i khian gha mwẹ esa ne iran ye nuẹn. 17 Ivbuẹ ẹre ọ khẹke nọ waan rre, ne iran do gha ye uwẹ obọ ighẹ ẹ i re ẹrrẹe. 18 Rhunmwuda ọni, gi ẹko okhuo ne u rhie ye owa gha sẹ ruẹ ọyẹnmwẹ, ne u vbe gi uvbi ne u rhie re, gha ya ekhọe ruẹ rhiẹnrhiẹn, 19 Nọ mose kevbe ne lọgiọọ zẹvbe ẹrhuẹ amwẹ. Gi ose ẹre gha ya ẹko rhiẹnrhiẹn ruẹ, gi irẹn vbe ya ahoẹmwọmwa ẹnrẹn hin uwẹ egbe. 20 Ovbi mwẹ, vbọzẹ ne u gha na rhie ahoẹmwọmwa ruẹ ne okhuo ọvbehe yi? Vbọzẹ ne ose amwẹ ẹrrẹe gha na viẹn ye uwẹ aro? 21 E Jehova bẹghe emwi ne u ru hia, ehe ne u rhirhi la, ọ ghee ruẹ. 22 Orukhọ ne ọmwa dan ru, ifi ẹre nọ. Oga ọghe orukhọ ẹre ghi vbe muẹn. 23 Ọ wu, rhunmwuda, ọ ma rẹn vbene a zin egbe emwi hẹ. Ukọnmwẹ ọnrẹn nọ wia, ẹre ọ gie ẹre idin.