Psalm

79 Osanobua, avbe ni ga ẹbọ mu okuo la otọ ruẹ, iran mu awua la ọgua Osa ruẹ nọhuanrẹn, iran keghi rẹnkhẹn e Jerusalẹm sotọ. 2 Iran sẹ ikun avbe emwa ruẹ rae ne avbe ahianmwẹ, kevbe ikun eguọmwadia ruẹ ne avbe aranmwẹ oha gha re. 3 Iran tue esagiẹn emwa ruẹ yotọ zẹvbe amẹ. Esagiẹn gha lẹẹ zẹvbe amẹ, la orere Jerusalẹm hia. A ma ghi vbe sẹ orhiọnkpa rae nọ gha ree orinmwi. 4 Avbe ẹvbo ni lẹga ima gha tie ihẹn ne ima. Iran gha giẹ ima, iran gha ya ima gbogiẹ. 5 Eo Jehova, u gha wa mu ohu ima rhinrin ẹdẹdẹmwẹdẹ ra? Ohu ruẹ gha wa gha giẹn khian zẹvbe erhẹn ra? 6 Werriẹ aro ohu ruẹ daa avbe uhunmwu ẹvbo nii nẹi ga ruẹ, kevbe avbe emwa nẹi na erhunmwu ghee ruẹ. 7 Rhunmwuda, iran gbele emwa ruẹ, iran mu ẹvbo ruẹ rhia. 8 Ghẹ rri ima oya ye orukhọ avbe erha mwa odede, tohan ima, egbe wọọ ima nẹ. 9 Yi ima obọ Osanobua ne u miẹn ima fan, fannọ ima yotọ ne u vbe ya orukhọ mwa bọ mwa rhunmwuda uyi ruẹ. 10 Vbọzẹ ne avbe uhunmwu ẹvbo gha na gha nọ ima wẹẹ, “Osanobua uwa vbo?” Gi ima bẹghe ẹre vbe u rri avbe uhunmwu ẹvbo nii oya, rhunmwuda ne iran na gbe esagiẹn emwa ruẹ yotọ. 11 Họn utumwẹ obalọ ọghe iran ni rre eghan, ne u vbe ya ẹtin ruẹ nọkhua fannọ iran na bu ohiẹn uwu gbe kua. 12 Eo Jehova, ha ẹre werriegbe ne avbe uhunmwu ẹvbo nikẹre igba ihinrọn rhunmwuda unu ne iran filo guẹ. 13 Ẹghẹ nii, ma ne emwa ruẹ ne oghẹn ohuan ruẹ gha kpọnmwọn ẹdẹdẹmwẹdẹ, ma ghi vbe gha rho ruẹ la ẹdẹ ni dee hia.