Psalm
55 Họn erhunmwu mwẹ Nọyaẹnmwa, ghẹ fi aro rua, vbe I gha rinmwian. 2 Danmwehọ mwẹ ne u rhie ewanniẹn mẹ, ohawa ne I ye wiẹn mwẹ ruan. 3 Eyan ne avbe eghian mwẹ yan mu mwẹ ohan, ukpokpo emwa dan rẹnkhẹn mwẹ yotọ, iran si ọlọghọmwa yọ mwẹ egbe, ohu mwẹ mu iran, iran vbe khuiwu mwẹ. 4 I runraẹn ẹsẹse, ohan uwu vbe rẹnkhẹn mwẹ yotọ. 5 Ohan kevbe uguọmwẹ dobọ mu mwẹ, ohan ọyunnuan mu mwẹ. 6 Akpawẹ te imẹ mwẹ ifuẹn zẹvbe idu, te I gha tin fua, ne I ya gualọ ihe ọkpa na kẹtin. 7 Te I gha wa kakabọ tin gha rrie eke nọ rree, ne I ya bọ owa mwẹ ye uwu ato. 8 Te I gha zẹgiẹ kpa, ne I ya gualọ ehe rhiegbe mwẹ lẹre yi, ne ogbigbi ẹhoho kevbe ẹhoho amẹ. 9 Gi iran ne eghian mwẹ zurọ rua vbe iran ghaa guan, I miẹn uyinmwẹ nọ wegbe kevbe otighi vbe ẹvbo nii. 10 Ọ lẹga ẹre vbe avan kevbe asọn; Ọ ya uyinmwẹ ika kevbe orueghe vuọn rẹn. 11 Omurhia wa rre ehe hia, orere hia vuọn ne ukpokpo kevbe erẹrẹ. 12 Akpawẹ oghian ẹre ọ ya mwẹ gbogiẹ, te I gha zin ẹnrẹn, akpawẹ ọmwa na gba suan ẹre ọ rhuọ gu mwẹ, te I gha rhiegbe mwẹ lẹre nẹẹn. 13 Sokpan, wẹ nọ, ogieva mwẹ, ihua mwẹ kevbe ọse nọ sikẹ mwẹ. 14 Ma gba mu iro ẹkhokho ma egbe, ma keghi vbe gba ga vbe uwu ọgua Osa. 15 Te avbe eghian mwẹ gha fian wu; te iran gha ya owẹ khian la idin. Ọkhọ rre owa iran kevbe ekhọe iran. 16 Sokpan, mẹ kpee tie Osanobua nọ yọ mwẹ obọ, e Jehova gha miẹn mwẹ fan. 17 Owiẹ, avan kevbe asọn ẹre ovian kevbe utumwẹ obalọ mwẹ ya bu ẹre yo, ọ gha họn urhu mwẹ. 18 Ọ gha rhie mwẹ ke okuo ne I gu eghian nibun khọn, gha die owa vbe egbe hẹnnẹdẹn. 19 Osanobua nọ khaevbisẹ ke na ya bu agbọn tu agbọn gha dee, gha họn urhu mwẹ, ọ ghi khọn iran muotọ rhunmwuda, iran ma kue ne iran fi werriẹ, iran i vbe mu ohan rẹn. 20 Ọmwa ne ima gba mu obọ nẹdẹ gu avbe ọsiọre gbinna, ọ ma mu eyan rẹn sẹ. 21 Ẹmwẹ unu ẹnrẹn rriẹ sẹ owọn, sokpan ohu ọmwa mu ọmwa, rre ọre uwu ekhọe, ẹmwẹ unu ẹnrẹn rọkhọ emwi sẹ ofigbọn, sokpan, te ọ giagia emwi vbe umozo nọ mu. 22 Zẹ ọlọghọmwa ruẹ obọ ne Jehova, ọ gha gbaroghe ruẹ. Ẹ i khian gi ọmwa esi de hiehie. 23 Sokpan, Osanobua, wẹ ẹre ọ khian silo avbe izigha kevbe avbe ọhọnhoghe la idin iran, ọ te sẹ ukhiọnmwẹ ẹdagbọn iran. Sokpan, zẹvbe ọghomwẹ, mẹ gha mu ẹtin yan ruẹ.