Psalm
71 Eo Jehova, wẹ ẹre imẹ lẹgbinna, ghẹ gi obọ gba mwẹ. 2 Rhunmwuda ighẹ ọmwata wẹ khin, yọ mwẹ obọ ne u miẹn mwẹ fan. Danmwehọ mwẹ, ne u yuo mwẹ ladian. 3 Gha re ugue mwẹ nẹi fira, kevbe odin ọkhẹ nọ wegbe, nọ degue mwẹ. Wẹ ọre ugue kevbe nọ gbinna mẹ. 4 Osanobua mwẹ, yuo mwẹ hin obọ emwa dan rre, hin obọ ẹtin emwa ne ekhọe ẹre rri, kevbe emwa dan. 5 E Jehova ne Udazi, uwu uwẹ mẹ na mwẹ idaehọ, wẹ ẹre I mu ẹtin yan ke egbe ọvbokhan gha dee. 6 Wẹ ẹre I ya egbe yan vbe ẹdagbọn mwẹ hia, wẹ ẹre ọ degue mwẹ ke ẹdẹ na biẹ mwẹ gha dee. Mẹ gha rho ruẹ rhinrin ẹdẹ. 7 Na ghee ru, ẹre ẹdagbọn mwẹ wa khin, ne emwa nibun. Rhunmwuda, wẹ ọre ugue mwẹ nọ wegbe. 8 Te imẹ ra rho ruẹ ne ebi ro, I ghi vbe gha wewe uyi ruẹ. 9 Ghẹ he mwẹ yotọ, vbe I khian ọmaẹn nẹ nian. Ghẹ fi iyeke gbe mwẹ vbe egbe mwẹ guọghọ nẹ. 10 Avbe eghian mwẹ hoo ne iran gbe mwẹ rua, iran gha zẹ iro, iran vbe khuan khẹ mwẹ. 11 Iran wẹẹ, “Osanobua he ẹre yotọ nẹ, wa gia khu ẹre na muẹn, ọmwa nọ gha miẹn ẹnrẹn fan i rrọọ.” 12 Ghẹ khian rree Osanobua; Osanobua mwẹ, zẹgiẹ gha dee do yọ mwẹ obọ! 13 Te obọ gha gba iran ni gu mwẹ gbinna, na fuẹn iran rua. Te a gha ya ekhue mu iran ni hoo ne iran kuan mwẹ, na vbe fa iran rua. 14 Sokpan, nọ ne imẹ, I gha mwẹ izinegbe. Te I khian ye gha rhie urhomwẹ nuẹn. 15 I gha na iyẹn umamwẹ ruẹ ne ebi ro, I gha na iyẹn imiẹnfan ruẹ, agharhemiẹn wẹẹ ọ gberra ne imẹ gha sẹtin rẹn otọ ẹre. 16 I gha rho ẹtin ruẹ, Eo Jehova ne Udazi; l gha mu ẹmwẹ umamwẹ ruẹ go, ọghuẹ ọkpa kẹkan. 17 Ẹghẹ ne I na ye kherhe ẹre u na ma mwẹ emwi, te I ye na iyẹn iwinna ọyunnuan ruẹ. 18 Ugbẹnvbe I ghi khian ọmaẹn nẹ kevbe I vbe fu edẹ, Eo Osanobua, ghẹ he mwẹ yotọ! Gu mwẹ na iyẹn vbene u mwẹ ẹtin hẹ ma orre ni dee, ne I gi emwa hia ni dee rẹn vbene u kpọlọ hẹ. 19 Osanobua, ẹmwata ruẹ sẹ aro iso. Wẹ winna iwinna ọyunnuan nibun nẹ; ọmwa nọ yevbe uwẹ i rrọọ. 20 U si ọlọghọmwa kevbe usẹ yọ mwẹ egbe, sokpan, u gha rhie ẹtin mwẹ dọlegbe mẹ, u gha mu mwẹ lẹẹ ne idin. 21 U gha ya mwẹ kpọlọ sẹ vbene I te ye ẹdẹ, u gha dọlegbe fu mwẹ ẹko rre. 22 I gha gele ya akpata rho ruẹ, I gha rho ruẹ rhunmwuda, u gia mu ẹtin yan, Osanobua mwẹ, I gha ya akpata mwẹ so ihuan ghee ruẹ, Ọmwa Nọ Huanrẹn Ọghe Izrẹl. 23 I gha wee uwemwẹ oghọghọ vbe ẹghẹ ne I ya so ihuan urhomwẹ ghee ruẹ, I gha ya ẹtin mwẹ hia so ihuan, rhunmwuda, wẹ miẹn mwẹ fan nẹ. 24 I gha na iyẹn umamwẹ ruẹ ne ebi ro, rhunmwuda, iran ni hoo ne iran kuan mwẹ, obọ gha gba iran, a gha vbe faa iran rua.