Psalm
78 Wa ne emwa mwẹ, wa danmwehọ emwi ne I ma uwa ẹre, ne uwa vbe gbehọkotọ danmwehọ ẹmwẹ ne I ta. 2 I gha ya ẹmwẹ ẹwaẹn rhan otọ emwi ọkpaodin ni gberra nẹ. 3 Emwi ne ima ka họn nẹ, na vbe rẹn, avbe emwi ne avbe erha mwa tama ima, 4 Ma i ra viọ iran lẹre ne avbe ivbi ima, ma gha tama orre nọ ghi lelẹe vbekpa ẹtin e Jehova kevbe avbe iwinna nikhua nọ winnaẹn kevbe avbe emwi ọyunnuan nọ he ru. 5 Ọ rhie uhi ne Ivbi Izrẹl kevbe iyi ne ivbi uniẹn e Jekọb; ọ ma avbe erha mwa odede ẹre, ne iran ma avbe ivbi iran uhi irẹn. 6 Ne orre nọ ghi lelẹe miehe na ruẹ iran, ne iran vbe tae ma avbe ivbi iran. Ivbi iran ghi vbe ma ivbi iran uhi irẹn. 7 Vbe odẹ vbenian, iran gha mu ẹtin yan Osanobua. Iran i khian vbe mianmian iwinna nọ winnaẹn, iran ghi gha ya uhi ẹre ru emwi vbe ẹghẹ hia. 8 Iran i khian yevbe avbe erha iran odede, ni sọtẹ kevbe ni zẹ utun vbe ehọ, ni ma mu ẹtin yan Osanobua ẹse, kevbe ni ma vbe guobọ ẹre. 9 Ivbi Ifreim, ni viọ uhanbọ kevbe ifẹnmwẹ keghi lẹẹ kua vbe ẹdẹ na khọn okuo. 10 Iran ma mu ile ne iran gu Osa ta sẹ, iran ma ya uhi ẹre ru emwi. 11 Iran mianmian emwi nọ ru, iwinna ọyunnuan ne iran miẹn vbe ọ winnaẹn. 12 Vbe odaro evbibiẹ iran, ẹre Osanobua na winna iwinna ọyunnuan, vbe otọ nọ rriẹ ọghe Zoan vbe otọ Igipt. 13 Ọ waa okun ye ihe eva, ọ na viọ iran lae gberra, ọ keghi ru ẹre ne amẹ mudia zẹvbe egbekẹn. 14 Vbe ẹghẹ avan, ọ keghi ya okuku su iran, ọ keghi ya orrẹ ọghe erhẹn su iran vbe asọn hia. 15 Ọ va okuta vbe ato, ọ na rhie amẹ gie iran ke odin rre. 16 Ọ ru ẹre ne amẹ ke uwu okuta lẹẹ ladian, ọ keghi gi amẹ nii gha lẹẹ zẹvbe ẹzẹ. 17 Sokpan, iran keghi ye gha ru orukhọ ghee Osanobua, iran keghi sọtẹ ghee Nọ Yo Sẹ Ehia vbe ato. 18 Iran kegha danmwẹ Osanobua ghee vbe uwu ekhọe iran, vbe ne iran na gha nọ evbare nọ khọn iran. 19 Iran keghi ya ukpẹ gha sakan Osanobua, iran wẹẹ: “Osanobua gha sẹtin rhie evbare rre vbe ato ra?” 20 Ẹmwata nọ wẹẹ, ọ fi okuta emwi, amẹ kegha lẹẹ ogbigbi ladian. “Sokpan, ọ gha vbe sẹtin rhie evbare ne ima ra, ra nọ vbe viọ emiowo gie emwa rẹn?” 21 Rhunmwuda ọni, ohu keghi mu e Jehova vbe ọ họn ẹmwẹ ne iran tae, ọ keghi ya erhẹn gu emwa irẹn gbinna, ohu iran keghi kakabọ muẹn. 22 Rhunmwuda, iran ma mu ẹtin yan rẹn, iran ma vbe yayi wẹẹ ọ gha miẹn iran fan. 24 Ọ viọ ọka ẹrinmwi gie iran, ọ na vbe gha viọ e mana gie iran, ne iran re. 25 Rhunmwuda ọni, iran keghi rri ebrẹd ọghe avbe olẹtin, Osanobua keghi viọ emwi ne iran hoo hia ne iran. 38 Sokpan Osanobua tohan emwa rẹn, ọ ya orukhọ iran bọ iran, ọ ma fuẹn iran ruan. Ẹghẹ nibun ẹre ọ ya mu ohu nọ te muẹn yotọ, ọ ghi gbe ibiẹ rhie. 40 Kugba kẹ ẹghẹ, ẹre iran ya gha sọtẹ daa ẹre vbe uwu ato, kugba kẹ ẹghẹ, ẹre iran ya gha rhia ẹre ẹko rua. 41 Iran kegha danmwẹ Osanobua ghee, iran keghi si obalọ ye Ọmwa Nọ Huanrẹn Ọghe Izrẹl egbe. 42 Iran mianmian ẹtin ẹnrẹn nọkhua, kevbe ẹdẹ nọ miẹn iran fan, vbe obọ eghian iran. 56 Sokpan, iran sọtẹ daa Osanobua ne Udazi, iran kegha danmwọẹn ghee, iran ma ya uhi ẹre ru emwi. 57 Iran kegha fi iyeke gbe ẹre, iran ma guobọ ẹre, vbene avbe erha iran wa vbe ru, iran khian nẹi gia mu ẹtin yan zẹvbe uhanbọ nọ gọe.